阿愷之聲Podcast (阿愷之聲相當有限公司)

觀眾朋友逐家好，阿愷之聲閣來啊！這遍新的節目，阿愷仔欲來邀請一群鹿港的「佇（tīr）鄉青年」來空中開講！

阿愷之聲鹿港放送第一集，邀請小楊來到現場，分享伊的工課生活，佮有鹿港新聲閣的發起故事。上重要的，就是小楊對肉回佮麵線糊的食用哲學！

＊鹿港新聲閣：https://www.facebook.com/lokkangsinsiannkoh

阿愷之聲鹿港放送第二集，咱邀請了鹿港學姊來到現場，分享伊業務人生的趣味故事，閣有佳生活實驗室想欲佇鹿港創造的理想生活！

＊佳生活實驗室：https://www.facebook.com/ciaowonderlab

阿愷之聲鹿港放送第三集，咱邀請了鹿港秀鶯姊仔aka臻時舘Joy姊來到節目頂頭，伊佇三十年前做了一件真重要的代誌，就是將我生落來。本集節目，阿愷仔欲來訪問阮母阿佇臻時舘的趣味故事！

＊臻時舘facebook面冊：https://www.facebook.com/jenshyrkuan

聽眾朋友歡迎收聽阿愷之聲，這集節目邀請了我家己的叔伯阿兄，同時也是得著舊年鹿港歌唱比賽冠軍的柏仁來到現場，分享唱台語歌的鋩角（mê‑kak），上重要的，當然是愛聽歌王來唱歌！

聽眾朋友，這遍阿愷之聲邀請力野茶陶所經營者之一，本身也是瓷仔創作者的阿思來到節目頂頭。
因為是頭一遍佇上早時錄音，所以先來講阮食的早頓：鹿港卵餅的口味，才閣來講阿愷仔收藏阿思彼群藝術家朋友的四塊瓷仔杯背後的創作故事。

＊力野茶陶所：https://www.facebook.com/liiyaceramicteashop

聽眾朋友，本集節目頭一遍粉紅仔色泡泡滿四界，阿愷邀請了所宅實驗室的蘇蘇來到節目頂頭分享做甜點的故事，規集攏真甜。

蘇蘇往過是一位護理師，但後來續佇「做點心」揣著新的人生目標，所宅實驗室想欲用點心來照顧恁逐家的心。

＊「所宅實驗室」面冊：https://www.facebook.com/susplace

聽眾朋友，歡迎收聽阿愷之聲鹿港放送！
阮鹿港有一句話講「三步一小廟，五步一大廟」，這遍節目阿愷真歡喜邀請了鹿港噗嚨宮宮主，來到空中和逐家結緣！阿彌陀佛。

＊鹿港噗嚨宮：https://www.instagram.com/pu_long_temple/

聽眾朋友逐家好，現在為恁邀請的是阿愷佇鹿港熟識八年的好朋友小魚，人講「鹿港溫昇豪」來到空中問聲好！
小魚發落小艾這間青年旅社已經有八、九年的時間，這是一個重新連結家鄉、佮有熟識各種朋友的過程，咱來聽小魚講佇鹿港生活的趣味故事吧！

＊小艾人文背包客棧：https://www.facebook.com/smalleyebackpacker
＊茉莉人文環境教育中心：https://www.facebook.com/lukangmolly

聽眾朋友逐家好，這遍阿愷之聲邀請著是鹿港「貳貳」冊車的店主雅君來到現場！
雅君本來是三重埔人，轉來鹿港是阿爸阿母的故鄉，伊想欲用繪本來揣著厝內的滋味。

聽眾朋友，來聽雅君的故事吧！

＊貳貳 冊車：https://www.facebook.com/2erer2/
＊歸鹿：https://www.facebook.com/%E6%AD%B8%E9%B9%BFZine-104869241352335/

聽眾朋友逐家好，歡迎收聽阿愷之聲鹿港放送！
這遍邀請的來賓是萊兒費可唱片行的頭家John，伊來分享佇鹿港發落展覽的趣味故事，閣有一項予作偉大藝術家孵化中心的計畫！！

＊萊兒費可唱片：https://www.facebook.com/liarfakerecords、https://www.instagram.com/liarfakemusic/

聽眾朋友，這遍阿愷之聲邀請的來賓非常特別，就是台長我本人啦！
這陣仔我收集一寡聽眾朋友call in的問題，我欲佇空中沓沓仔來回答，請恁聽來～

＊聽眾會使繼續call in問問題：https://forms.gle/9KPzPg8SS44RBeAi7

聽眾朋友，歡迎收聽阿愷之聲！
這遍節目欲按阮鹿港來去仝款佇彰化境內的溪州鄉放送，這兩个開車時間毋免半點鐘的所在，講話的腔口竟然天差地！

「阮定定嫌對方怪調，無規氣來去podcast頂頭冤？」

濁水溪邊的溪州鄉，是阿倫的家鄉，也是陳昇的故鄉。
彰化本來就是一個族群多元（diversity）的所在，往過的人會用講話的腔口就來分辨你佮我。溪州人講話有腔，鹿港人講話嘛有腔，佗親像彼條愛耍笑的濁水溪，用一粒米飼百樣人。

廖阿倫是我熟似規落年的好友，這人真有才情，這遍邀請伊來節目懸頂對決臺語，冤冤合合，但是趣味趣味。用阿倫的話，這就是熱力學講的「熵（entropy）」，這款不穩定性正港是維持臺語繼續發展落去的原因，阮實在珍惜每一遍會使因為臺語來冤家的機會，因為冤家一直是彰化平原百年的傳統啊！

聽眾朋友，來聽阮鬥喙，但免煩惱，阮兩个猶原是好朋友啦！

聽眾朋友逐家好，歡迎收聽阿愷之聲鹿港放送！
這遍節目邀請的好朋友大鈞，伊佇鹿港「丟根」已經一年，這个外埔頭少年家對鹿港的歷史文化實在誠用心咧了解。本集節目，大鈞欲來佮逐家分享臺語的英國腔－「洛津話」！

＊「洛津」是往過鹿港文人予這個港鎮的雅名。

聽眾朋友，歡迎收聽阿愷之聲！
這集節目又閣邀請著我的溪州好朋友阿倫來到空中，但是阮無欲閣因為臺語腔口來冤家，這遍，欲來講「文學」

茶滾囉！阿倫準備來講幾本仔影響伊的「小說」！

本來無愛讀小說的阿倫，因為高中時熟識一位彰中的前輩，受著伊博學的刺激了後，開始拼生命讀米蘭昆德拉、杜斯妥也夫斯基佮有赫賽的冊。但是別人國家的文學按怎讀，就無臺灣文學讀起來的親，阿倫後來非常合意1970到1980年代的寫實主義（Realism）文學，一方面反映出的時代進步之下農村的真實，另外一方面，彼个時代社會的樸實佮土性，也是阿倫所向往的感情。

按世界文學到臺灣文學，小說帶予這位濁水溪少年各種熟識世界的方式，佇文學內底更加認同跤踏的這片土地。後一步，便是換家己來寫家鄉的文學。

聽眾朋友，來聽阮泡茶講小說，文學烏亂濺（tsuānn）！

阿倫推薦的冊｜

世界文學
1.經典作品：米蘭昆德拉《生命中不能承受之輕》、《笑忘書》（捷克）、杜斯妥也夫斯基《罪與罰》、《卡拉馬助夫兄弟們》（俄國）、赫曼赫賽《車輪下》（德國）
2.近代作品：阿蘭達蒂‧洛伊《微物之神》（印度）、金英夏《光之帝國》 （韓國）

臺灣文學
1.濁水溪文學：吳晟《吾鄉印象》、林雙不〈筍農林金樹〉、洪醒夫〈四叔〉、宋澤萊〈糶榖日記〉
2.寫實主義文學：陳映真〈鄉村的教師〉、〈山路〉、〈當紅星在七古林山區墜落〉
3.寫庄跤人的情感：蕭麗紅《千江有水千江月》、蔡素月《鹽田兒女》
4.當代作品：吳明益《睡眠的航線》、林奕含《房思琪的初戀樂園》
5.受著上大影響的作家：賴和

聽眾朋友，這遍阿愷之聲節目大升級，咱首先歡迎節目副主持人小楊！
今仔日邀請的來賓是鹿港輕文人工作室aka車埕才子施信呈，信呈本身的專業是工業設計，但細漢時佇角頭廟玉渠宮參與著整修工程，所以接觸著傳統彩繪，才有後來精彩的設計人生。

聽眾朋友，來聽這三个人練痟話吧！

＊輕文人工作室（@justforfun_angel）

聽眾朋友逐家好，歡迎收聽阿愷之聲鹿港放送！
這遍的副主持人是鹿港歌王aka寫書法的王柏仁，來賓猶原是頂一集的車埕才子aka會畫圖的施信呈。這遍欲來講的題目是「鹿港的字畫」，阿愷問出兩個題目：第一題，現子時有一寡對歷史文化有興趣的朋友來鹿港踅，請推薦一个所在有上精彩的「字畫」？第二題，若有機會坐Doraemon的時光機轉去1930年代的鹿港，想欲去佗位看看矣？

聽眾朋友，來聽一个畫圖佮一个寫字的答案吧！

聽眾朋友逐家好，台長時間欲來講古典音樂五四三！
古典音樂是啥？到底對一个按鹿港大漢的囡仔，是按怎理解彼个佇遙遠歐洲的傳統音樂？
古典音樂五四三，阿愷欲按我初初接觸音樂的國小時代講起。

＊節目音樂：Maurice Ravel - Sonatine (1905) - Pascal Rogé, piano 

聽眾朋友逐家好，歡迎收聽阿愷之聲鹿港放送！
這集再次歡迎學姊來到節目懸頂講料理、做料理，這遍阮欲來講「鹿港的口味」！

自高麗菜飯到豆油，學姊講起對厝內便菜飯的記憶，是按怎影響了後來伊的料理設計佮創作？
節目中，學姊甚至為小楊設計一項適合伊的菜，到底是啥咧？來聽！

＊佳生活實驗室（@ciaowonderlab）
＊ 有啥想法歡迎來講： https://open.firstory.me/story/ckv9h5olt1k8j0955by5evfes?m=comment

聽眾朋友逐家好，歡迎收聽阿愷之聲鹿港放送！
這集「做兵的人」是阿愷之聲死忠聽眾民雄曾小姐所點播的主題，節目邀請了阿愷的兩位陸軍學長：「萊兒費可唱片行」頭家John，和「鹿港溫昇豪」小魚，來分享彼段做兵的日子。

第一集先按新訓中心講起，到底新兵訓練中心攏咧創啥？這段按死老百姓變作阿兵哥的過程，來聽！

＊對這集的感想： https://open.firstory.me/story/ckvf88kah9ja808528kw347ln?m=comment

聽眾朋友逐家好，歡迎收聽阿愷之聲鹿港放送！
這集「鹿港的聲音」節目，邀請了「彰小孩」的創辦者郁敏和鹿港新聲閣的共同創辦人小楊來到空中，分享這兩年來佇鹿港的創新和試驗。

這兩个團體舊年頭一遍合作，透過田野調查的方式，將鹿港牛墟頭角頭的真人故事改編成作「我毋爾是一个刣雞的人」劇本，佇景靈宮廟口演出了後，得著各界熱烈迴響。

今年，兩個團隊再次合作，這遍來到鹿港西北邊的角頭「船仔頭」，想欲進一步用北管劇場的方式，改編漁村以早一件社會事件，用戲劇配著北管，成作一齣玄疑劇「彼一日，罩霧」。

趣味的合作，來自鹿港的聲音。阿愷之聲邀請各位朋友來看戲聽北管！

► 演出消息：彰小孩╳鹿港新聲閣2021年北管劇場新製作

❚ 首演場
✦ 「彼一日，罩霧」北管劇場
　▹ 時間：11月20日（六）暗時 7:30
　▹演出團體：彰小孩╳鹿港新聲閣
　▹演出地點：北頭漁椿（鹿港鎮郭厝巷32-1號）
　▹入場方式：低消飲料一杯

❚ 報名表單：https://forms.gle/48pu2MT9yDLEtqgU8
✦ 為維持演出品質，觀眾人數只開放20名，報名愛緊✦
✦ 舊年活動鬧熱回顧：https://youtu.be/JYKKIsK9z2Q

► 相片的故事｜2020年北管劇場「我毋爾是一个刣雞的人」aka 鹿港新聲閣復館三週年團慶演出
► 相片的作者｜施清元
► 配樂部支持｜鹿港新聲閣

聽眾朋友逐家好，台長時間又閣來囉！
「Rachmaninoff（拉赫曼尼諾夫）、遊藝黑白、山海山唱片行、彰中圖書館......」高中階段因為佇學業上的失志，續意外佇古典音樂揣著人生的意義，這集「古典音樂五四三」PART2，阿愷欲來分享古典音樂按怎改變我高中的人生觀。

＊背景音樂1：Sergei Rachmaninoff,Piano Concerto no.3, Byron Janis,London Symphony Orchestra,Antal Doráti（Mercury,1961）
＊背景音樂2：Chopin,Andante Spianato and Grande Polonaise in E-Flat Major,Op. 22, Dang Thai Son（Deutsche Grammophon,1981）
＊聽眾留話： https://open.firstory.me/story/ckw56aq4z199a0990cfmpoh97?m=comment

聽眾朋友逐家好，歡迎收聽阿愷之聲鹿港放送！
這集「做兵的人」是阿愷之聲死忠聽眾民雄曾小姐所點播的主題，節目邀請了阿愷的兩位陸軍學長：「萊兒費可唱片行」頭家John，和「鹿港溫昇豪」小魚，來分享彼段做兵的日子。

第二集，阮欲續落去講「落部隊」的生活，落部隊的故事更加精彩，來聽！

＊對這集的感想： https://open.firstory.me/story/ckwaq8vhrd7dw0969p293lsgn?m=comment

聽眾朋友逐家好，歡迎收聽阿愷之聲！
這集節目邀請一位重要貴賓「鹿港黑貓」來到空中，這是阿愷專工去菜市仔買一kauh潤餅，才有法度錄的一段開講訪問。

＊歡迎call in和台長講話： https://open.firstory.me/story/ckww7w09stxrr0894l0iik33e?m=comment

2021年最後一集節目，阿愷之聲邀請我的好朋友博盛aka兩个囝的阿爸來到空中，分享伊和囝講台語的故事。
博盛本身是一个軟體工程師，伊和太太作伙經營「台語家庭」，背後的理念和努力，是對囝滿滿的愛。

「用台語來看世界，用台語來理解世界」這是博盛對伊囝的期待，也送予2021年的各位。
2022新年快樂！

＊歡迎聽眾call in： https://open.firstory.me/story/ckxudzme82ru20997puc1h950?m=comment

2022年頭一集，阿愷之聲猶原推薦各位好聲音！
咱歡迎我的彰中學長aka法律家登凱學長，來分享伊收藏字畫的故事。

到底一蕊會曉欣賞字畫的目睭按怎養成？
這位日本京都大學的法律博士，竟然佇伊12歲，也就是國小六年的時陣就開始接觸收藏，故事就愛按登凱學長的故鄉員林，這个歷史悠久、族群豐富的環境來講起......。

＊推薦展覽：「毫末起雄風：1949渡海來臺​新本土書家展」2022年1月7號到1月22號，佇清華大學旺宏館（圖書館）
＊聽眾call in： https://open.firstory.me/story/cky77xlkgy1ws0858oz67h4o7?m=comment

歡迎收聽阿愷之聲台北放送！
這集節目邀請著台大城鄉所碩士班二年的鉦詠，分享伊對家鄉金山，透過社會行動、文學創作的理想追求！

＊工商服務時間：小坂溫泉 | Facebook
＊歡迎聽眾call in 留話： https://open.firstory.me/story/ckyhd031n31j80896595gjoc6?m=comment

聽眾朋友逐家好，歡迎收聽阿愷之聲竹崎放送！

這集節目，是因為一泡高山好茶的清芳來製作。
咱歡迎竹崎好厝邊、金獅村招牌、出水坑黑狗兄：嘉大茗茶劉嘉大先生來到空中，介紹竹崎好所在，閣有分享出水坑出好茶的故事。

「竹頭崎」早期是竹仔比人濟，後來居民漸漸改種茶米，受著天公伯的保庇，遮的氣溫、地理、茫霧等等的優勢條件，成就後來出名的「阿里山高山茶」。
「出水坑」是竹崎金獅村的一个庄頭，「劉」是庄內的大姓，劉家的開基祖佇三百年前循著水源頭來到遮開墾，劉嘉大先生接手了阿爸的茶園，是庄裏第一代製茶師，伊運用祖先留落來的基礎，用心種出感動人的好茶。

聽眾朋友，來聽嘉大的故事！
新的一年，咱來啉(lim)好茶，講好話，做好事，祝福各位！

＊工商服務：「嘉大茗茶」地址佇嘉義縣竹崎鄉和平村3鄰坑仔坪30之6號
＊facebook面冊：嘉大茗茶 | Facebook
＊歡迎聽眾朋友call in 留話： https://open.firstory.me/story/ckyr9kqst06oc08220y36oij0?m=comment

逐家好，歡迎收聽阿愷之聲做兵的人節目！
這集邀請著萊兒費可唱片的頭家John來做副主持人，阮欲作伙來訪問「鹿港排長」博盛，到底義務役排長的做兵故事生做按怎？來聽！

若閣予恁選一遍，欲做阿兵哥？阿是排長？
＊歡迎聽眾call in留話： https://open.firstory.me/story/ckyx569c44nhs0868fiz5l1cn?m=comment

聽眾朋友逐家好，歡迎收聽阿愷之聲初二節目！
這集節目重本製作，邀請著收藏家登凱和書法家柏仁，一个收藏家和一个寫字的，來講字畫背後的社會關係，到底寫字的人咧創啥？收字的人閣咧想啥咧？
來聽！

＊歡迎聽眾CALL IN留話： https://open.firstory.me/story/ckz51kr4bquyl0973iapew6tl?m=comment

聽眾朋友逐家好，歡迎收聽阿愷之聲南港放送！
這集節目再次邀請著臺大城鄉所的所學會長高鉦詠，來講到底城鄉所是咧創啥？閣有會長的新年向望。

＊臺大城鄉所的所學會面冊：國立臺灣大學建築與城鄉研究所學生會 | Facebook
＊聽眾Call in： https://open.firstory.me/story/ckz9z6vje0yvi0919b5zcumys?m=comment

聽眾朋友逐家好，歡迎收聽阿愷之聲台長時間「古典音樂五四三」！
Part3欲來分享阿愷大學時代聽的音樂，毋知是不是講著Mahler（馬勒）第三號交響曲的關係，節目不小心講了落落長。佇遮點半鐘的時間內，主要咧講一个初次出外來到高雄讀大學的鹿港囡仔，經歷各種的歡喜和鬱卒的時陣，古典音樂按怎成作一種心內的鼓勵？

彼款外國音樂，是按怎予一个臺灣人聽了有「感覺」？
可能感情這款物件是普遍性的，佇古典音樂內底會使聽著一位藝術家上真心的情緒，透過藝術作品看著別人的人生，也看著咱家己。

阿愷之聲想欲佇空中感謝以前捌鼓勵我、影響我聽音樂的前輩。
聽眾朋友，也希望佇恁的生命當中，定定有音樂來陪伴。

＊節目使用的音樂：
1.Beethoven Symphony No.1 mov.1/George Szell/The Cleveland Orchestra/1964,Epic
2.Beethoven Symphony No.5 mov.2/George Szell/The Cleveland Orchestra/1964,Epic
3.Brahms Symphony No.4 mov.1/Kurt Sandering/Staatskapelle Dresden/1990,Eurodisc
4.G.Mahler Symphony No.3 mov.6/Leonard Bernstein/New York Philharmonic/1989,DGG
5.R.Strauss Four Last Songs/Elisabeth Schwarzkopf/George Szell/Berlin Radio Symphony Orchestra/1966,EMI
6.R.Schumann Dichterliebe/Fritz Wunderlich/1966,DGG

＊歡迎聽眾call in留話： https://open.firstory.me/story/ckzhbkry706u509517tslgjib?m=comment

聽眾朋友逐家好，歡迎收聽阿愷之聲永靖放送！
這集節目咱邀請著彰化永靖少年鄭宇焱來到空中，這位往過佇台北讀法律系、參與社會運動的少年家，這陣子決定轉來家鄉認真生活，按城市到鄉土的過程，這位少年家有啥轉變？來聽宇焱呢講呢唱！

＊宇焱推薦的歌：農村武裝青年〈白鷺鷥〉
＊宇焱推薦的冊：赫曼赫賽《流浪者之歌（悉達多求道記）》
＊歡迎聽眾朋友call in留話： https://open.firstory.me/story/ckzo93dj30hff08658aasz4n8?m=comment

聽眾朋友逐家好，歡迎收聽阿愷之聲文學烏亂濺節目，這遍欲來講一本永靖的魔幻寫實，是陳思宏佇2019年完成的小說《鬼地方》！

「寫予故鄉，彼个不存在的永靖......。」

阿愷真歡喜再次邀請著咱懷念的溪州文學少年阿倫來做副主持人，永靖居民代表是準備欲來選議員的鄭宇焱，阮欲作伙按永靖的第一排透天厝，講到白宮、豆油工廠、永興游泳池、城腳媽、閣有國中彼个跳脫衣舞的同學後來開的雞排店......。

「地名原本是一種祝福，續變成詛咒，地名成真，靖，誠靜......。」

這本小說到底想欲表達啥？永靖真咧是鬼仔所在？
聽眾朋友，來聽這集文學烏亂濺，聽阮烏亂濺！

＊節目講的冊｜陳思宏《鬼地方》，2019年鏡文學出版https://www.books.com.tw/products/0010841455
＊歡迎聽眾朋友call in留話： https://open.firstory.me/story/ckzvanio21xwv0b00xc3d8l9c?m=comment

聽眾朋友，歡迎收聽阿愷之聲鹿港放送！
本台這間小廟這集邀請著一尊大佛「歐蘇（施清元）」來到空中，歐蘇的人生非常奇妙，是是按怎對一位考著臺大醫學院的「鹿港狀元」，到一位斜槓事業非常精彩，甚至出冊的攝影作家？也歡迎副主持人學姊，咱欲作伙來講歐蘇佇鹿港的生活！

＊贊助本節目： https://open.firstory.me/join/voiceofakai
＊歡迎聽眾朋友call in留話： https://open.firstory.me/story/cl0b5lbira5s60844lsuuanuo?m=comment

聽眾朋友逐家好，歡迎收聽阿愷之聲食點心時間！
這遍節目咱邀請著鹿港「蒔耘」的頭家布蘭琪來到空中，來分享伊用心製作的肉桂捲，阮準備呢食呢講布蘭琪「斜槓」做點心的故事！

＊蒔耘的instagram：蒔耘（@shiyunstudio）
＊蒔耘的面冊：蒔耘 | Facebook
＊歡迎寄附阿愷之聲： https://open.firstory.me/join/voiceofakai
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲文學烏亂濺！
這集欲來講一本年初（2022年）春山出版的新冊，是鍾永豐寫的《菊花如何夜行軍》！

「若是詩會當行到事件佮運動現場，按呢方式是啥？」－序（p.5/阿愷台文翻譯）

阿愷誠歡喜會使邀請兩位彰化子弟作伙來講冊，一位是逐家懷念的溪州少年阿倫，伊往過參與過社會運動，後來國立大學工科畢業了後，庄內的人按怎攏想無為啥伊欲轉來溪州生活，這位知識份子佇農村生活的礙虐（gāi-gioh），最近當咧透過寫小說來排解。

另外一位來賓，是秀水少年奕瑄（葉公），伊讀高中的時陣參加了校刊社，誠愛現實主義文學，但同个時陣伊也參與著地方的公共議題，續開始懷疑文學佇社會運動當中的位置？這款礙虐（gāi-gioh）予伊後來去到台北讀社工/社會學，想欲揣著家己面對事件會使做的方式。

阮三个準備欲按家己的背景、對社會的關懷、佮有對文學音樂的興趣，來和阿豐哥對話。

「會使有骨氣的來接受外來文化，對家己本地的文化生態閣袂感覺失氣，是這呢阿無簡單......。」－我的搖滾樂旅行（p.93/阿愷台文翻譯）

對阿豐哥，阮有个是按林生祥/交工樂隊知影伊，有个是按伊作台北市文化局長熟識伊。這本《菊花如何夜行軍》會使講是伊對家己過去創作路上的一段回顧，這位文學家、社會學家、愛音樂的人、做過官的農村子弟，冊內底實在有真濟故事，深深拍著阮咧心內咧想的代誌，所以阮準備用十足的氣力來講這本冊。

聽眾朋友，來聽這集文學烏亂濺，聽阮烏亂濺！

＊歡迎寄附阿愷之聲： https://open.firstory.me/join/voiceofakai
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲文學烏亂濺！
這遍欲來講的冊猶原是鍾永豐所寫的《菊花如何夜行軍》，這本今年（2022年）春山出版社的新冊，嘛是阿愷非常期待的一本冊。
節目來賓邀請著大中壢林生祥國際歌友會的總幹事阿霈，伊聽林生祥和鍾永豐所創作的歌，資歷至少十年起跳，這集節目阮準備深入討論這本冊背後的理念、音樂、閣有一寡意見。

好冊推薦予各位，來聽文學烏亂濺！

＊節目音樂：城鄉放送局樂隊cover交工樂隊〈風神125〉
＊歡迎寄附阿愷之聲： https://open.firstory.me/join/voiceofakai
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲點心時間！
這遍再次邀請雅君和小魚這兩位歪喙雞，來講一碗好食麵線糊決定性的瞬間！

＊雅君的冊店：貳貳 | Facebook
＊寄附本電台： https://open.firstory.me/join/voiceofakai
＊call in留話予阿愷之聲： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲文學烏亂濺！
本集節目首先愛感謝鏡文學的支持，予阮有冊會使濺。這遍欲來講的小說，是永靖出世、佇德國生活的作家陳思宏今年（2022年）上新的小說《樓上的好人》，也是伊「夏日三部曲」當中上落尾的一齣故事。

「熱天赤焰焰，電費已經逐欲納袂出來，阿母不准伊開電風，氣流佇無窗無光的小間房間內底翕（hip）死。房間內底無時鐘，厝內散到買袂起手錶，房間內底毋呢無光，連時間也嫌上熱，無願意入來。」－恢宏且壯闊（p.33/阿愷台文翻譯）

本集文學烏亂濺猶原邀請著咱彰南/溪州少年阿倫來到空中，但是欲講小說進前，阮欲來講「員林」是一個啥款的所在？

員林是誠濟「彰南人」少年時代心內的首都，佇遮想像家己的未來、彼個遙遠的世界。節目頂半段，阮準備對小說的幾個場景：百果山、黃金帝國、員林車站開始，來講這个「庄跤的城市」對彰南子弟的意義。

「三个囡仔攏感覺講，阿母的雙手有靈有神有鬼，十支指頭仔長長長，皮膚飽甜，指甲光彩閃爍，掌紋幼路，身在人間毋知天頂的雲摸起來的感覺，但是摸過阿母的手，頭殼內有飛上天的幻覺，瞬間予幼綿綿的雲霧來包圍......明明使用彼款上俗的洗頭粉，但是懶屍的頭皮，就親像旱地拄著溫暖的雨水，澹漉漉。」－員林1號男人（p.33/阿愷台文翻譯）

按《鬼仔所在》到《樓頂的好人》，陳思宏對庄跤永靖來到庄跤都市員林，最後飛去德國。想欲離開彼个使人袂喘氣的家族，來到一個無人熟識的所在，後來續發現永遠逃袂出去、彼个佇咱身軀內底的「家鄉」，到底家鄉是啥？

透過小說，阮最後欲轉來講家己彼个「庄跤的城市」，親像彰化市對鹿港阿愷、員林市對溪州阿倫，出外了後轉來看，這个所在對阮有啥意義。

聽眾朋友，恁心中的彼個「員林」佇佗？
推薦這本《樓上的好人》！

最後，咱祝福阿倫平安退伍！

＊推薦好冊：陳思宏《樓上的好人》
＊歡迎聽眾寄附本電台： https://open.firstory.me/join/voiceofakai
＊歡迎聽眾朋友call in 留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲台長時間！
阿愷之聲PODCAST講滿一週年囉，佇這集節目，台長欲來感謝一路以來所有支持本節目的人，包括現在當咧收聽的恁這群可愛的聽眾！
無恁，就無阿愷之聲，再次感謝勞力！

＊歡迎聽眾朋友寄附本電台： https://open.firstory.me/join/ckowqyem1p4lt08481nvounvr
＊歡迎留話call in恁對本節目的感想：https://open.firstory.me/user/ckowqyem1p4lt08481nvounvr/comments

聽眾朋友，阿愷之聲電台指定藥房「七星藥局」來啊！
阿愷之聲欲介紹恁好藥，本集節目邀請著民雄藥師「阿鎧」吳至鎧來到空中，阮欲來講大嘉義縣上媠的七星藥局，閤有轉來家鄉生活這件代誌！朋友，緊來聽！

＊七星藥局面冊：七星藥局 | Facebook
＊歡迎寄附本台： https://open.firstory.me/join/ckowqyem1p4lt08481nvounvr
＊歡迎留話call in阿愷之聲： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲鹿港放送！
講鹿港，說鹿港，鹿港說不盡！這集新單元，欲來講幾件鹿港的地方消息，包括捷運駛鹿港？！墓仔埔也敢停？！閣有一檔佇萊兒費可唱片行的展覽「剪刀石頭草」！
緊來聽。

＊萊兒費可唱片行面冊：萊兒費可唱片 | Facebook
＊《剪刀石頭草》看展報名：《剪刀 石頭 草》紀心儒作品展
＊歡迎聽眾朋友寄附本電台： https://open.firstory.me/join/ckowqyem1p4lt08481nvounvr
＊歡迎聽眾Call in留話： https://open.firstory.me/user/ckowqyem1p4lt08481nvounvr/comments

聽眾朋友，阿愷之聲台長時間臨時插播，欲來講最近發生一件奇怪的代誌。
來聽！

＊歡迎寄附支持本電台： https://open.firstory.me/join/ckowqyem1p4lt08481nvounvr
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲古典音樂五四三單元！
這集節目欲來講愛戀時陣聽的音樂，來聽百年前的音樂家，伊按怎將面對愛情時陣的心情，寫入去音樂內底，緊來聽！

＊節目音樂：

1. 蕭邦第二號鋼琴協奏曲，第二樂章慢板（Larghetto）
2. 布拉姆斯第三號鋼琴四重奏第三樂章慢板（Andante）
3. 布拉姆斯第二號大提琴奏鳴曲第二樂章慢板
4. 舒曼聯篇藝術歌曲《詩人之戀》第二首「按我的目屎裡開出真濟美麗的花蕊」
5. 舒伯特聯篇藝術歌曲《美麗的磨坊少女》第十九首「少年和河」

＊歡迎聽眾朋友寄附支持阿愷之聲： https://open.firstory.me/join/ckowqyem1p4lt08481nvounvr
＊歡迎聽眾朋友Call In留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲！
講鹿港，說鹿港，鹿港說不盡！五月節佇歷史上竟然是予鹿港再次偉大的節日，到底為啥？想著鹿港就想著古蹟，但是中山路拆厝竟然無稀罕？最後，咱的「所宅實驗室」滿一週年囉！

＊所宅面冊：所宅實驗室 | Facebook
＊歡迎聽眾朋友寄附支持本電台： https://open.firstory.me/join/ckowqyem1p4lt08481nvounvr
＊歡迎聽眾朋友留話CALL IN本電台： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲！這遍空中泡茶間節目，咱誠歡喜再次邀請著鹿港學姊，來回答聽眾朋友call in的問題。
總共收集了一百二十題，當中選出五條來回答：

1.最近去佗耍？
2.肉回愛食炊or糋？
3.鹿港麵線糊愛食佗一攤？
4.感覺家己是啥款的人？
5.理想的對象？

＊歡迎追蹤：佳生活實驗室（@ciaowonderlab）
＊歡迎寄附贊助本節目： https://open.firstory.me/join/ckowqyem1p4lt08481nvounvr
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

逐家好，歡迎收聽阿愷之聲鹿港放送，空中泡茶間節目！
這遍來賓，是彼个佇台北做設計的鹿港人總算放假轉來，歡迎施信呈來空中講五四三，副主持人是咱懷念的學姊，阮欲來update車埕和信呈的消息！

＊這集節目講的問題：
1. 最近車埕、玉渠宮有啥好耍無？
2. 這幾年各地真濟用「地方」來予名的藝術節、文化節，你咁捌參與過？咁有印象深的？印象歹的？
3. 鹿港肉回支持佗一攤？麵線糊愛食佗一攤？阿肉羹咧？
4. 來講這份作得欲一年的設計工作，到底咧做啥？咁有滿意？
5. 感覺家己是一个啥款的人？心內理想的對象？

＊鹿港車埕玉渠宮田都元帥：鹿港玉渠宮 田都元帥 | Facebook、鹿港玉渠宮（@yuchu7761120）
＊關於施信呈：施信呈 | Facebook、輕文人工作室（@justforfun_angel）
＊歡迎寄附支持本節目： https://open.firstory.me/join/ckowqyem1p4lt08481nvounvr
＊歡迎留話Call in本電台：https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲鹿港放送空中泡茶間單元！
這遍邀請的特別來賓，是「初學者手製品」的大頭家土豆人，來分享伊佇家鄉做freelancer（自由接案者）的人生，副主持人猶原是咱懷念的學姊，緊來聽阮講！

＊初學者手製品：初學者手製品 | Facebook
＊歡迎用行動寄附支持本電台： https://open.firstory.me/join/ckowqyem1p4lt08481nvounvr
＊歡迎Call In留話予阿愷之聲： https://open.firstory.me/user/ckowqyem1p4lt08481nvounvr/comments

逐家好，歡迎收聽阿愷之聲鹿港放送「空中泡茶間」單元！
這集節目邀請的來賓，是鹿港上媠(suí)的冊店「書集喜室」頭家aka鹿港萬人迷的黃志宏大哥，副主持人猶原是咱懷念的學姊，阮欲來節目講這間佇鹿港杉行街正式經營第九年的獨立冊店，一路以來的故事！

＊書集喜室面冊：書集喜室 | Facebook
＊歡迎贊助本節目： https://open.firstory.me/join/ckowqyem1p4lt08481nvounvr
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

感謝聽眾朋友支持，阿愷之聲五十集囉！
這集節目欲來回答聽眾朋友CALL IN的各種問題，阿愷之聲有法度行到今仔日，攏是因為恁這群可愛的聽眾，再次感謝！

聽眾朋友逐家好，歡迎收聽阿愷之聲空中泡茶間！
這集邀請的來賓是阿愷仔台大的學弟陳磬揚，這个高雄的少年家後來畢業了後竟然是來到阮彰化員林做軟體開發，而且是台語的軟體開發。

到底啥物款機緣予磬揚來到員林食頭路？伊閣會按怎看員林這个所在？
緊來聽節目！

＊歡迎支持本節目： https://open.firstory.me/join/ckowqyem1p4lt08481nvounvr
＊歡迎聽眾朋友Call In： https://open.firstory.me/user/ckowqyem1p4lt08481nvounvr/comments

講鹿港說鹿港，鹿港說不盡！聽眾朋友歡迎收聽阿愷之聲鹿港放送。

這集單元欲來講鹿港最近的代誌，首先是鹿港人為著七月時有創作一條普渡歌，到底按怎唱？
閣來的地方消息，欲來講彼條開大錢整修，續猶原有味的鹿港溪，到底是啥味？
最後欲來慶祝本台副主持人aka佳生活實驗室的學姊，八月初四生日快樂！

＊歡迎贊助本電台：https://open.firstory.me/join/ckowqyem1p4lt08481nvounvr
＊歡迎Call In留話： https://open.firstory.me/user/ckowqyem1p4lt08481nvounvr/comments

聽眾朋友逐家好，阿愷之聲空中泡茶間時間又閣來囉！
這遍節目出外景，來到這个和阿愷誠有緣的城市嘉義，邀請著好朋友「下港女子」來分享伊的freelancer（自由工作者）生活。
到底freelancer攏咧創啥？為啥有法度南北二路採訪寫文章兼食好料？

緊來聽節目！

＊下港面冊：下港女子 | Facebook
＊下港哎居：下港女子（@ekangwoman）
＊下港部落格：下港女子寫有路用的遊記 (ekangwoman.com)
＊歡迎聽眾朋友支持寄附本電台： https://open.firstory.me/user/ckowqyem1p4lt08481nvounvr
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲空中泡茶間單元！
這集節目咱繼續出外景，阿愷之聲來到嘉義縣鹿草鄉，訪問一位優秀青農aka阿愷非常敬佩的朋友「小胖」吳其融，伊對城市的社會運動轉來家鄉種花種草經營品牌，但是轉來家鄉作穡畢竟毋是一件簡單的代誌，來聽小胖的故事吧！

＊特別感謝：Ruralleaf 熱艸葉店 | Facebook、華順園藝、幕後咖啡 Coffee Behind The Scenes | Facebook
＊歡迎贊助寄附本電台： https://open.firstory.me/user/ckowqyem1p4lt08481nvounvr
＊歡迎call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，阿愷之聲「作兵的人」單元總算閣來阿！
這集節目特別來賓，是逐家懷念的聲音，咱溪州阿倫總算退伍囉！

「作兵」是這个國家特殊歷史背景產生的制度，也是普遍社會當中認為一个查埔囡仔變成查埔人的必要過程，但是，代誌咁真咧是按呢？

聽眾朋友，咱來聽阿倫講伊作兵的故事，這段改變伊人生方向的四個月旅途

＊歡迎寄附支持本電台： https://open.firstory.me/user/ckowqyem1p4lt08481nvounvr
＊歡迎聽眾朋友call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲鹿港放送！
這遍空中泡茶間單元，阿愷再次和咱懷念的副主持人佳生活實驗室 的學姊合作，阮來到鹿港車埕這個角頭，邀請的特別來賓是鹿港玉渠宮的兩位小法：施宛吟和施佳君姊妹仔。

若講鹿港是一个角頭（community）社會，彼句「三步一小廟，五步一大廟」的意思，就是鹿港的角頭有夠濟，每一个角頭內攏有誠密的社群關係，而且居民的生活中心定定就是角頭內的彼間廟。

「車埕」是鹿港市仔邊的一個角頭，這個角頭的角頭廟玉渠宮，主神是田都元帥。鹿港人咧講的「小法仔」就是佇神明邊服務的「助理」，誠有意思，到底神明助理的任務是啥？

宛吟和佳君的家族佇車埕已經住了幾落代，厝內大大小小若有閒攏會去玉渠宮鬥相共。這對姊妹仔是鹿港少數女性的小法，其中小妹佳君已經學法十五年，非常資深，這集節目阮準備欲來講這个鹿港傳統文化的鋩角，閣有這對姊妹仔的故事。

朋友啊，緊來聽車埕之聲，有聽有保庇！

＊鹿港玉渠宮：鹿港玉渠宮 田都元帥 | Facebook、鹿港玉渠宮（@yuchu7761120）
＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎call in留話： https://open.firstory.me/user/ckowqyem1p4lt08481nvounvr/comments

聽眾朋友，歡迎收聽阿愷之聲「講鹿港說鹿港，鹿港說不盡」單元！

鹿港有電台？龍山寺畫了了？粧佛上實在！
這集節目，阿愷欲來介紹鹿港上神秘的所在「中央廣播電台」，伊的過去佮未來。續落來，是鹿港這陣仔文化界討論上烈的「龍山寺彩繪修復」，到底逐家咧吵啥？為啥物龍山寺每一遍修復攏是地方的大代誌？最後藝文消息，欲來推薦一檔現在佇鹿港鶴棲別墅的展覽「神馳藝往－陳宗蔚粧佛工藝展」，這是少年粧佛工藝師陳宗蔚的第一場個人展，也是伊這幾年創立「錦輝軒」工作室的一個成績單，非常精彩！

鹿港故事講袂完，趕緊來聽！

＊歡迎寄附支持本節目： https://open.firstory.me/user/ckowqyem1p4lt08481nvounvr
＊歡迎call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲鹿港放送！

「講鹿港說鹿港，鹿港說不盡」這个單元實在受著真濟聽眾朋友的支持和愛護，因為台長對鹿港實在太有感情，所以三不五時就會做節目來討論這个所在，感謝恁對阮家鄉現子時發生的代誌攏這呢有興趣，更加歡迎各位朋友有閒來鹿港行行咧。

“一个外地人按怎看鹿港？”

這集節目阿愷特別邀請一位來賓，伊是我往過佇嘉義生活彼幾年熟識、也誠尊敬的朋友：陳世岸建築師，邀請這位嘉義人來到節目空中來分享伊對鹿港這个城鎮的觀察和看法。

“為啥這个嘉義人對鹿港有這呢深的感情？”

「鹿港」對陳世岸建築師來講有特別的意義，佇伊猶閣是一个大學建築系學生時，就定定來鹿港觀察遮的老厝、巷仔和聚落，會使講鹿港是影響伊後來建築思想上一个重要的所在。後來世岸老師長期關心嘉義的城市發展、文化資產保存和都市研究，伊用行動參與了家鄉各時期的變化，希望地方愈來愈好的心永遠袂變卦，這點予阿愷非常敬佩。

今年八月時，陳世岸建築師閣一遍騎著autobike－就親像大學時－來到鹿港。本集節目，世岸老師欲來分享這遍的旅行觀察，閣加上伊的嘉義經驗，阮欲來討論鹿港這十幾年來有啥變化？這个所在的過去、現在和未來的可能。

聽眾朋友，緊來聽嘉義人行過洛津！

＊陳世岸老師對嘉義的城市研究：ChiayiWiki – 走讀嘉義俱樂部
＊歡迎寄附支持本節目： https://open.firstory.me/user/ckowqyem1p4lt08481nvounvr
＊歡迎call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，阿愷之聲「文學烏亂濺」單元誠久無講囉！

這个單元固定的來賓是咱懷念的溪州阿倫，阮準備欲來講吳明益老師佇2007年出版的小說《睡眠的航線》。

這本冊是吳明益老師頭一本發表的長篇小說，內底會使看著創作者的野心：一方面想欲將過去臺灣參與二次世界大戰的歷史和家己的家族史來對話，另外一方面，作家也想欲透過這本小說來和伊的頂一代「和解」，所謂的頂一代，有可能是臺灣這片土地過去彼段“袂使講”的歷史、有可能是彼排消逝去的中華商場、有可能是伊家己的多桑......，但是欲和頂一代和解咁有遐簡單？

吳明益老師是阿愷心目中當代臺灣上有代表性的作家之一，伊較出名的作品有《天橋上的魔術師》（2011）、《複眼人》（2011）、《單車失竊記》（2015）等等。這本《睡眠的航線》是吳明益老師較早的作品，雖然講寫作的手路無親像《複眼人》和《單車失竊記》這呢飽水，但是這本是作者的「自傳性」作品，咱會使看著伊按怎面對家族的過去，真濟時陣，也親像咧看咱家己的故事。

這本小說有誠濟部分會使來討論，緊來聽阿愷和阿倫來濺文學！

＊睡眠的航線：博客來-睡眠的航線 (books.com.tw)
＊歡迎贊助寄附本節目： https://open.firstory.me/user/ckowqyem1p4lt08481nvounvr
＊歡迎call in留話予阿愷之聲： https://open.firstory.me/user/ckowqyem1p4lt08481nvounvr/comments

聽眾朋友逐家好，阿愷之聲台長時間來囉！
這集節目上半段，欲來回顧這十集節目咧講啥（EP51-59），下半段，欲來回答聽眾朋友call in的問題。總講一句，感謝聽眾朋友一路以來支持阿愷之聲，無恁就無阿愷之聲！

【問題】
1.阿愷攏按怎揣題材？是啥支持著持續做？ 按怎保持熱情？咁袂懶？懶囉欲按怎？
2.希望未來閣有機會聽阿愷講音樂！
3.佮意「文學烏亂濺」單元，希望未來會使較濟咧。
4.鹿港目前咁閣有人咧收集鹿港腔、推廣鹿港腔？
5.印象中阿愷之聲是兼咧做的，想欲知影工課和興趣按怎取得balance？

＊支持寄附本節目： https://open.firstory.me/user/ckowqyem1p4lt08481nvounvr
＊歡迎call in留話本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「講鹿港說鹿港，鹿港說不盡」單元！
本集節目邀請阿愷仔臺大城鄉所的學長aka自細漢就住佇鹿港大（天）街（龍）頂（國）的陳永軒，阮想欲用都市規劃（urban planning）的角度，帶恁轉去鹿港的十八世紀，到底十八世紀的鹿港生作啥款？

聽講，鹿港真正有一條「港溝」？以前南北二路的生意人攏對「六路頭」來？百年前鹿港就有「自辦重劃」？「屎巷」有味？鹿港逐條巷仔攏通「龍山寺」？
鹿港會使講是臺灣人共同的原鄉，這个所在有百年前先人生活的模樣，佇當代也一直咧面對現代發展和文化保存的問題。面對過去思考未來，到底臺灣文化是啥？咱又閣是誰？無的確，各位會使佇鹿港揣著答案！

聽眾朋友，緊來綴著金盛巷的貓仔轉去十八世紀！

＊歡迎寄附支持本節目： https://open.firstory.me/user/ckowqyem1p4lt08481nvounvr
＊歡迎留話call in 本節目： https://open.firstory.me/user/ckowqyem1p4lt08481nvounvr/comments

恁閣會記著今年10/10 ＃日本京都橘高校 來臺灣青春精彩的演出無？ 後來逐家攏咧討論為啥日本學校遮厲害？咁講外國月娘較圓？

是的！這集「空中泡茶間」單元欲來講音樂！到底啥物是 ＃上低音號？＃英式銅管樂團？＃MarchingBand？

阿愷之聲非常歡喜，這集節目會使邀請著這位出國提金牌的臺灣之光、英雄少年的上低音號演奏家aka彰化鄉親的 ＃楊宇翰 老師來分享伊的音樂人生。其實宇翰老師正港是臺灣土產栽培出來的優秀音樂家，後來有機會去英國伯明罕音樂院深造（Royal Birmingham Conservatoire），也經歷過日本和美國的樂隊訓練，宇翰老師除了誠愛音樂，也真照起工練習，佇國外看了各種風景了後，伊也開始思考家己會當為臺灣的音樂教育做一寡努力。

「只要有心，人人攏是食神！」雖然是彼齣電影咧講，但是只要有正確的態度，咱要相信家己的可能。

這集節目中，阮欲來討論臺灣和外國音樂環境的差別，上重要的，節目有非常好聽的音樂，聽眾朋友趕緊來聽！

＊楊宇翰老師的youtube：漢斯&哈娜 / YuHana - YouTube
＊歡迎寄附支持本節目： https://open.firstory.me/user/ckowqyem1p4lt08481nvounvr
＊歡迎call in留話： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲全新單元「洛津浪音樂」

這个專門講音樂的全新單元，頭一集欲來分享一張非常經典的Jazz專輯《Kind of Blue》，這張專輯也是台長頭一張煞著的Jazz專輯，遮音樂到底有偌傳奇？

等咧，本來毋是攏咧講古典音樂，為啥這遍欲來講Jazz？

咱的台長阿愷前一陣子可能予雷摃著，變成痟愛聽Jazz，節目一開始就欲來比較欣賞古典音樂和Jazz這兩類音樂的鋩角，到底音樂按怎聽較趣味？喔！這集節目上重要的，是欲分享這張Jazz祖師爺Miles Davis 1959年佇美國Colombia唱片公司發行的專輯《Kind of Blue》，這張專輯到今仔日來聽攏猶原誠經典，也是目前Jazz歷史上可能賣了上好、影響力上大的一張專輯，咱就透過這張唱片來講一段Jazz和黑人音樂家佇美國的故事！

無汝是欲按怎（So What）？咱就按這條曲來開始熟識Jazz世界！
聽眾朋友，緊來聽阿愷之聲講音樂！

＊節目使用的音樂是美國COLUMBIA唱片公司佇1959年發行，Miles Davis的經典專輯《Kind of Blue》中的第一首〈So What〉
＊歡迎追蹤阿愷台長的爵士樂評：洛津浪音樂（@loktinlangimgak）
＊歡迎贊助寄附本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，本集阿愷之聲「文學烏亂濺」單元欲來講一本報導文學，是電影導演是枝裕和早期的作品《雲沒有回答：高級官僚的生與死》。

是枝裕和變成國際知名導演進前，伊佇電視公司咧做記者，1991年的時候予公司派去拍一支紀錄片，彼當時有一位政府高層幕僚自殺的新聞鬧了誠大。悲劇的主角名叫做山內豐德，伊本來佇政府的社會褔利單位厚生省服務，當時接手處理當時日本國內上嚴重的環境公害「水俁病」，報紙媒體攏講伊因為壓力傷大所以自殺。

是枝裕和調查過程發現代誌無這呢單純，伊透過收集山內豐德少年時代的詩文創作和一位公務人員的家庭生活，想欲來理解為啥這个五十三歲的生命最後走往自殺這途？咱會使對這本冊看著一位大導演早期的社會關懷，是枝裕和想欲問的是：「明明一个嚮往單純的人，為啥後來佇官僚制度內底輸去？」

本集節目，阿愷仝款邀請著我的好朋友來講冊，這位朋友的背景是一位社會工作者（社工），名叫做奕瑄。奕瑄高中的時陣做過校刊社社長，同時參加社會運動，後來大學讀的是社會工作專業，伊對社會學、心理學和哲學攏誠有興趣，也定定用無仝款的角度反省家己的專業，真歡喜這集節目會使邀請奕瑄來講這本冊。

聽眾朋友來聽阮濺文學，來講這本精彩的報導文學！

＊講毋對歹勢：主持人一直將「山內豐德」講成「內山豐德」
＊來買冊：博客來-雲沒有回答：高級官僚的生與死
＊歡迎贊助寄附本節目： https://open.firstory.me/user/ckowqyem1p4lt08481nvounvr
＊歡迎call in留話予本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲！
這集「空中泡茶間」咱正港來到好茶的產區：嘉義縣竹崎鄉，邀請的特別來賓，是聽眾朋友懷念的「嘉大茗茶」茶主劉嘉大先生。

阿里山高山茶世界有名，但是恁對茶有偌濟瞭解？
本集節目，咱邀請著這位茶米的博士博，阿愷想欲來請教到底「烏龍茶」的特色是啥？咱講的「高山氣」是啥？最近誠流行的「紅烏龍」、「阿里山紅茶」又閣是啥？

朋友啊，這水的冬仔茶有夠清芳，後韻十足。
緊來聽咱竹崎金城武的聲音，瞭解臺灣高山茶區的故事！

＊節目音樂｜鹿港新聲閣、蔡小虎的歌聲「愛人醉落去」
＊工商服務｜嘉大茗茶：嘉義縣竹崎鄉和平村3鄰坑仔坪30之6號

＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎call in留話本節目： https://open.firstory.me/user/ckowqyem1p4lt08481nvounvr/comments

聽眾朋友歡迎收聽阿愷之聲鹿港放送！
本集「空中泡茶間」咱再次歡迎鹿港學姊，不知不覺一年也欲結束囉，年底是一个送禮物感恩身軀邊重要朋友的時陣，阮欲來講家己送禮物的離奇經驗，閣有送禮的學問！
緊來收聽！

＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲空中泡茶間單元！

這集的特別來賓是回鄉選舉的永靖子弟鄭宇焱，這也是宇焱佇縣議員選舉完了後頭一遍接受PODCAST訪問，算是本台「獨家」！

選舉的結果雖然不如意，但是咱的鄉親朋友實在有影支持，宇焱頭一遍選就得了七千票（員林/永靖/大村）。這段期間佇地方的經營，也予宇焱看著故鄉風景的另外一面，誠濟有意思的故事，阮準備佇這集節目好好阿講！聽眾朋友，緊來聽本台獨家！

＊來追蹤鄭宇焱：https://www.facebook.com/yuyenchanghua
＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎聽眾朋友call in： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲空中泡茶間！

「鹿港龍山寺是頭一遍用這款方式來做彩繪修復，有伊的意義。阮這馬做的修復，無論是對的抑是毋對，攏愛詳細紀錄落來，這是為著欲留予未來的人繼續來思考。」 － 修復師 吳慶泰

這集來到空中泡茶的特別來賓，是阿愷這陣子佇鹿港龍山寺熟識的彩繪修復師 #吳慶泰 ，以前咱只知影修復師攏佇鷹架頂惦惦仔咧無閒，但是修復師到底是咧無閒啥？本集節目想欲問予清楚。

吳慶泰老師出世佇茄萣一个討海家庭中，捌做過景觀設計的工作，後來意外走往古蹟修復師這條路（目前是國立科學工藝博物館蒐藏研究組助理研究員）。幾十年的修復經驗，發落過幾落間古蹟和歷史建築，鹿港龍山寺這間臺灣重要的廟宇，吳慶泰老師講：「遮，是所有修復師攏想欲來挑戰家己的所在。」

到底一位修復師是按怎養成？古蹟修復是咧修復啥？
修復到底是要「修舊如新」？抑是「修舊如舊」？
面對鹿港龍山寺彩繪修復的各種意見，一位修復師按怎想？

這集阿愷之聲空中泡茶間有影精采，有興趣的朋友緊來飲茶！

＊歡迎支持本節目： https://open.firstory.me/user/ckowqyem1p4lt08481nvounvr
＊歡迎call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲講鹿港說鹿港鹿港說不盡單元！
這集欲來講鹿港的啥物？就是臺語界的英國腔： 鹿港腔！

本集的特別來賓是全世界第一个佇instagram介紹鹿港腔的頻道「洛津粟鳥仔｜鹿港腔小教室」的創辦人徐培哲，伊竟然和阿愷有小可仔親戚關係，阮的長輩攏有鹿港的船仔頭人。

「現在臺語運動已經無簡單將臺語標準化，但是閣無法度顧慮這款語言其他無仝款的腔調，親像咱厝內咧講的鹿港腔......。」

徐培哲開始將鹿港腔揣轉來，其實愛到伊讀大學了後，伊發現家己的英語竟然講了比臺語閣較好，所以就一步一步和厝內的序大開講、參與學校臺語社、甚至家己做影片創頻道介紹鹿港腔，用系統性的方式來建立對這款腔調的熟識，本集節目就欲邀請伊來分享這段將母語講轉來的故事！

聽眾朋友，歡迎收聽本集節目，來聽滿滿的鹿港腔！

＊歡迎追蹤：洛津粟鳥仔丨鹿港腔小教室（@lok_tin_sparrow）• Instagram
＊歡迎支持本節目： https://open.firstory.me/user/ckowqyem1p4lt08481nvounvr
＊歡迎call in本節目： https://open.firstory.me/user/ckowqyem1p4lt08481nvounvr/comments

「偷挽蔥，嫁好翁！？」
「軁燈跤，生卵葩？！」

各位阿愷之聲的聽眾朋友新年快樂！
這集「空中泡茶間」單元欲來介紹舊曆過年佇鹿港一个趣味的活動：2023鹿港玉渠宮上元節躦燈腳聽

節目來賓是鹿港車埕在地人aka新銳設計師施信呈，一開始想欲佇家己的角頭內（community）鹿港玉渠宮辦燈節，是因為懷念以早正月十五元宵節暗時，阿嬤攏會帶逐家迎鼓仔燈行去龍山寺的彼種氣氛。如今玉渠宮燈會已經來到第三年，今年的燈會比起以前更加大場，首先，恁會看著廟裡有一隻大.鯉.魚！

「正月十五，鹿港車埕泅來一隻鯉魚王！」

這遍鹿港玉渠宮「躦燈腳」的活動誠有意思，一方面這活動是社區內底大大細細作伙辦的活動，充滿人情味；另外一方面是燈會期間除了會使來車埕欣賞鼓仔燈，閣會使來「求燈」，這遍有囍燈、求子燈、賜福燈、圓滿燈、財利燈、梨明燈六種燈會使求，咱只要將家己對今年的期望講予田都元帥聽，攏有機會得著保庇！

燈會的「點燈儀式」會佇二月五號（舊曆正月十四）暗時七點來舉辦，這暝除了會使來求燈以外，閣有傳統南管加上表演藝術的點燈儀式，逐家會使看完點燈儀式，迎了求著的鼓仔燈作伙行來去龍山寺散步。

聽眾朋友，今年元宵欲來鹿港玉渠宮求燈無？
本集節目閣有佳生活實驗室的學姊共同主持，緊來收聽！

＊「躦燈腳」活動請看鹿港玉渠宮：鹿港玉渠宮（@yuchu7761120）
＊歡迎支持寄附本節目： https://open.firstory.me/user/ckowqyem1p4lt08481nvounvr
＊歡迎聽眾朋友call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，這集阿愷之聲「空中泡茶間」單元邀請特別來賓學姊，欲作伙來討論這陣仔誠紅的日劇《初戀》，緊來聽！

＊歡迎支持寄附本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

阿愷之聲台長時間，感謝一路以來支持本台的節目來賓閣有聽眾朋友，這集節目欲來做一个回顧！
另外有工商服務時間，感謝蠻野講堂邀請，阿愷之聲準備佇2023年2月25號拜六下晡兩點，佇鹿港中山路102號（台灣白海豚媽祖宮）有一場講座aka聽友會，歡迎朋友來支持！

＊2/25蠻野講堂報名：https://neti.cc/JXPbLlY
＊歡迎贊助支持本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「文學烏亂濺」單元！
這集節目再次邀請咱的好朋友溪州阿倫來講冊，這本冊是2022年底土地的聲音 開學文化出版的散文集《今夜大雪紛飛》，作家是員林人江逸蹤 ，也是阿愷的彰中學長。

”少年時咱攏期待落雪，無想著一落就是一場大雪......。“

這本《今夜大雪紛飛》會使看著作者一路對員林、彰化高中到台北這款大都市生活的故事，文字非常誠懇，讀起來感動。冊本身寫作的形式是「散文」，所以一開始阮會討論散文這款文體按怎讀出感覺。續落去，欲來講對作者意義重大的高中生活，閣有伊成長的家鄉彰化，是按怎影響一个人的一生。

最後，到底「雪」的意義是啥？
這集節目，阮欲順著作者的文字轉去十七歲的高中生活，去揣彼場青春的大雪。
聽眾朋友，緊來收聽，順勢來看這本感動人的冊！

＊江逸蹤－今夜大雪紛飛：博客來-今夜大雪紛飛 (books.com.tw)
＊歡迎寄附支持本節目： https://open.firstory.me/user/ckowqyem1p4lt08481nvounvr
＊歡迎call in留話本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「文學烏亂濺」單元！

​這集節目是本台頭一遍邀請著作者本人來講冊，冊是2022年開學文化出版的散文集《今夜大雪紛飛》，作家是阿愷彰化高中的學長江逸蹤，來節目分享創作背後的故事。

”彰化高中的彼場大雪？！“

節目一開始，想欲問作者「彰化」按怎影響寫作？散文一開始對彰化高中的304教室講起，後來隨著作者經歷大學、研究所，最後來到台北的高中教冊，到底啥物款的原因予逸蹤學長繼續創作？閣有為啥是寫「散文」？散文按怎處理了咱家己的人生？

”若有機會轉去向高中時代的家己講一句話，你會講啥？“

這集節目非常難得，也誠精彩，聽眾朋友緊來收聽！

＊買冊｜今夜大雪紛飛：博客來-今夜大雪紛飛 (books.com.tw)
＊歡迎寄附支持本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，這集空中泡茶間單元歡迎阿愷之聲佇鹿港的PODCAST同業「萊兒費可電台」主持人aka頭家John！
阮欲來講為啥想欲做podcast？做到這馬的感想？捌收過啥物難忘的聽眾feedback？這集是大鹿港PODCASTER大會師！

＊歡迎來聽萊兒費可電台：萊兒費可唱片 | Lukang | Facebook、萊兒費可唱片（@liarfakemusic）• Instagram
＊歡迎支持寄附阿愷之聲： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲的音樂單元「洛津浪音樂」！

這集浪音樂誠歡喜邀請著「裝咖人」樂團主唱兼團長張嘉祥，來講創作《夜官巡場》專輯和小說進前，影響伊上深的音樂專輯、文學作品是啥？閣有伊創作的原鄉「民雄鄉火燒庄」是一个啥物款的所在？

《夜官巡場》專輯是這陣子臺灣獨立音樂界討論度誠高的一張音樂作品，這張專輯巧妙結合了ROCK和傳統北管，閣有用臺文創作農村的魔幻故事，甚至佇舊年2022年入圍金曲獎最佳新人獎，正港無簡單。嘉祥佇民雄的成長經驗是《夜官巡場》這張專輯重要的靈感養分，伊將故事另外寫成一本同名的小說，非常有意思。

聽眾朋友緊來收聽本集洛津浪音樂！來聽這位農村文藝青年的故事。
最後莫袂記著佇各大串流平台（甚至買專輯）聽裝咖人的《夜官巡場》，有影讚！

＊來聽：裝咖人 | Facebook
＊歡迎支持寄附阿愷之聲： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

咁一定要按呢？（Muss es sein？）」

聽眾朋友逐家好，歡迎收聽阿愷之聲「文學烏亂濺」單元！

這集節目邀請著我的彰化好朋友溪州阿倫和秀水奕瑄，阮欲作伙來討論捷克作家米蘭昆德拉的經典小說《生命中不能承受之輕》。這本小說佇1984年來完成，彼當陣米蘭昆德拉已經流亡法國，伊流亡的原因就是這本小說設定的時代背景：1968年的「布拉格之春」事件。

《生命中不能承受之輕》是一本用哲學來包裝的小說，親像「永劫回歸」、「輕佮重」這款觀念，遮是米蘭昆德拉用來寫冊內面四个主要角色的故事基礎。這本小說有法度這呢經典，就是米蘭昆德拉將一个複雜時代內底，上歹看予清的人性寫到有血有肉，任何人讀了攏會起雞母皮，而且無論什麼年紀倒轉來看，攏會使看出新的感想。

為著這集節目，阿愷和兩位特別來賓阿倫和奕瑄決定重新看一遍小說，阮欲來分享這遍看完有啥新的感想和看法！

聽眾朋友，希望恁用一種“輕”的心情，來聽這集小可仔“重”的文學烏亂濺！

＊節目音樂：Beethoven String Quartet No. 16 in F Major, Op. 135 IV
＊歡迎贊助阿愷之聲：https://voiceofakai.oen.tw/

聽眾朋友逐家好！歡迎收聽阿愷之聲特別節目「阿里山放送」，本節目感謝 國家科學及技術委員會（國科會）計畫支持播出，續落來會為恁放送阿里山茶農尚青的聲音！

「今年攏無落雨，春仔茶欲按怎？」

現子時佇大阿里山茶區，有一个研究團隊當咧研究氣候變遷對整體高山茶產業的影響，這是國科會計畫支持、臺灣大學 和中央研究院聯合組織的研究團隊，團隊內底的專業背景包括自然地理、大氣科學、生物多樣性、茶葉研究和人文地理，如此才會使瞭解大阿里山茶區豐富的面向。

這个阿里山放送的特別單元是團隊中人文地理部門的PODCAST計畫，阮實際來到茶園直接和茶農請教，用聲音紀錄臺灣高山茶的故事。

「啉茶會當做田野？」

阿里山放送的頭一集節目，誠歡喜邀請了人文地理學家aka臺灣大學地理與環境資源學系的洪伯邑 教授來介紹這个研究計畫，到底人文地理學家會按怎看大自然的氣候變遷？阿里山茶有啥好研究？來到茶園的地理學家到底看著啥？

聽眾朋友，緊來收聽本節目！
也歡迎繼續追蹤阿里山放送，未來會帶各位來去無仝款的高山茶區聽茶農的故事。

相關報導｜
報導者：在雲霧中尋找未來──氣候暖化下，阿里山高山茶的存續問題
https://www.twreporter.org/a/climate-change-and-cloud-forests-alishan-high-mountain-tea

節目音樂｜鹿港新聲閣 鬧熱演奏

＊歡迎支持寄附本節目： https://open.firstory.me/user/ckowqyem1p4lt08481nvounvr
＊歡迎call in留話本節目： https://open.firstory.me/user/ckowqyem1p4lt08481nvounvr/comments

聽眾朋友逐家好！歡迎收聽阿愷之聲特別節目「阿里山放送」，這个單元感謝 國家科學及技術委員會（國科會）計畫支持播出，第二集咱準備來去竹崎鄉金獅村的出水坑啉茶！

「百年前祖先循著水上山，百年後出水坑就出好茶！」

咱講的「阿里山茶」其實包括竹崎、梅山、番路等山區鄉鎮，竹崎的「出水坑」這个地號名一看就和水有關係。百年前劉家循著水源來遮發展，一開始攏靠做竹仔的相關加工來賺食，後來臺灣茶開始往高山來種，1980年代「高山茶」變成山區農業重要的經濟作物，劉嘉大就是庄內頭一代茶農，伊的一生攏和茶有關係。

本集節目誠歡喜邀請 嘉大茗茶 的負責人劉嘉大先生，來講家族佇山頂種茶的故事！

「種茶的工作離袂開水，茶成長要水，人啉茶也要水。」

講著種茶，「水」一直是茶農上致意的物件，茶要雨水才會成長，雨水若無夠，茶農的心就鬱卒，茶採收了後就要「走水」，水走了好，茶才會芳、才會好啉。農一年四季攏咧發落水和茶的關係，所以和水相關的俗語也非常濟（多），但是天公伯若無落雨，遮代誌就大條囉。

本集節目錄音的時間是三月二十六號，這工阿里山頂總算落雨囉，這是今年春天以來頭一場雨。臺大團隊和阿愷之聲第一時間來到茶園，阮準備來訪問第一線茶農的心聲！

＊客座主持：洪伯邑（臺大地理系教授）
＊背景音樂：鹿港新聲閣
＊工商服務時間：嘉大茗茶 | Facebook
＊歡迎支持阿愷之聲： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好！歡迎收聽阿愷之聲特別節目「阿里山放送」，這个單元感謝國科會計畫支持播出，第三集阮準備來去梅山鄉的世外桃源「太和村」來啉茶！

「太和村是八八風災（莫拉克風災）的重災區，阮受困佇遮足足二十八天，重建的過程誠感謝有藝術家來幫忙，太和的茶有了轉型的可能。」

梅山鄉太和村是臺大團隊所有合作的阿里山茶農內底，上深山林內的所在，這个所在無啥觀光客，庄內的人攏誠打拼種茶，會使講是一个世外桃源。但太和村是莫拉克風災（2009/8/8）的重災區，面對著「做大水」的風險，後來社區重建的過程當中，過去來駐村的藝術家轉來幫忙，予太和村的茶產業有了轉型的可能，包括家家戶戶厝內起造一个啉茶的空間「 茶屋（Tea House）」、甚至是村民之間開始交流學做紅茶來開發新產品等......。

本集節目的特別來賓是太和村的媳婦 楊麗芳，也是 「兒茶事」品牌的主理人，阮準備欲來講太和茶村的故事。

「前年的春天傷慢落雨，我的茶園攏歉收，老實講我嫁入來了後，也感覺著氣候不正常發生的機率比以前更加明顯。」

無論是做大水，抑是落無水，太和村的茶農一直咧面對大自然氣候的「袂暗算」，但是茶農咁只有會當「順天」？往過面對做大水時，太和村有了社區團結和產業轉型的機會，但這幾年面對熱天強降雨，抑是春天無落雨，茶農的挑戰是愈來愈大。本集節目阿愷之聲和臺大團隊來到茶園的現場，欲來請教茶農按怎看氣候變遷這个挑戰。
本集節目，來聽太和村茶農楊麗芳講在地的故事！

＊工商服務時間：兒茶事（佇楓康超市攏有咧賣）
＊客座主持：洪伯邑（臺大地理系教授）
＊背景音樂：鹿港新聲閣
＊歡迎支持贊助本節目： https://open.firstory.me/user/ckowqyem1p4lt08481nvounvr
＊歡迎留言call in本節目： https://open.firstory.me/user/ckowqyem1p4lt08481nvounvr/comments

「面對他人生命的苦難，定定有不足的感覺，毋呢是一个永遠的事實，也是倫理上必要的情緒......人，是欲按怎對他人的受苦無要無緊？人，又閣按怎無發覺講其實自我的愛戀？若是目睭闔闔，耳仔遮咧，轉去看世間的苦難，欲呢欸無變成他人的地獄？」－《受苦的倒影》第二現場 無憂無愁無懼（阿愷之聲台文改編）

聽眾朋友逐家好，歡迎收聽阿愷之聲「文學烏亂濺」單元！

本集節目感謝春山出版的支持贊助，阿愷特別邀請我的好朋友、也是最近考著社工師證照的奕瑄，阮欲作伙來讀魏明毅新冊《受苦的倒影：一個苦難工作者的田野備忘錄》。

這本冊的作者魏明毅，本身有心理諮商和人類學的專業背景，逐家可能捌讀過2016年伊改寫清大人類所碩士論文的冊《靜寂工人：碼頭的日與夜》，這本冊一直到今仔日攏閣有誠濟討論，內底咧關心的是國際政治經濟按怎影響當代基隆碼頭工人的情感生活，對一個大的環境結構，來理解為啥基隆是臺灣一个自殺機率這呢懸的所在？

魏明毅當時是因為佇諮商工作上拄著親像「每一年攏有新的專業者進入助人工作職場，但為啥行入來諮商室需要幫助的人續無減少？」的疑問，後來轉來學院透過人類學的角度來思考「咱住佇啥款的環境？為啥人會受苦？」的問題，但是作者猶袂無講的是，伊本身的專業「助人工作者（苦難工作者）」面對著的閣是啥款的狀況？這份對人類社會的關懷，按怎帶入去伊的工作實作？

七年了後，咱總算等著魏明毅的新冊《受苦的倒影》，這本冊作者帶咱來到伊的工作現場，透過伊的工作備忘錄來瞭解對助人專業的反省和思考。

本集節目的特別來賓奕瑄做社會工作無到一年，到底一个新人會按怎看這本資深工作者的田野備忘錄？
聽眾朋友，歡迎收聽這集的文學烏亂濺！

＊作伙來看冊：https://www.books.com.tw/products/0010950507
＊歡迎贊助支持阿愷之聲： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好！歡迎收聽阿愷之聲特別節目「阿里山放送」，這个單元感謝國科會計畫支持播出，第四集阮繼續來到梅山鄉太和村的「牛伯茶塢」啉茶！

「聽講，梅山太和村的路邊有一粒金瓜？！」

每一遍駛車行過梅山鄉太和村的主要幹道162甲的時陣，定定看著一粒親像「金瓜」的建築物，其實這粒金瓜內底佈置了誠舒適：有天然造型的柴桌仔、線編的椅仔、閣有手工做的瓷仔杯，遮是一个啉茶的好所在，時不時歡迎逐家來坐。

這間 茶屋 主人家是太和村的老先覺aka藝術家 牛伯（鍾少博），牛伯是太和村第一代的茶農，伊歸身軀攏是茶米的智識，對地方的過去和未來發展也攏非常致意。若講著地方發展，就要講著彼年做大水：莫拉克風颱（八八風災）對太和村的改變。

2009年莫拉克風颱造成太和村非常嚴重的損害，但後來災區重建的過程中，來太和村幫忙的藝術家、大學教授和村民討論，提出「一家一茶屋（tea house）」的建議，予外地人會使來太和村的茶屋啉茶，會使講做大水也意外造成太和村的產業轉型。

牛伯也是佇彼个時陣家己起造了這間造型特殊的茶屋，運用伊一生會曉的功夫，對起厝、水電、家具、閣有泡茶工具攏總家己來，伊的退休人生逐工攏佇遮泡茶招待好朋友。

「無水，就要去抾（khioh）水來！」

無論是種茶，抑是產業轉型來做觀光，「水」永遠攏是上重要的資源。當初太和村民為著欲有穩定的生活用水，和公部門合作對阿里山深山牽一條欲三十公里的水路，村民成立水資源委員會來協調水源的分配一直到今仔日。

住佇平地的咱每一工只要將水龍頭拍開就有水通用，所以可能誠歹想像講山頂的農民三不五時攏要煩惱無水。加上這幾年氣候變遷，落雨的狀況愈來愈無照甲子行（照節氣），對阿里山的茶農來講，伊閣會按怎想辦法？

聽眾朋友，來聽太和老先覺牛伯的故事吧！
有閒，也會使來牛伯茶塢啉茶！

＊工商服務時間：牛伯茶塢 https://goo.gl/maps/aNYBVuVufje9RxW99
＊歡迎支持阿愷之聲： https://open.firstory.me/user/ckowqyem1p4lt08481nvounvr
＊歡迎call in留話本節目： https://open.firstory.me/user/ckowqyem1p4lt08481nvounvr/comments

「濛霧的時代，咱是目睭金金咧看的存活者，一旦開始深入理解，而且進一步來問：佇家己和別人的苦難內底，咱欲行去佗？濛霧因為按呢有了意義，而且有所方向。」－《受苦的倒影》第一頁（阿愷之聲台文改編）

聽眾朋友逐家好，歡迎收聽阿愷之聲「文學烏亂濺」單元，這集節目阮欲繼續來討論這本春山出版今年三月出版的新冊《受苦的倒影：一個苦難工作者的田野備忘錄》，節目來賓非常歡喜會使邀請著這本冊的作者魏明毅老師，和阿愷作伙主持的是我的好朋友aka社會工作者奕瑄，阮欲作伙來請教作者寫這本冊的想法。

節目一開始想欲問魏明毅老師的是，按2016年出版的《靜寂工人》到今年的新冊《受苦的倒影》，是啥原因予伊繼續寫冊？這本新冊咁有設定欲寫予誰看？對這本冊的期待？

續落來是社會工作新手的奕瑄向資深工作者魏明毅老師的問題討論，對專業者來講，是欲按怎面對工作上力猶未逮的焦慮？按怎佇體制內底保持正直和良知？甚至是當代的工作環境中，咁有一種「倫理」的標準？

這集節目非常精彩，歡迎聽眾朋友呢聽節目呢看冊！
最後也要感謝書集囍室冊店提供錄音空間，聽眾朋友會使佇節目內底聽著鳥仔聲，代表春天來啊，也是讀完這本冊的心情。

＊來看冊：《受苦的倒影：一個苦難工作者的田野備忘錄》https://www.books.com.tw/products/0010950507
＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好！歡迎收聽阿愷之聲特別節目「阿里山放送」，這个單元感謝國科會計畫支持播出，第五集阮來到大阿里山茶區海拔上懸（高）的所在「石桌」。

「轉來厝內做茶，面對老師傅萬事攏憑經驗，我開始想講咁有可能就以前佇科技業的經驗，用數字來管理茶？」

這遍阿愷和臺大地理系的洪伯邑老師來到頂石桌的茶園「山石園」 ，訪問總管aka青農王嘉裕先生轉來家鄉種茶的故事。

以前家裕佇科技業工作，後來決定轉來接阿爸的事業，一開始面對的挑戰包括和老師傅之間的觀念無同，到底老師傅的經驗按怎轉變成數字化的茶園管理？這件代誌一直是家裕努力的方向，後來有機會和台大研究團隊合作，佇茶園設置微氣候監測，儀器收集的資料變成家裕重要的參考根據。

「對阮青農來講，方法上其實種茶和種咖啡是誠類似的代誌，閣加上兩項作物的採收期無同，而且咖啡的市場愈來愈大，我想想咧感覺會使試看覓，所以我是石桌地區頭一批種咖啡的。」

新一代的青農有新的經營觀念，家裕後來甚至開始種咖啡，因為咖啡的採收期拄阿好和茶米的產期相閃身（交錯），所以趁著石桌優良的地理環境，種出品質蓋好的咖啡，創造出除了茶米以外的產品線，會使講是咖啡新世代！

聽眾朋友趕緊來聽節目，和阿愷和伯邑老師來去頂石桌，遮除了有好風景，閣有誠讚的高山茶和咖啡！

＊工商服務時間：山石園 https://www.facebook.com/ourhouse.tea.cafe
＊歡迎支持阿愷之聲： https://open.firstory.me/user/ckowqyem1p4lt08481nvounvr
＊歡迎留話call in阿愷之聲： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲特別節目「阿里山放送」！這个單元感謝 國科會計畫支持播出，第六集阮轉來到阿里山公路彼个會使欣賞雲海的所在「隙頂」！

「阮茶農攏對茶叢誠有感情，就親像阮的囡仔同款，因為這茶攏是阮家己慢慢仔顧大漢，所以今仔日伊咧乾咧落葉，阮看了誠艱苦，但是無落雨，無水就是無法度。」

這遍阿愷和臺大地理系的洪伯邑老師來到番路鄉隙頂的茶園「銪茗堂」，拜訪堂主aka負責人黃昶銪 先生，向伊請教茶智識的過程中，濛霧直來，彼氣氛就親像咧聽一段奇幻的故事。

佇阿里山公路邊的銪茗堂，是阮走遍大阿里山茶區看著上接近遊客的茶園，遮的店家誠早就開始思考按怎做出各種茶品予消費者參考。銪茗堂就是其中一間做出家己特色的茶廠，而且頭家本身有夠用功，除了繼續進修參加各種比賽提金牌以外，伊對茶園有一套家己的經營祕訣，最近銪茗堂甚至得了政府頒發「亮點茶莊」的肯定，是正港的百大青農！

「這遍洘旱（乾旱）是這幾十年來上乾的，好你加在落了一場救命雨，所以今年的茶叢需要好好仔歇睏、照顧，俗語講做著歹田望下冬，這水春仔收了歹無要緊，向望冬仔茶會使收來補。」

隙頂的茶雖然受著天公伯的疼惜，但是面對這幾年氣候反常，風不調雨不順，茶農又閣會按怎想辦法？

這集阿里山放送，來聽銪茗堂的故事！

＊工商服務：銪茗堂 https://www.facebook.com/yoming52.3k
＊歡迎贊助支持阿愷之聲： https://open.firstory.me/user/ckowqyem1p4lt08481nvounvr
＊歡迎留話call in阿愷之聲： https://open.firstory.me/user/ckowqyem1p4lt08481nvounvr/comments

逐家好，阿愷之聲「空中泡茶間」單元這集再次出外景，到底嘉義中埔對佗去？
歡迎「村遊淺山埔」地方創生專案執行姍姍來報路！

＊歡迎贊助支持本節目： https://open.firstory.me/user/ckowqyem1p4lt08481nvounvr
＊歡迎call in留話： https://open.firstory.me/user/ckowqyem1p4lt08481nvounvr/comments

「遮呢濟事件當咧發生，咱看著啥？佇歡喜抑是逃避抑是痛苦之外，咱人濟少攏值得為家己的生命投入一屑仔嚴肅，這和看無目內拄仔好倒擺的嚴肅時刻，予正直和良知會使消解市場經濟世界的痟狂，有了可能。」－《受苦的倒影》碎語附錄（阿愷之聲台文改編）

聽眾朋友逐家好，歡迎收聽阿愷之聲「文學烏亂濺」單元，這集節目阮欲繼續來討論這本春山出版今年三月出版的新冊《受苦的倒影：一個苦難工作者的田野備忘錄》，節目來賓是這本冊的作者魏明毅老師，和阿愷作伙主持的是逐家懷念的聲音aka 佳生活實驗室的學姊。

咱的生活中，咁捌有幫助別人的經驗？
為啥欲幫忙？欲幫忙到啥程度？

面對家己的工作，若忝 （累）囉是欲按怎？
工作和生活之間，是欲按怎調整心態？

這集節目阮想欲問魏明毅老師，寫佇《受苦的倒影》進前，是啥原因予伊走入這途專業？助人工作要做到啥款的程度？助人工作者（公共事務參與者）是一个特別的工作，因為面對的是「人」，所以若是工作忝 （累）的時陣是欲按怎？又閣按怎佇工作了後，轉去厝內面對生活時，心態的調整？

這集節目非常精彩，歡迎聽眾朋友呢聽節目呢看冊！

最後也要感謝書集囍室提供錄音空間，聽眾朋友會使佇節目內底聽著鳥仔聲，代表春天來啊，也是讀完這本冊的心情。

＊來看冊：受苦的倒影｜https://www.books.com.tw/products/0010950507
＊歡迎贊助支持本節目：｜https://open.firstory.me/user/ckowqyem1p4lt08481nvounvr
＊歡迎call in留話本節目｜ https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「洛津浪音樂」單元！

本節目真久無放送囉，其實這段時間台長去歐洲旅行，去做一个「聽團仔」。咦？到底是在聽啥團？

這遍旅行的其中一個目標，是想欲去聽歐洲不同款城市的交響樂團（orchestra）所演奏出來的聲音，透過音樂來觀察彼个城市的個性和特色。本集節目想欲先來介紹兩個城市，分別是尼德蘭（Netherland）的阿姆斯特丹和德國（Germany）的柏林。

「阿姆斯特丹是一个誠幼秀的城市。」

尼德蘭（aka荷蘭）一開始予我的印象就是“幼秀”，毋管是遮優良設計的道路交通，抑是樸實的紅磚仔建築和巷仔路，生活佇遮的人享受了誠好的社會福利制度，是一个人會使活了有尊嚴的國家。但是這个任何方面攏這呢「周全」的國家社會，咁有不足的所在？

來到這个國家的首都阿姆斯特丹（Amsterdam），除了拜訪UNESCO（聯合國教科文組織）指定的世界文化遺產運河區以外，來聽當地這个世界出名的交響樂團：RCO（Royal Concertgebouw Orchestra），一直是台長自細漢時的夢想啊！

彼暝的音樂會是John Eliot Gardiner指揮大會堂管弦樂團（RCO）的布拉姆斯交響曲，這位古樂專家將布拉姆斯音樂的「重」演了非常之「輕」，整體樂團的聲音就親像這个城市同款幼秀而且古典，水準有夠讚，但是我發現在場的聽眾大部分攏是白頭毛的序大，咁講.......？

「柏林實在無媠（漂亮），但是非常妖嬌。」

來到德國的首都柏林（Berlin），四界攏看著建築物面頂充滿了多彩繽紛的烏白捽（塗鴉），這个城市過去有一段複雜的歷史，但續變成當代的創作養分，吸引了世界各國的人才來遮發揮，柏林予我感覺親像一个猶閣咧大漢的少年家，充滿了可能。

來到柏林，當然要來聽天下第一團：柏林愛樂（Berliner Philharmoniker）的演出，這間1963年起好的音樂廳非常了不起，是全世界頭一間打破傳統的音樂廳。彼一暝的樂團指揮是古典音樂界的明星Gustavo Dudamel，伊和柏林愛樂合作演出中南美洲的當代作品，雖然冷門，但是柏林愛樂創造出來的聲音色彩之豐富，予我感受著這是一个演奏未來聲音的交響樂團，實在無簡單！

有一暝，我對柏林歌劇院（Staatsoper Berlin）離開的時陣，行無幾步就看著荒廢的建築物面頂攏是塗鴉，這種衝突感，完全是柏林的特色。

對阿姆斯特丹到柏林，用兩个城市的交響樂團來講故事，有影趣味！
歡迎聽眾朋友來收聽本集「洛津浪音樂」節目！

＊音樂會詳細演出內容｜

1. 阿姆斯特丹
John Eliot Gardiner 指揮大會堂管弦樂團演出布拉姆斯第二號＆第四號交響曲，這是Gardiner和RCO的一个布拉姆斯計畫。

2. 柏林
Gustavo Dudamel指揮柏林愛樂演出墨西哥作曲家Gabriela Ortíz、阿根廷作曲家Alberto Ginastera和美國作曲家Charles Ives的作品，柏林歌劇院是演出整齣華格納的歌劇「唐懷瑟（Tannhäuser）」。

＊相片場所｜柏林愛樂廳（Berliner Philharmonie）
＊節目音樂｜鹿港新聲閣、Johannes Brahms Symphony NO.2、Richard Wagner “Tannhäuser ” Overture

＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎call in 留話： https://open.firstory.me/user/ckowqyem1p4lt08481nvounvr/comments

Stray birds of summer come to my window to sing and fly away.
And yellow leaves of autumn, which have no songs, flutter and fall there with a sigh.
熱天的鳥仔流浪，來阮窗前唸歌，隨飛去他方。
秋日的葉仔徛黃，無歌通唱，一聲怨慼就飄落。

－泰戈爾《浪鳥集》001，温若喬台文翻譯

聽眾朋友逐家好，這集「文學烏亂濺」單元欲來講一本今年（2023年）由九歌出版，温若喬台文翻譯印度國寶級詩人泰戈爾的詩集《浪鳥集Stray Birds》。

這本台文翻譯的詩集我感覺誠無簡單，一方面除了愛對台語的語境誠熟識以外，閣愛對詩的創作形式有相當程度的瞭解才會有法度。翻譯者温若喬的年紀誠少年，本身也有咧創作台語詩，但予阿愷上意外的是，伊竟然是後來才開始學台語，佇學習過程中創辦了instagram台語頻道「學台語Ohtaigi」，和逐家分享日常生活中台語的各種模樣，實在有夠骨力！

印度國寶級詩人泰戈爾（1861-1941）佇1916年發表這本用英語寫成的詩集《Stray Birds》，受著英語世界誠大的歡迎，但是後來泰戈爾成就上懸、也是得了諾貝爾文學獎的詩集《吉檀迦利》，續是用伊的母語（孟加拉語）來寫成，會使講母語才是一个人對家鄉彼片土地上深的連結。

翻譯除了語言上的轉變，也是對咱熟識的語言，去看著別人和咱生活記持、經驗的對照！

聽眾朋友，泰戈爾總算會講台語囉！
歡迎收聽本集文學烏亂濺出來。

＊來抽冊｜活動辦法

1. 參加時間：節目放送了後七工內（2023/6/12~6/18 24:00）
2. 參加方式：佇本篇文章下面tag一位朋友並寫著「緊來讀浪鳥集」，舉例： ＠王阿愷 緊來讀浪鳥集，只有開放佇facebook、instagram和twitter三个所在的這篇文章留話才有準算
3. 抽獎方式：總共有一本冊，最後會線頂直播來抽獎，寄到恁厝

＊來看冊｜浪鳥集：泰戈爾《漂鳥集》台文版
https://www.books.com.tw/products/0010946717
＊學台語 O̍h Tâi-gí
https://www.instagram.com/ohtaigi/
＊節目音樂｜鹿港新聲閣的鬧熱演奏
＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「講鹿港說鹿港，鹿港說不盡」單元，本集節目延續台長進前歐洲旅行的城市觀察，這遍閣欲”大膽“來比較維也納（Wien）和鹿港（Lokkang）這兩个城市！

維也納和鹿港，鹿港和維也納，到底這兩个城市會使按怎比較？故事就要對台長佇維也納聽著一場失望的音樂會講起......。

維也納予我的第一印象就是有夠虛華，這个城市就親像一个穿衫和化妝攏誠講究的老歲仔，雖然老，但猶原風采。遮以前是奧匈帝國的首都，佇十九世紀是歐洲第二大的帝國，除了是政治和經濟的中心，遮閣是音樂之都，莫札特、貝多芬、布拉姆斯甚至是馬勒攏來遮發展人生重要的音樂事業，而且對一個愛聽古典音樂的人來講，維也納更加是一个夢想的所在。

後來帝國戰敗，國土解散，維也納不再是歐洲的心臟，這个城市開始走往觀光產業，後來遮的一切就親像活佇過去，行袂開跤，但是猶原驕傲。

一个上過驕傲的所在，其實小可仔危險。

鹿港這方面就和維也納就略略仔相同，這个城鎮發展觀光的基礎是祖先留落來的財產，但是遮的人今仔日憑啥來面對過去？其實鹿港誠有家己的特色和本事，但是遮的人攏無心經營，觀光品質有夠歹，反正假日時各地的遊客攏會來到鹿港觀光，只要拍出「鹿港」這个名號，就毋驚無人來啦。

雖然我真納悶外地人來鹿港會使看啥，毋過就親像我來到維也納同款，咱人對一个生份的所在總是充滿了想像，這和實際上來講完全是兩回事，這就是本集將維也納和鹿港作伙比較的一个基礎。

聽眾朋友，緊來聽台長講鹿港說鹿港，其實維也納也真咧說不盡啦！

＊節目回顧｜

1. EP45 講鹿港：予鹿港再次偉大的五月節？
https://open.firstory.me/story/cl42wwalg006101w9a6vgaiv5/platforms
2. EP82 洛津浪音樂：阿姆斯特丹vs柏林 PART1歐洲城市觀察
https://open.firstory.me/story/clih8626j00nt01uxgh0gcydx/platforms

＊相片場所｜維也納音樂協會大樓（Musikverein）
＊節目音樂｜鹿港新聲閣、Dvorák Symphony NO.9 "From the New World"

＊歡迎支持贊助本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，本集「台長時間」欲來講一集我袂赴做的節目，本集節目是欲紀念我的鹿港好朋友：輝哥！

輝哥本名是李政輝，伊和四个小妹共同經營一間予作「孩堤咖啡」的咖啡館，這間咖啡館佇鹿港十年有喔，也是誠濟人攏有感情的所在。我嘛是佇遮熟識單品咖啡，對世界各國的咖啡理解咱的人生，輝哥就親像我的大兄，佇我各種人生階段，需要的時陣惦惦仔請我啉(lim)一杯鼓勵，用咖啡鼓勵，用beer鼓勵，這款人憨憨仔經營這間店，堅持行家己的路，一行就十年。

輝哥佇今年六月離開逐家，雖然誠毋甘，但是我相信伊會要咱繼續努力生活落去，「孩堤咖啡」也會繼續沖出新的故事，咱要期待。

一集袂赴錄的節目，實在人生有太濟袂赴做的代誌，但是咱會使把握的就是當下，我相信，這集節目輝哥有聽著。

＊工商服務時間：鹿港孩堤咖啡目前有兩个空間，新盛孩堤佇新盛巷23號附近，孩堤慢慢來佇後車巷51號，歡迎來去飲咖啡！
＊歡迎支持贊助阿愷之聲： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「空中泡茶間」單元，這集來到泡茶間的特別來賓是鹿港玉渠宮的少年主委施信呈，副主持人是逐家懷念的鹿港歌王柏仁，阮準備欲來開講今年田都元帥聖誕千秋的「戲神祭」！

「戲神」就是田都元帥，相傳田都元帥有誠好的藝術修養，如今真濟曲館、戲班甚至是演藝界攏會拜這尊祖師爺，祈求保庇。

車埕是鹿港市仔內的一個角頭（community），對車埕的居民來講，田都元帥是角頭廟供奉的主神，主神的生日就是地方的重要代誌。今年的元帥生，鹿港玉渠宮推出「戲神祭」，將傳統節日創新設計，歡迎逐家攏來廟口作夥鬧熱。

聽眾朋友，有閒歡迎來廟口看戲！

＊鹿港玉渠宮：https://www.instagram.com/yuchu7761120/
＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎call in留話本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「講鹿港說鹿港，鹿港說不盡」單元，本集節目的特別來賓是臺灣大學社會學研究所碩士生郭韶桓，邀請伊來分享燒燙燙的論文計畫書！

社會學研究佇鹿港？鹿港會使研究啥？

講到鹿港，逐家人對這个小鎮上大的印象可能是「古厝誠濟」，但事實上，這幾年有閣較濟古厝是予人拆掉，為啥這个靠文化觀光出名的所在，竟然一直拆厝？

郭韶桓目前佇臺灣大學咧讀社會所，伊本身也是一位鹿港人，對鹿港的關懷一直到出外讀冊以後，才發現家鄉的風景竟然這呢特殊珍貴。韶桓想欲用社會學的角度來理解鹿港的文化資產保存，這是一个無好處理的問題，內底牽涉了各種經濟和社會因素，但是咱誠期待這个研究未來會按怎透過田野調查，講出閣較濟咱毋知影的在地實情。

聽眾朋友，歡迎收聽本集節目，來聽這位少年的碩士生分享頂个月才發表、猶原燒燙燙的碩士論文計畫書！

＊歡迎贊助阿愷之聲： https://open.firstory.me/user/ckowqyem1p4lt08481nvounvr
＊歡迎call in留話予本節目： https://open.firstory.me/user/ckowqyem1p4lt08481nvounvr/comments

＊本集節目感謝國家兩廳院的支持放送＊
 
「每一蕊花，攏有家己想欲展現的姿勢。欲按怎開花，毋免向啥人來解說。愛家己，愛別人，親像我愛你。你是獨一無二的家己，行向心所向望的所在。你有獨一無二的名字，追求的美夢，佇你的心內啊！」－ 農村武裝青年〈予你的歌〉
 
聽眾朋友逐家好，歡迎收聽阿愷之聲「洛津浪音樂」單元，這集節目的特別來賓是對彰化二水來的獨立樂團農村武裝青年：阿達和俐君，阮準備欲來講農武上新的音樂創作，閣有年底佇國家兩廳院秋天藝術節的演出。
 
“轉來到二水家鄉的農村武裝青年，過了啥物款的創作生活？”
 
2017年農村武裝青年對都市搬轉來彰化住，彼時陣創作了《根》這張結合了傳統樂器的民謠創作，就親像寫予故鄉的詩。後來阿達和俐君生了一个幼囡仔，兩个人的生活有了重大的改變，創作的關懷也慢慢仔來到囡仔的陪伴和教育，《予你的歌》是2023年全新的音樂作品，歌誠溫柔，除了是對這片土地的致意，也是予囡仔的愛。
 
“恁記持中的黑暗暝是啥？”
 
這是今年國家兩廳院秋天藝術節的策展概念，佇阿達和俐君身上，這幾年轉來彰化的生活有艱苦也有快樂，透過創作唱出咱的人生，今年底農村武裝青年準備欲來到國家兩廳院演奏廳唱歌，用音樂揣出咱生活的根！
 
聽眾朋友，緊來收聽本集節目，來聽農村武裝青年的故事。
 
演出消息｜
節目名稱：農村武裝青年《根源 kin》
主辦單位：國家兩廳院
演出時間：2023年11月2號(四)、11月3號(五) 19:30
演出地點：國家兩廳院演奏廳
售票連結：https://bityl.co/KBEp
 
節目音樂｜
農村武裝青年2023年的全新創作「開花彼時」、「予你的歌」，專輯預購：https://www.surveycake.com/s/DK024

＊歡迎支持贊助阿愷之聲： https://open.firstory.me/user/ckowqyem1p4lt08481nvounvr
＊歡迎call in留話本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲！這遍「空中泡茶間」單元又閣來到嘉義出外景，咱歡迎嘉義出產的下港女子和攝影師暉哥，阮欲來講這本燒燙燙的新冊《裏嘉義》！

到底嘉義有佗位通去？

這本“毋是真按照規矩”的嘉義旅行冊，內底除了城市，閣包山包海，這攏是下港女子團隊用心行過、感受過的好所在，所在真正好，才敢大力推薦。

這本《裏嘉義》會使講是轉來嘉義一年後的成果，這對freelancer翁仔某非常打拼咧寫嘉義這个所在，寫的包括在地的特色建築、菜市仔、好山好風景，甚至也有少年人來轉來經營的獨立冊店、bar和咖啡廳，嘉義是一個誠活潑的好所在，好你「嘉」在有這本冊咧用心記錄。

這本冊最主要的目的，是愛恁行出家己的嘉義路線，但是恁若對嘉義無熟，也免緊張，咱作伙對《裏嘉義》行入來嘉義！
聽眾朋友，緊來聽這集講《裏嘉義》出冊背後的故事！

＊來看冊｜下港女子《裏嘉義》： https://www.books.com.tw/products/0010962384?sloc=main
＊歡迎贊助支持阿愷之聲：https://open.firstory.me/user/ckowqyem1p4lt08481nvounvr
＊歡迎call in本節目： https://open.firstory.me/user/ckowqyem1p4lt08481nvounvr/comments

聽眾朋友逐家好，歡迎收聽阿愷之聲「空中泡茶間」單元，這遍阿愷來到鹿港樑露工房來泡茶，泡茶間的來賓是木作職人陳俊位和建築人怪獸，阮欲來講 一間佇彰化溪州的老厝「旺來院子」翻修的故事！

「一位建築人拄著一个木工師傅，咁會冤家？」

這間佇南彰化溪州菜市仔邊的古厝，年歲超過半世紀，幾年前誠愛欣賞老厝的怪獸有緣將伊買落來了後，“意外”揣著木工師俊位作伙來整修這間厝。兩个人有各自的浪漫，但是欲按怎合作，才有法度來完成這个無簡單的任務？

「南彰化的資源一直攏真少，所以旺來院子希望變作一个美術的基地！」

怪獸這間古厝整修到今仔日已經有三年，這過程和木工師俊位的合作有真濟挑戰，但是因為無仝專業的合作，過程也互相學習著誠寶貴的經驗。好你加在，這精彩的整修過程有一台camera咧紀錄，咱會使透過紀錄片來看著古厝翻修的討論和想像，這間怪獸老屋對整修到未來的使用，攏非常精彩。

「一間古厝本來就有誠濟故事，怪獸和俊位的合作，準備延續這間厝的故事。」

聽眾朋友，歡迎收聽這集節目，也歡迎來鹿港看《怪獸老屋》紀錄片！

＊活動消息｜怪獸老屋紀錄片放映會╳樑露工房

時間：2023年8月12號（拜六）暗時6：45 開放進場
地點：樑露工房（鹿港鎮後車巷47號）
報名：https://forms.gle/XVH4vX9XzARVHYRJ9

＊ 樑露工房：https://www.facebook.com/2in3more
＊ 旺來院子：https://www.facebook.com/Goodcome.courtyard
＊歡迎贊助支持本節目： https://open.firstory.me/user/ckowqyem1p4lt08481nvounvr
＊歡迎call in留話予阿愷之聲： https://open.firstory.me/user/ckowqyem1p4lt08481nvounvr/comments

聽眾朋友歡迎收聽阿愷之聲「空中泡茶間」單元，本集來到空中泡茶的特別來賓是平凡製作的創辦人黃銘彰，咱真好奇到底阿彰轉來嘉義是咧變啥魍？

以前感覺嘉義誠無聊，為啥大漢了後想欲轉來創業？

少年時去臺北讀冊、工作的阿彰，因為2021年時臺灣設計展佇嘉義舉辦，彼當陣伊有一个機會來發落其中一間展場（剛剛好的城市：理想生活再想像），這擺機會予伊正經思考轉來家鄉創業的可能。但是轉來家鄉工作，咁有影這呢浪漫？

本身的專業是編輯，阿彰轉來嘉義後創立的公司主要也是對這項專業落去發展，起初袂慣習在地人的生活節奏，但是伊後來發現佇嘉義的生活慢慢仔變成工作上的養分，這過程捌面對啥款的挑戰？阿彰轉來創業的感想是啥？未來閣有啥計畫？

聽眾朋友，阿愷之聲再次嘉義放送，這遍來聽少年創業的故事！

＊來賓資料：黃銘彰 https://www.facebook.com/briancytw 、平凡嘉義 https://www.facebook.com/extraordinarychiayi
＊歡迎贊助支持阿愷之聲： https://open.firstory.me/user/ckowqyem1p4lt08481nvounvr
＊歡迎call in留話予阿愷之聲： https://open.firstory.me/user/ckowqyem1p4lt08481nvounvr/comments

聽眾朋友歡迎收聽阿愷之聲「空中泡茶間」單元，本集來到空中泡茶的特別來賓是倫敦大學亞非學院（SOAS）做臺灣研究的碩士施翔耀，翔耀是彰化人，也是「凱吉ㄉ活網週報」版主，這集節目欲來講為啥要去英國讀歷史？

講著歷史，到底文史工作者和歷史學家的差別是？

相信對彰化/鹿港人來講，咱生活佇一个充滿歷史感的環境，對地方歷史有興趣的人也會透過實地觀察、資料收集、甚至是訪問的方式，變成一个咱講的「文史工作者」。但是文史工作和歷史學的差別佇佗？兩款人對歷史的關懷有啥無同？為啥學歷史學就要讀到研究所？

到底偌愛歷史，要飛到英國做臺灣研究？

翔耀對讀彰化高中的時陣就對歷史誠有興趣，雖然伊是自然組（？），對歷史的興趣受著家庭背景的影響，閣有高中時參與的反課綱運動。後來大學來到臺灣師範大學來讀歷史系，開始接受正統的歷史學訓練，課程中有機會來到臺北社子島做田野調查，也開始對臺灣研究有了興趣，就按呢，翔耀研究所就飛去學術的「日不落帝國」英國來讀碩士，未來甚至欲繼續往學術這條路來行......。

聽眾朋友歡迎來收聽本集空中泡茶間，來聽一个少年的歷史學家為啥對學術這呢有熱情！

＊歡迎支持贊助本節目： https://open.firstory.me/user/ckowqyem1p4lt08481nvounvr
＊歡迎call in留話予阿愷之聲： https://open.firstory.me/user/ckowqyem1p4lt08481nvounvr/comments

＊本集節目感謝國家電影及視聽文化中心的支持放送＊

聽眾朋友逐家好，歡迎收聽阿愷之聲「空中泡茶間」單元，本集節目誠歡喜邀請著國家電影及視聽文化中心的副執行長陳德齡，阮欲來講到底這个中心的任務是啥？甚至閣欲來到天涯海角放電影？
 
國家影視聽中心是臺灣重要的電影基地，中心的任務包括臺灣電影的研究、修復保存和推廣，佇新北市新莊的影視聽中心是一棟誠媠（suí）的建築物，現在一樓當咧展覽的是「一一重構：楊德昌」回顧影展，相當精彩！
 
陳德齡副執行長是一个誠愛看電影的人，伊感覺逐家作伙看電影的經驗，以前可能真日常，但是佇當代續是誠珍貴的代誌。國家影視聽中心舉辦的「天涯海角電影院」計畫，準備將中心的電影資源帶到臺灣各鄉鎮放映，舉辦六年行過臺灣大大細細的鄉鎮，今年上遠甚至來到綠島，續落來閣有彰化二林、花蓮富里閣有新竹關西，準備欲邀請鄉親序大作伙來看電影。
 
聽眾朋友，這集節目誠有意思，聽完若有感動，會使招厝裡的人作伙來去天涯海角看電影！
 
放映消息｜
 
活動名稱：天涯海角電影院 𝑹𝒖𝒓𝒂𝒍 𝑪𝒊𝒏𝒆𝒎𝒂 𝑷𝒓𝒐𝒋𝒆𝒄𝒕
主辦單位：國家電影及視聽文化中心
執行單位：太甜創製社
放映時間：2023年8月5號到10月14號
放映地點：9/16彰化二林、9/23花蓮富里、10/14新竹關西
報名連結：9/16彰化場報名：https://forms.gle/AGFmeuiZ7XkuVGrb6、9/23花蓮場報名：https://forms.gle/yVEVY3oY6Rj7XaKPA

＊歡迎贊助本節目： https://open.firstory.me/user/ckowqyem1p4lt08481nvounvr
＊歡迎留話call in本節目： https://open.firstory.me/user/ckowqyem1p4lt08481nvounvr/comments