牛哥講經丨廣東話哲學、書籍分享 (讀物農莊 Anybooks Farm)
Explore every episode of 牛哥講經丨廣東話哲學、書籍分享
| Pub. Date | Title | Duration | |
|---|---|---|---|
| 03 Dec 2023 | S2EP33 MBTI歷史背景與理論入門：藉由MBTI作者所寫嘅書，講講ST、SF、NF、NT有咩特性，了解你嘅感知同判斷方式，以及MBTI嘅意義何在丨《天資差異》 | 00:47:27 | |
相信大家都會留意到MBTI非常盛行。唔理係同對方初次見面、定係面對識咗一排嘅老友，大家總會互相詢問彼此嘅MBTI。一個喜歡mbti嘅人，甚至會喺對方回答之前，估算對方嘅答案。當對方講出四個平凡嘅英文字母，人就可以掌握到對方嘅心靈特徵，點解會咁神奇呢？ 要知道，MBTI嘅作者伊莎貝爾・邁爾斯(Isabel Myers) 並無一個同心理學相關嘅專業資格，而佢所發明嘅人格測試並無被心理學界重視。只係大眾對於MBTI嘅熱愛，令學術界大跌眼鏡。 今次我要同大家分享嘅書，就係邁爾斯為解釋自己嘅理論親手所寫嘅《天資差異》。當中指出美國500強嘅企業當中，有8成以上嘅高層管理者都使用過MBTI，去了解員工嘅處事風格、特點、職業適應性、潛質等等……MBTI嘅實用性已經不容忽視。 到邁爾斯82歲嘅時候，仍然修改緊MBTI、為呢一本《天資差異》校讀同改錯。今集，我哋就要一齊睇睇MBTI作者點樣總結自己嘅理論。 內容包括： 「歷史背景」：我會同大家講講邁爾斯面對嘅歷史背景，簡述MBTI係點樣回應「一種正常人觀點」以及榮格心理學 「理論基礎：人格差異的類型思考」：我哋會睇下mbti所代表住嘅「人格差異」理論到底有咩意義 「四種人格類型」：用簡單比喻了解MBTI四個位置嘅意思，明白MBTI嘅藍圖 「感知，判斷」：我哋會深入少少睇下MBTI嘅第二、第三位置嘅意思，以及第二、第三位置組合之後所代表嘅特徵，即係ST、SF、NF、NT
我寫咗個幾有意思嘅結語，記得聽到最後。其實MBTI唔需要記，因為佢同康德…… | |||
| 03 Nov 2024 | S2EP49 尼采生平（下），身體越衰敗，意志越強大嘅男人，向一個女人求婚兩次，通通被拒絕。雖然佢寧願被人稱為「怪物」，但死後居然被人稱為「XX」……丨《悲劇哲學家尼采》＋《哲學的故事》 | 00:48:01 | |
上集提到，尼采喺佢第一部作品——《悲劇的誕生》當中，將西方哲學分作兩個階段——蘇格拉底前同蘇格拉底後，而佢嘅詮釋，可謂改寫咗西方人對古希臘哲學嘅視角：以往，蘇格拉底被人推舉；尼采認為，蘇格拉底之後，就係思想嘅陷落。 雖然尼采呢種講法過於誇張（未見成熟），但係呢種講法的確令人重新審視柏拉圖哲學嘅來源同效用，我哋喺《西哲幼稚園》嘅第9集用《非理性的人》講過，現代學者認為柏拉圖可以象徵住神話轉向哲學嘅化身，由此，西方哲學陷入難以解開嘅矛盾。而尼采就係將呢個矛盾展露出嚟嘅人，開啟咗對古希臘哲學嘅重新審視。 從依家嘅視角睇嚟，尼采嘅《悲劇的誕生》帶嚟獨特見解，但喺《悲劇的誕生》呢部奇書問世之初，一般古典語言學教授都冷眼視之，有人仲批評《悲劇的誕生》係「完全胡說」，仲有一個語言學家寫咗一本小冊子譏笑《悲劇的誕生》，教授嘅批評，預示住尼采往後嘅孤獨。 而喺尼采教授嘅課程中，學生開始被人勸退，話唔好上尼采嘅堂。但尼采無放棄寫作，佢喺三年間寫咗四篇長文，分別係〈史特勞斯：懺悔者與作家〉（“David Strauss: The Confessor and Writer”）、〈歷史的利弊〉（“The Use and Disadvantage of History for Life”）、〈教育家叔本華〉（“Schopenhauer as Educator”）、〈華格納在拜壘〉（“Richard Wagner in Bayreuth”），四篇文合成一本書，叫做《不合時宜的觀察》（Untimely Meditations）。 從四篇長文嘅標題可以睇出，喺呢段時期，尼采主要係回應、承繼佢所鍾愛嘅思想家，亦即係我哋之前一直提到嘅叔本華同華格納。另外，既然現代文明身陷蘇格拉底之後嘅影響，咁就只有華格納嘅音樂先可以拯救呢種文化危機。佢講到： 「從狄奧尼索斯之源，德國精神力量崛起，它與蘇格拉底文化的原始條件並無任何共通之處……也就是說，德國音樂……在它浩瀚太陽系的運行軌道中，有巴哈到貝多芬，又從貝多芬到華格納。」（《悲劇的誕生》，見於《哲學的故事，尼采，III》） 尼采認為，德國精神，被華格納喚醒。今集，我哋就要接住尼采同華格納嘅故事講落去。 內容包括：
另外，我會喺結語補充一個部分，「何愛尼采」。因為陳鼓應喺〈經典全新修訂版序〉當中提到尼采對佢生命嘅影響，就順便講埋。 | |||
| 05 Jun 2022 | EP50 【五十集而自述】牛某定義哲學：哲學作為一種生活態度｜《蘇菲的世界》 | 01:17:05 | |
今集，係第五十集牛哥講經，aka五十集而自述，感謝你一路以嚟嘅陪伴。我喺IG邀請聽眾提議我喺第五十集講咩，收集咗幾個回應，作為牛哥講經嘅傳統，就當然要將幾個睇落唔相近嘅回應去貫穿。結果，我決定用《蘇菲的世界》去貫穿呢一集。呢本書可謂給予我讀哲學嘅初心，當我今日重讀呢本書，好似回憶起當日第一次睇哲學嘅自己。內容包括： ・《蘇菲的世界》一開始問到「你是誰？」、「世界從何而來？」，呢兩個簡單嘅問題，展示住哲學嘅關懷 謹此感謝讀書組嘅朋友，無你哋同我一齊讀書，我寫唔出呢一集。 等我哋用一個鐘嘅時間，進入《蘇菲的世界》。 內容提要： 哲學係屬於每一個人，而每一個人都需要哲學，因為哲學本來係要解決每一個人都應該要去思考嘅問題，就係人要點樣存活喺呢個世界、看待呢個世界。 「讀過其他人的想法，多少能幫助我們建立自己的生命觀。」 好奇令人唔習以為常，開放令人擁有可能性，承認自由令人有真誠嘅機會。呢個，就係哲學嘅態度。 記住，一加一唔會因為喺希特拉口中講出嚟就變咗虛假，良知唔係因為王陽明講而真實，真實與否係自己體認、感受返嚟 所以，哲學遙唔遙遠？從文化嚟講，佢代表住人類嘅悠長思考，就算人類文明喺二千年前主要係各自發展，佢哋都同樣由好奇心出發去疑問世界、疑問自我。從生活嚟講，哲學就係你我初心嘅基石。我認為牟宗三講得好好...... | |||
| 12 Jan 2025 | 《變形記》出版小秘密，原來隻「蟲」係咁解？卡夫卡喺一百年前以最荒謬嘅劇情，寫實咁剖析打工仔嘅苦痛丨有文有路（2）丨野人文化，《變形記》 | 00:31:22 | |
歡迎你嚟到有文有路，人生路茫芒，文化方見道。今集係有文有路嘅第二集，我哋會繼續用野人文化出版嘅《變形記》，嚟講講卡夫卡嘅作品。 上集我哋講咗卡夫卡嘅生平，認識到家庭為卡夫卡帶嚟莫大嘅精神壓力，而卡夫卡總係要拖住懷有結核病嘅身軀，每日營營役役咁工作。 喺罕有嘅工餘時間，卡夫卡將家庭、工作、疾病凝結，寫成一部小故事，亦即係喺1915年出版嘅《變形記》，以最引人入勝、近乎荒誕嘅劇情，記錄一個打工仔嘅無奈同被動。 最神奇嘅係，即使劇情荒誕，但你仍然會喺故事當中感到源源不絕嘅寫實。 今集，我哋會先講講一個《變形記》出版時嘅小秘密——如果你喺封面見到一個圖案，咁即係嗰一個版本係唔尊重卡夫卡嘅意願。之後，我哋就會一齊睇下《變形記》嘅開頭。 | |||
| 26 Nov 2022 | S2EP7 古人點走出神話嘅輪迴？睇下信仰點樣令人類直視歷史，仰望上帝之城｜唯一與進程｜《宇宙與歷史：永恆回歸的神話》（三） | 00:33:41 | |
今集係宇宙與歷史嘅第三部曲，唯一與進程嘅上部分（由於我寫得太長，會分上下集出，今集係上集，會講正文嘅內容，下集會講講結語） 喺第二部曲，時間與反覆，我哋提到初民會將一切事件消融到範疇當中，咁係因為佢哋面對住嚴峻嘅生存環境，所以渴望真實嘅中心去給予保證。 苦難係一個重要課題，係實在嘅個體感覺，遇到洪水旱災、暴風山火、勞役......就會受到切身嘅肉體痛苦。但人除咗肉體會受苦，更會喺精神上製造痛苦，呢個就係人所擁有嘅獨特嘅痛苦──罪惡感，呢一種精神上嘅痛苦為自己嘅過錯、為未來嘅擔憂，一直折磨住人。初民為咗解除肉身同精神上嘅痛苦，進入到神話嘅輪迴當中，望向神明、將自己消融到神明當中。 我哋可以問，神話嘅輪迴點樣解除初民嘅痛苦？神話嘅輪迴有咩變體？初民喺咩契機之下走出輪迴呢？走出神話嘅輪迴點解有可能為人帶嚟痛苦？呢四個問題就係我哋今集想解答嘅目標。 今集內容包括： 1. 初民點樣用苦痛原型同因果業力去理解苦痛嘅源頭 | |||
| 04 Jan 2025 | 卡夫卡生平：「上帝不要我寫，但是我必須寫。」憂鬱嘅猶太青年，以寫作治療原生家庭嘅創傷；用布拉格地標，同你重遊存在主義先驅嘅人生丨有文有路（1）丨野人文化，《變形記》 | 00:22:17 | |
如果你走去搵法蘭茲．卡夫卡（Franz Kafka）嘅相，想睇下佢咩樣，你總係會搵到一個著住西裝、打晒呔，個樣是是正正，表情成幅牆，眼神帶住幾分憂鬱嘅猶太人。靚仔係靚仔，但睇落只係一個周街都會見到嘅打工仔。 無錯，卡夫卡的確係一個稱職嘅打工仔，只係喺「正常人」嘅形象背後，佢係日頭返工，夜晚寫作嘅癲佬（in a good way）。佢將源自父親嘅壓力、對愛情嘅焦苦、以及結核病嘅痛楚，一一通過文字抒發…… | |||
| 29 Jan 2022 | EP34 邊個話畀你聽人性好醜惡？唔好人講你就信！｜《人慈》（一） | 01:34:48 | |
(正文內容只有一個鐘，其餘係心事解難) 今集，我哋終於要開始講講鋪塾已久嘅《人慈》。作者嘅立場非常大膽，居然想喺罪惡嘅人間當中，提倡人性向善，作者仲話自己用梗新現實主義。話人性向善都算，仲話人性向善係現實嘅理解，到底係洞見定愚見呢? 呢本書用咗明顯嘅先破後立，但由於要破除嘅觀點，係我哋日常習慣嘅人性向惡，所以作者用咗比較長嘅篇幅去破除我哋嘅既有諗法，內容包括： 1. 二戰時候，英國同德國互相不停轟炸，一齊聽下兩國嘅市民喺轟炸之下嘅反應，思考一下戰事苦難同人民團結之間嘅關係。 希望你聽完呢集，會對我哋嘅日常經驗有多一分謹慎。去好奇一下，如果揭開社會所呈現俾我哋嘅現象之後，到底係充滿惡臭嘅人性向惡，定還是，另有乾坤? | |||
| 26 Sep 2021 | EP17《孔子大歷史》（下集）：匏有苦葉，濟有深涉，前有黃河，丘卻不渡 | 01:03:00 | |
知天命三個字，琅琅上口，但要能夠體會其中意味，就唔易做到。如果要形容孔子嘅人生做一種生果，我諗就係碌柚。皮厚，飽滿，多汁，甜又帶苦澀。 上集提到孔子一步步做到三桓，彷彿得到機遇而做到司寇，已經係天命眷顧。但喺今集，牛哥會詳細為你講述孔子五十歲嘅人生，你或者就會知道天命之於孔子，更多嘅係嘆息。今集內容包括： 1. 孔子點樣喺魯定公同三桓之間，實踐自己嘅靈活而有原則 如果你願意，一層一層剝開孔子嘅心，佢唔會為你帶嚟世上最甜美嘅味道，而係樸實中嘅苦澀同陣陣嘅清香。然後你會發現，脫去世人對孔子神化嘅衣裳，見到嘅會係既係凡人、又係聖人嘅孔丘。美哉水，洋洋乎。 （正式內容由3:21開始。） | |||
| 14 Aug 2023 | 【會員Podcast 全集試聽】西哲幼稚園EP5丨存在主義簡介 1.1 丨原子彈揭露西方人最深刻嘅焦慮；從存在主義嘅關懷生命，簡述現代哲學同古代哲學嘅鴻溝丨《非理性的人》 | 00:38:13 | |
有人話：「存在主義係一套因應時代而生嘅哲學，喺二十世紀達到高峰。」見到「二十世紀」、「因為時代而生」，睇嚟要導向一個結論：存在主義係因為世界大戰後嘅悲涼而生。 事情有無咁簡單呢？《非理性的人》嘅作者威廉・白瑞德(William Barrett)就提到： 「文明跟個人一樣，外表的事實常常是內部的緊張越積越多而造成的爆發；這種內部的緊張早有許多跡象，雖然有關的人沒有一個願意去注意。」（頁27） 的確，二十世紀嘅歐洲人好似如夢初醒一般，為生命無常感到傷痛、為社會失序感到失落、為科學嘅冰冷感到心寒，大家都拖住憂心忡忡、戰戰兢兢嘅身影存活。但呢一切嘅荒蕪唔係突如其來，反倒係其來有自： 早喺十九世紀嘅歐洲人享受住殖民事業以及工業化所帶嚟嘅豐碩成果，每個中產階級都自豪而安逸咁昂首闊步嘅時候，有人已經為眼前嘅文明富足皺起眉頭，開始「先天下之憂而憂」，剖析西方文明嘅內部矛盾。佢哋就係近代存在主義嘅始源，身處十九世紀嘅齊克果同尼采。佢哋兩個嘅立場非常唔同，齊克果見到基督教當中嘅美麗，尼采直指基督教嘅虛偽，而佢哋同樣都見到西方思想核心當中嘅扭曲。 對於同時代嘅人嚟講，佢哋係杞人憂天、痴人說夢；對於一二戰後嘅歐洲人嚟講，當歐洲土地刻住炮火嘅坑洞同矗立住空盪盪嘅毒氣室，歐洲人終於聆聽到百年以前嘅提醒、言猶在耳。齊克果同尼采之所以係十九世紀中嘅怪人，係因為佢哋係喺曠野呼喊，而未被注意嘅先知；佢哋喺繁榮當中擔任預言家，預見住西方文明最終會走向暴力以及價值空無；共同為時人吹起號角，要人誠實面對西方文明嘅難關。換言之，佢哋嘅瘋狂，只係由於佢哋走得太前。有時，走前時代一步，係天才；走前時代一大步，就係瘋狂。 因此，所謂存在主義哲學從時代劇痛以後大放異彩，係應驗住存在主義始源所預言嘅情境。正如作者所講，呢場表面嘅爆發，係內部緊張多年嘅累積。甚至可以話，存在主義哲學嘅興起，唔係偶然，而係注定。若然你問，內部緊張從何而來？咁就要睇下存在主義主要關注嘅三個時代──古希臘、中世紀以及近代。呢次嘅存在主義簡介亦會因應時代而分成兩集。 第一集係「存在主義作為關懷生命的哲學」，以存在主義對比近代以及古希臘哲學，從而得出存在主義嘅特色，我哋會睇下：
第二集係「西方文明危機」，講述存在主義所面對嘅時代處境──中世紀嘅失落。 | |||
| 16 Jun 2021 | EP2《初戀三摩地》：用名僧嘅戀愛故事為你講述愛同佛法（中集），用一粒牛丸講互即互入，再講愛嘅真諦。 | 00:29:22 | |
愛情被佛教所容許，但點解愛情會被佛教所容許呢？聽完今集你會發現，相戀時將佢當成一切，失去佢時將一切當成佢，其實都只係互即互入嘅表現。 一齊聽住牛哥唱歌，同用一粒牛丸去講出愛嘅真諦。 _____ Instagram: @cowgortalk 文字版：https://bit.ly/34J69Zc | |||
| 30 Oct 2021 | EP21《奴隸哲學家的人生通識課》：Stoic話你知點樣喺枷鎖中活得自由（中集） | 01:13:34 | |
今集開頭，我會講下半強制安心出行嘅推行，對牛哥嘅影響。另外，面對政府官員對於國家安全嘅諸多詮釋，作為一個小市民嘅困惑。 繼續去講教人喺處處受限嘅人生當中，活出自由嘅書，呢本書分咗四個部分，但原來今集只能夠講到第一章──義命分立（原本想講兩章）。 喺呢集，你會聽到對stoic 最勵志嘅詮釋，更會用儒家同stoic 溝通，睇下Epictetus 點樣提醒我哋： 1）義令人自由，命限可能會令失去自由 牛哥仲會補充： 1）義要堅持，但要背負錯嘅可能嘅責任 人生係會受到命限，但人可貴嘅地方，就係命限阻唔到自由，阻唔到人活得優雅、快樂（理論上），甚至，人係可以打破命限。 （正式內容由7:58開始。） | |||
| 01 Feb 2025 | 《快思慢想》共讀（1）：用系統一、系統二認知你嘅心智盲點丨得閒讀書會（1）丨廣東話讀書會 | 01:55:27 | |
逢星期三夜晚九點直播 建議於Spotify/ patreon觀看 原片：https://www.youtube.com/live/Ep4inBEheQ4 patreon:https://www.patreon.com/cowgortalk 00:00 開講、前言13:12 緣起22:25 捷徑直覺33:05 第二種直覺42:44 小總結48:53 講個故事：注意力測試1:28:33 慕勒－賴爾 (Müller-Lyer) 錯覺1:36:12 系統一、系統二只係擬人故事！ 如果想玩實驗，可以睇呢條片 https://www.youtube.com/watch?v=vJG698U2Mvo 本集章節： 00:00 開講、前言 13:12 緣起 22:25 捷徑直覺 33:05 第二種直覺 42:44 小總結 48:53 講個故事：注意力測試 1:28:33 慕勒－賴爾 (Müller-Lyer) 錯覺 1:36:12 系統一、系統二只係擬人故事！ 問答環節 閱讀材料： 《快思慢想》 | |||
| 28 Aug 2021 | EP13《「我反對！」不恐龍大法官RBG第一手珍貴訪談錄》：美國最高法院史上第二位女性大法官訴說平等與自由（上集） | 00:44:04 | |
要喺社會中敢於叫喊一聲「我反對」並唔容易，處於高位而處處為異議者發聲就更唔容易，而今次藉由《「我反對！」不恐龍大法官RBG第一手珍貴訪談錄》要講嘅，就係喺美國最高法院擲地有聲咁講「我反對」嘅露絲拜德金斯伯格(Ruth Bader Ginsburg)。 金斯伯格係美國最高法院第二個女大法官，佢嘅一生正正經歷同實證美國對於平等嘅進步，今集會稍稍延續一下上集提到嘅馬丁路德金，睇下喺美國嘅民權運動點令到司法制度嘅態度轉變，等我哋一齊喺呢一集講講(1)自由同平等嘅關係、(2)美國最高法院嘅運作同精神、(3)美國憲法點樣由本來無平等二字，演變成喺平等嘅概念上比較先進嘅國家、(4)家長主義同男女不平等嘅關係。 當我哋重睇整個進程，就會發現我哋習以為常嘅概念可能好明顯地錯而不自知(一百年前嘅人覺得男女理應不平等)，而追求概念、價值觀嘅進步，可能唔係一兩代嘅人事。實在係路漫漫其修遠兮。 | |||
| 23 Oct 2021 | EP20【特備節目】《八國聯軍乃正義之師》：人必自侮而後人侮之 | 00:50:59 | |
喺教科書嘅記載下，我哋對清末嘅印象往往係貧弱、飽受欺凌，外國接連以戰爭打敗清軍，鴉片戰爭、甲午戰爭嘅落敗令到清國顏面無存，就自然認為外國軍隊一旦進入國土之內，就係又一次嘅侵凌。 喺《八國聯軍乃正義之師》呢本書，用咗誇張嘅標題，想為你揭示嘅係「八國聯軍是一場救援行動，而不是侵略行為」，同之前嘅鴉片戰爭、甲午戰爭有住根本唔同，今集內容包含： 1）承認作者標題同開首過於偏袒聯軍，引述作者後嚟講到「八國聯軍不是正義之師」 我努力嘗試將作者偏頗嘅內容，或刪除，或指出。目的係想展示雖然書名係有所誇張，但呢本只有192頁，但總共有528個註嘅書仔，當中資料嘅豐富，係一個對於後人認識當時歷史嘅好補充。作者確確實實有侮辱嘅嘢，只係侮辱嘅嘢係瘋狂嘅義和團同頹然嘅守舊派；作者係有讚頌八國聯軍，只係除咗因為八國聯軍解救教民，更令清帝國嘅內亂解除，同埋為往後嘅清末新政同辛亥革命鋪路。 我同意八國聯軍進軍清帝國可能有私心，只係就上述三點而言，八國聯軍之於中國而言，係有益處。 我同意作者書名太過誇張，但唔代表內容唔值得用你我理性嘅頭腦去閱讀。 如果歷史係非黑即白咁簡單，或者係一件好事，但唔係事實。 人必自侮，而後人侮之。 | |||
| 09 Dec 2023 | S2EP34 原來內傾人好易睇錯自己嘅MBTI？一齊用將軍僕人比喻搵出「主導精神活動」，發掘你嘅人格優勢之處丨《天資差異》 | 00:34:38 | |
喺上集，我以一隻船去比喻MBTI嘅四個位置，而上集嘅內容只係夠時間講到第二、第三位置，即係船嘅兩組推進器。 今集就要講埋第一、第四位置。就算你同你嘅朋友只係有一個英文字嘅唔同，都可能會有住唔同嘅「主導精神活動」，思維上亦因而有住非常唔同嘅側重點。今集，我哋會一齊去搵出你嘅「主導精神活動」，同埋講講搵出「主導精神活動」嘅意思。內容包括： 「外傾，內傾（1）」：我哋會講講外傾同內傾會點樣影響一個人嘅感知（第二位置）、判斷（第三位置） 「感知態度，判斷態度(4)」：解釋一下點解以「船長態度」理解第四位置。順便講埋外傾人係好易搵到自己嘅「主導精神活動」 「主導精神活動過程」：睇下內傾人要點樣間接咁搵出自己嘅「主導精神活動」。同埋以「將軍」同「僕人」嚟理解「主導精神活動」嘅意思 正文內容嘅最後，我仲列埋個表，大家可以一眼就搵到自己嘅「主導精神活動」。 | |||
| 18 Jun 2022 | EP51 《易經》唔係占卜咁簡單？孔子用佢嚟解釋禮節嘅根源？｜《中國哲學史大綱》（六） | 00:35:18 | |
講完胡適嘅墨子同老子，今集我哋終於要講講胡適口中嘅孔子。 胡適對孔子嘅理解主要係以字詞嘅考據出發，去對應當時嘅時代，例如佢對仁字嘅理解就同宋儒唔同。而更特別嘅地方，係胡適嘗試用《易傳》、《春秋》、《論語》一齊去詮釋孔子。《易傳》透露住孔子嘅哲學基礎，禮制原來係由觀察自然而嚟，非常貼地，而呢個自然係源自於天嘅模範；《春秋》顯示孔子嘅正名主義嘅野心，直認以主觀評斷書寫（改寫）歷史，用歷史去對過去人物或譽或毀，達至賞善罰惡嘅果效，建立歷史嘅模範；《論語》之下，教導一個君子點樣成為一個人格上嘅模範，再因此而以正名去達到管治社會嘅結果，孔子就係想喺亂世當中，重新建立模範，因為周禮嘅原意，就係要以周禮作為模範去指引人去達至理想，甚至我哋可以話，孔子呢一套係模範嘅哲學，去講天嘅模範係人所可以模仿、建立歷史嘅模範、人嘅模範（君子）。用圖表理解就係： 《易傳》：以天作為模範，給予禮制基礎－＞《春秋》：以《春秋》展現模範，重建周禮威嚴－〉《論語》以君子作為模範，重新定義君子為通過禮教培養嘅人格目標 只係胡適喺行文之中無將呢個層層遞進嘅進路明顯咁點出，我希望用兩到三集嘅時間去一步步梳理《易傳》、《春秋》、《論語》之間嘅關係。 喺胡適嘅詮釋之下，孔子重點唔在於建立一個形上系統，就算《易傳》建立一個以天作為模範嘅系統，都係為咗以此從歷史同現實之中去建立一個有內涵嘅模範，去回應只係得返軀殼而失去靈魂嘅周禮，嘗試為呢隻由公元前一千一百年已經開始出現而漸漸衰敗嘅巨獸，去重新灌注一個重視每一個個體嘅精神。今集會分成上下兩部分，上半部分主要會簡介《易經》系統，內容包括： ・胡適話知識份子主要有三種，極端破壞派、極端厭世派同積極救世派，孔子屬於邊種？ 下半部分會由《易傳》入手，去講講胡適以《易經》嘅象同辭建立禮儀法度，內容包括： 一齊用一個新視角去讀《易經》，或者你會驚訝古人嘅想像力，不過無想像力又點能夠由無到有咁發明電腦、網絡呢？你話係唔係啊，蘇菲？啊唔係，應該係朋友先啱。 | |||
| 21 Aug 2022 | EP55 你又唔係我邊個，點解要愛你？儒家點解咁著重人倫？｜《中國哲學史大綱》（十） | 00:49:57 | |
上集我哋提到，要培養仁心，就要內外並進，忠恕缺一不可。如果要簡單總結，忠係回應內心、恕係推展、而仁心就係要愛人。但唔知你有無啲疑問，回應內心都尚算可以理解，但點解無啦啦要推展個仁心出去呢？又或者問，愛自己咪夠，使咩愛人？ 其實呢啲都係好好嘅疑問，最終嘅問題係，孔子開展呢套「仁者愛人」嘅諗法嘅根基在於邊度？孔子嘅文化／哲學根源係源自《六經》，但除咗易傳之外，基本上孔子都只係編訂／修改《六經》，要睇孔子直接表露自己睇法，最好當然係睇返《論語》，但眾所周知，《論語》好少講形上學，而當孔子喺《論語》當中多次被學生問到咩係仁，佢都只係答仁要做乜嘢乜嘢，而無解釋過點解仁者要愛人。 咁並唔係因為佢解釋唔到，而係佢身處嘅時代本來就有一個重要嘅預設，令到愛人成為一個唔需要解釋嘅自然。就好似現代人已經習慣咗私有產權，唔會再問點解要有私有產權，而只會去探討私有產權嘅範圍、內容。所以我哋依家失去咗孔子當時嘅預設，先會問點解要愛人。 個預設就係：人係位於人倫之中。上一集嘅結尾，我強調春秋係中國最後一個貴族社會階段，而將貴族社會解構出嚟其實就只係「天子諸侯─大家族」、「諸侯大夫─中家族」、「大夫士人─小家族」。簡言之，即係整個社會都係由大大小小嘅家族組成。有家族就有長幼之序，有長幼就有牢固嘅階級。一個兒子可以因為正名而唔視血緣上嘅父親係父親，但兒子永遠唔可能成為父親嘅父親，呢個就係所謂嘅牢固嘅階級。人喺家族結構之下，必然會喺人倫當中。仁者，亦需要喺人倫當中活動。如果用呢個背景再去睇孔子對理想人格嘅另一稱呼──君子，相信你會有另一番體會。君之子，本來就係喺人倫當中。處於人倫當中，就需要講恕。今集內容包括： ・仁者除咗講愛人、忠恕，仲要講品格 一齊睇下呢本出現過109次君子嘅《論語》，睇下孔子對仁者嘅人格要求、人倫同人嘅關係。你會發現，原來做人都要考牌。 | |||
| 12 Jan 2022 | EP31《荀子by德尼思化》：荀子性惡，儒門外道？（上集） | 01:51:24 | |
今集係牛某喺2022年錄音嘅第一集，今次我要拋開宋儒、新儒家嘅包袱，以德尼思化嘅文章，去為你講述一個充滿關懷嘅荀子。如果你曾經認為荀子就係講人性本惡、荀子就係儒門外道，咁我今集將會為你帶嚟一個唔一樣嘅荀子，荀子唔係講人性本惡，而係人性向惡，只要分清一個字嘅差別，你就會明白點解荀子係一個儒家，於我而言，比起孟子，荀子係更近孔子嘅儒家傳人。荀子對人性嘅剖析，值得你我重視。 喺開頭會同大家講講香港政府同中國政府喺施政上嘅雷厲風行。然後會講講： 1) 呢集係適逢德尼思化IG突破一萬人follow嘅賀禮，稍稍講下點解想用德尼思化嘅文章 2) 簡介孟子嘅關懷，澄清孔孟根本無講過「性本善」，以及將孔孟詮釋成「性本善」嘅問題 3) 講講荀子同當時嘅時代背景、荀子嘅治學精神同埋荀子點樣被後人片得體無原膚 4) 將荀子〈性惡篇〉剖析，解釋人性向惡嘅原因、偽字對荀子嘅意義同埋狙擊孟子嘅原因 5) 荀子話聖王同暴君同你我嘅性都係一樣，點解? 6) 無論係朱子同王陽明，都有荀子嘅影子，但佢哋都同樣反荀子 7) 牛某化身荀子，力指孟子嘅盲點同展現荀子嘅關懷 好老實講，呢篇同德尼思化嘅合作，可能會係我2022年寫得最好、講得最好嘅講稿，但願各位用時間去慢慢聽。荀子，值得你我去了解。 在此再次感謝德尼思化嘅允許，有時我同戈登探長有啲理解不一，我諗係非常平常，始終每個人理解不一，但希望做到和而不同。 聽到最後有重要消息口述！ (總結於1:29:30開始） | |||
| 28 Aug 2023 | S2EP28 蘇軾人生簡述：躊躇滿志嘅青年，最後用十二個字總結人生丨《蘇軾文選》、〈念奴嬌〉 | 01:03:40 | |
仲記得中學嘅時候學蘇軾，當時教〈赤壁賦〉定唔知〈水調歌頭〉，老師淨係話蘇軾退隱，做官好hea，然後又將蘇軾同莊子扣連，以道家嘅出世去對比儒家嘅入世。所以總有個印象就係蘇軾係道家，道家就出世。
將世界一分為二，易唔易記？當然易記，我依家都記得，儒入道出，琅琅上口。我回憶當時對儒道嘅諗法，就係儒家攞苦嚟辛，道家不負責任。如果唔去檢視呢個「常識」，呢個一分為二嘅印象可能就會伴隨我嘅一生。
所以，我通常唔怪罪人睇唔起中國文化，當學生接受一個咁弱嘅詮釋，試問又點會發自內心咁尊敬呢個文化呢？一套講中庸、講和諧嘅文化，被人講成走向極端，陷入二分，唔係好可悲咩？
中國文化理應係多元而立體，而對立同簡化將會令文化變得片面；如果老師一直以儒入道出教學，咁十年過後，佢就會令幾百人接受一套想像出嚟、無力嘅中國文化。
依家先發現，老師無一句講啱，道家已經係古舊講法、蘇軾有大半人生都係喺官場上為國為民，話蘇軾避世，實在太過輕描淡寫。藉由回顧蘇軾嘅人生，你會發現從蘇軾嘅背影，可以見到儒釋道思想嘅罔兩。
內容包括：
書香世家三門傑
少年得志得第二
多元思想儒釋道
直言極諫陷黨爭
黃州時期偷作閒
年閱三官若飛雁
輾轉南方至海角
面對北歸莫敢還
北宋政治都幾混亂，所以你會見到蘇軾周圍走；另外，有好多年號，因為唔少皇帝早死，蘇軾就做過幾朝臣子。最後，我會用「蘇軾」呢個名總結蘇軾嘅一生。
按：
考評局：「《念奴嬌‧赤壁懷古》是一首懷古之詞，蘇軾借懷念三國歷史人物，抒發個人懷才不遇之情。……，帶出千古以來的風流人物，也如被江浪淘盡，一個個消失於歷史舞台，時間無情，物是人非，感歎悲壯淋漓……借一樽酒沉醉江月，遣懷消愁。」
某：消失於歷史舞台，係被遺忘，但係蘇軾正正係記住公瑾小喬。總結再講。
出錯修正：
蘇軾應出生於宋仁宗景𧙗三年12月19日
我錯讀為宋熹宗，十分抱歉
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】
| |||
| 28 Feb 2022 | EP37 人慈、人類大歷史與盧梭，從科學角度，彼此印證｜《人慈》（四） | 01:14:14 | |
上一集我哋終於講完盧梭對人類演化嘅理解，由孤獨野人、到家庭野人、到部落野人、到高貴野人、到霍元甲、再到利維坦凌駕每一個人。今集，我哋就要由人慈同埋人類大歷史嘅考古發現去反思到底盧梭所講嘅人類起源啱唔啱呢？ 我哋從考古發現當中，發現原來呢個世界以前除咗智人（我哋）之外仲有其他人種，當中，尼安德塔人有住比智人大嘅大腦、而對比智人bb 同其他動物嘅認知能力又睇唔出智人有咩出眾嘅地方，有啲方面甚至比黑猩猩仲要差，到底智人點樣喺脫穎而出、喺所有其他人種都消失嘅時候，一枝獨秀呢？今集內容包括： • 對比智人、尼安德塔人同動物嘅天生能力，原來智人嘅天生能力無咩突出之處 到最後，多謝聽眾嘅疑問，我會一字一句為你解釋，到底人性向善係咩意思。下一集會同你一齊睇下人性向善之下，出現人做出禽獸不如嘅事又係點解。 | |||
| 13 Aug 2022 | EP54 「忠恕」二字可總結儒家？咩叫「吾道一以貫之」？｜《中國哲學史大綱》（九） | 00:37:08 | |
講完《易經》由簡變複雜、《春秋》嘅正名主義，今集要講講孔子嘅忠恕之道。忠恕可以話係儒家非常重要嘅工夫概念，即係君子嘅目標就係要實踐到忠恕，曾子甚至話「夫子之道，忠恕而已矣。」但你可能會覺得奇怪，忠心同寬恕點解咁重要呢？明明忠心好容易變成愚忠、寬恕好容易變成左膠。其實咁係因為我哋口中嘅忠恕經歷二千幾年嘅洗禮，意思已經同古人截然不同，今次就要同你返返去古人嘅語境，講講儒家口中嘅忠恕係咩意思。如果你了解到儒家嘅忠恕，或者你就會明白忠恕係由古到今都一樣適切嘅修養方式。今集內容包括： ・其實，忠，係要中你嘅心、恕，係要如你嘅心，並非要人愚忠左膠 如果你為世事幻變，感到無所適從，或者孔子所講嘅一以貫之就有助你喺浮沉中感到安定。 | |||
| 12 Apr 2025 | 二十世紀關稅戰引爆大蕭條？經濟史家：大蕭條呢隻鑊，關稅揹唔起！「與大眾理解相反，大蕭條不是《斯姆特──霍利關稅法》造成的，甚至也沒因為它而加重多少」丨有文有路（6）丨《貿易大歷史》 | 00:21:20 | |
最近見到有人因為特朗普祭出嘅全球關稅，擔心會令大蕭條再現。佢哋嘅論點係1930年到1933年嘅《斯姆特──霍利關稅法》（Smoot-Hawley Tariff）將關稅推高，以致美國貿易失去動力，結果造就出1929年開始嘅美國大蕭條。 呢種講法，聽落係幾有文有路，但實際上對應唔到經濟學家嘅研究結果。今次有文有路，我會用財經及貿易史作家威廉．伯恩斯坦所寫嘅《貿易大歷史》，同你回顧一下二十世紀嘅關稅大戰——大蕭條呢隻鑊，關稅實在係揹唔起。伯恩斯坦講到：「在所難免的結論是：與大眾理解相反，大蕭條不是《斯姆特──霍利關稅法》造成的，甚至也沒因為它而加重多少」——要明白《斯姆特──霍利關稅法》嘅影響，我哋先要了解關稅喺工業革命後點樣成為貿易嘅常態…… | |||
| 19 Dec 2021 | EP29《25座二戰紀念碑教我們的事》：我迷失在這場歷史遊戲中（尾集） | 01:29:41 | |
《25座二戰紀念碑教我們的事》：猶太人最後嘅提醒 上集提到韓國同日本喺慰安婦一事之中，韓國作為一個受害者，多年嚟想向日本呢個施害者討回公道。而今集嘅受害者數量更大，所得到嘅待遇亦折然不同。二戰時嘅猶太人唔係被狂暴嘅軍人殺害，而係被冷血又冷靜嘅理性所諗出嚟嘅大規模殺穆方式所殺害，強逼我哋去思考，點解德國黨衛軍自己發明出毒氣室去誅殺眼前嘅猶太人。 今集會去講下尼德蘭(荷蘭)、匈牙利同波蘭點樣去以紀念碑去記住六百萬猶太人嘅亡魂。 我哋先會講講尼德蘭嘅國家紀念碑拒絕將猶太人納入自己嘅民族受難之中，唔願意承認猶太人喺集中營嘅苦難，而時移世易，我哋發現國家紀念碑原來唔再係猶太人嘅忽視，而係重視猶太人命運嘅開始，點解會咁? 然後，我哋再講匈牙利以德國占領遇難者紀念碑去形塑受傷者嘅形象，但歷史學家同民間都共同承認匈牙利喺二戰當中同德國合作嘅過去，匈牙利幾乎無受過納粹嘅催殘，實際上，匈牙利同德國合作，用四個月將超過四十萬猶太人送到德國/波蘭赴死。民間面對政府以紀念碑企圖以紀念碑去建構一個虛假嘅歷史，以紀念碑對抗紀念碑，到底講梗咩? 最後，講返一百萬猶太人魂斷嘅地方，奧斯威辛。我會為你講講奧斯威辛喺德國治下嘅歷史、毒氣室嘅由來、德國黨衛軍嘅哲學基礎。一齊同牛某思考呢場冰冷嘅屠殺，相信你下次嘅歐洲之旅，會不再一樣。 | |||
| 02 Oct 2022 | S2EP1 蘇聯最後領導人戈巴卓夫點解要推「新思維」，搞到蘇聯解體？｜《戈巴契夫冷戰回憶錄》（上） | 00:18:17 | |
牛哥講經依家有埋YouTube喇！有興趣記得去睇！ 今集，要同大家講講親手結束冷戰、解散蘇聯嘅男人——戈巴卓夫嘅自述。呢一本書係《戈巴契夫冷戰回憶錄》（戈巴契夫係台灣譯名，我會用返戈巴卓夫）。 戈巴卓夫係一個傳奇人物，佢喺1931年出生於農民家庭，經歷過1932年蘇聯大饑荒，妻子係莫斯科國立大學哲學系學生，最為人熟知嘅，當然就係佢係最後一屆蘇聯共產黨中央委員會總書記（1985年3月15日－1991年8月24日）。戈巴卓夫不斷推行「改革重組」同「新思維」，令蘇聯開始同西方建立和平關係，仲因此喺1990年得到諾貝爾和平獎。政治上嚟講，佢將一黨制嘅蘇聯，推向西方嘅多黨制、總統制。而佢亦喺政制改革之後，成為第一屆同最後一屆蘇聯總統（1990年3月15日－1991年12月25日）。 喺佢總書記同總統嘅任期裹面，見證住美國同蘇聯放棄軍事競賽、東西德統一、1991年12月26日嘅蘇聯解體，象徵冷戰嘅徹底結束。而蘇聯嘅解體，可以話注定近年俄羅斯同烏克蘭嘅衝突。到底戈巴卓夫係咪蘇聯解體嘅罪人呢？ 戈巴卓夫嘅「改革重組」同「新思維」並唔係以蘇聯解體作為目標，但係佢的確給予咗蘇聯解體嘅可能。2006年，喺戈巴卓夫75歲生日嘅時候，曾經有記者問佢： 戈巴卓夫答： 點解要放棄穩固嘅體制，以地球最大嘅國家冒險去「改革重組」同推動「新思維」？呢本《戈巴契夫冷戰回憶錄》，就係戈巴卓夫自己去回憶作為蘇聯總書記同總統嘅經歷同諗法，你可以喺當中得到屬於戈巴卓夫嘅答案。佢嘅視角所陳述嘅世界，可能會同你有所不同，但你可以了解到點解喺佢嘅任內會結束冷戰，同一個蘇聯高層改革者嘅視角。 戈巴卓夫仲為呢本書嘅中文版寫咗個序，日期係2022年3月。而佢本人喺2022年8月30日因病離世，享年91歲。依家，或者係一個好好嘅時機去檢視呢位改變世界嘅政治家。今集內容包括： ・簡述蘇聯內部對新思維嘅睇法 | |||
| 19 Sep 2024 | S2EP47 沙特哲學簡介（2）：從否定探索自由。喺cafe見唔到Pierre，但見到西方哲學所未見嘅「nothing」；嘗試否定一切，最終發現有一樣嘢係唔可以否定！？丨《存在主義哲學新編》 | 00:55:57 | |
喺沙特哲學簡介（1），我哋提及到存在主義係為咗協助人恢復自我，而我哋亦都會見到沙特對於自由呢個概念非常著重。其實，沙特係用緊對自由嘅重新定義、理解，幫助人恢復自我。我哋可以喺《沉默的共和國》見到，沙特讚譽對極權說「不」嘅法國人，呢種向極權說「不」，係一種行動，而沙特哲學更想探討呢種否定，同自由之間嘅關係。 基於沙特對否定嘅重視，勞思光甚至將沙特稱為「否定哲學的哲學家」（「有人說沙特—《存有與空無》一書的作者——應該稱作「否定哲學的哲學家」，這是不算過份的。」（勞，頁88））若然話，笛卡兒嘅「我思故我在」，係用「懷疑」（「我思」）嚟作為佢嘅哲學嘅基石（詳情聽返笛卡兒嗰集），咁沙特就係用「否定」嚟作為佢嘅哲學嘅基石，因為佢認為人類最根本嘅活動，就係「否定」。我哋會喺正文慢慢講到沙特講述最根本嘅活動嘅引文。 今集，我哋會透過簡單對比唔同嘅西方思想點睇「nothing」呢個概念，以及沙特所舉出嘅著名例子——喺cafe見唔到Pierre，睇下沙特點睇「否定」，內容包括：
按：勞思光會繼續用情意我，大家大致上可以以「有執著嘅主體（感受）」嚟理解先。 | |||
| 10 Apr 2022 | EP43 墨家好似宗教組織？墨子講天講鬼講兼愛，其實都係爲咗實現尚同社會｜《中國哲學史大綱》（三） | 01:04:22 | |
墨子雖然又有科學精神、又講邏輯，但其實佢諗法之中嘅宗教成份好重，依賴住天志，令佢可以奉獻個人俾天下、喺刻苦當中去品嚐甜美。呢層就唔知道係唔係因為墨子對於宗教嘅感召好大，定係佢因為當時嘅社會背景而借用宗教去將理念實踐。墨子以天志、兼愛、非攻、明鬼、非命、節葬、非樂、尚賢、尚同，簡單兩個字嘅概念，就對應時弊、對照出每一個尋常百姓卑微嘅仁心，呢個就係墨子對百姓困苦嘅體察、呢個就係墨子喺諸侯以外去建立一個追求和平嘅勢力嘅基礎。呢一集，我哋一齊用系統理解一下墨子由宗教感動而嚟嘅思想。內容包括： ・先講講天志嘅內容 內容節錄： 「我哋可以見到陽文君認為自己係替天行道，所以咁就係義嘅行為。但墨子指出，替天行道其實只有兩個可能性，一，係唔相信天但以天嘅名去打人； 二，相信天而又話要替天行道只係好似幫鄰居教訓個仔，多管閒事。而陽文君即使義氣凜然咁講出替天行道，仍然只係講出義嘅名，而唔知道義嘅取。」 「天只係人兼愛嘅根源，鬼神只係賞善罰惡嘅保證。天無論幾想人去兼愛，鬼神就算點保證果報，路都係由人自己行出嚟。胡適總結得好好，「禍福全靠個人自己的行為，全是各人的自由意志招來的，並不由命定。」（本書，頁182）正正因為咁，墨子先相信人有能力去改變睇落無可能改變嘅嘢，社會依家睇落好混亂、好多戰爭？墨子或者會同我哋講社會只係由好多個自由意志組成，每一個自由意志都有可能兼愛，咁社會亦有可能兼愛，所以混亂唔係命定，人一定有能力改變，呢個係墨子給予人嘅信心。」 「而墨家嘅思想的確好能夠可以好似教會咁深入到當時平民百姓嘅心，因為無論咩國強咩國弱都好，只要一日國與國之間仲有戰爭，直接受苦嘅一定係平民百姓，貴族發起戰爭，但犧牲嘅就係平民。墨家嘅「非攻」思想最受惠嘅就係平民百姓，咁平民百姓愛好、投身到墨家當中就唔難理解。亦正正因為墨家嘅影響力咁大，所以墨子先可以同楚王「講數」。墨家，因為緊貼當時人民嘅苦楚，成為諸侯（政治勢力）以外嘅宗教力量，有住赴火蹈刃嘅弟子去守備弱國，呢一個以卵擊石強逼我哋去思考：如果北宋行政良善，咁又點會有梁山泊上嘅一百零八個好漢呢？墨子面對一隊隊軍隊所築成嘅高牆，選擇走到當時無知無助嘅百姓面前，阻止軍隊去蹂躪弱小。呢一種行為唔通唔係仁心嘅表現咩？我嘅問題係，同墨子同時代嘅人，仲有邊個比墨子更能夠表現出仁心呢？」 | |||
| 15 Jan 2025 | 牟宗三思想入門（2）：從齊克果睇出基督教精神；存在主義向上一翻就係中國哲學？──《中國哲學的特質》丨中哲共讀（15）丨廣東話讀書會 | 02:18:45 | |
建議到Spotify/patreon睇片 原片： https://www.youtube.com/watch?v=d7ap9b3UfAk&t=4864s 第18集已經改善錄音，暫時請忍耐 逢星期三夜晚九點直播 IG投票係牟宗三嘅《中國哲學十九講》勝出，但《中國哲學十九講》有前傳——《中國哲學的特質》。 《中國哲學的特質》嘅第一講最後提到存在主義，而牟宗三喺《人文講習錄》講到：「所以對我們了解中國自己之學問而言，存在主義是一刺激、一挑戰，從它那裡再進一步往上翻，則良知心性可徹底透露，全體放光。」《人文講習錄》，頁179 所以我會喺呢度講講中國哲學同存在主義之間嘅關係。 00:00 開始，緣起 09:21 中國哲學，能講乎？ 37:52 中國哲學之形態與特質 1:12:36 齊克果 1:23:48 牟宗三回應齊克果 1:43:19 總結 唔經唔覺就搞咗15次中國哲學嘅讀書會 原本搞「中哲共讀」呢個系列都係想逼下自己讀書，做做下又發覺幾有意思。 途中認識到唐君毅同牟宗三喺二十世紀諗住整個「人文友會」，而佢哋事實上真係試過做，牟宗三喺臺灣搞過五十一次嘅聚會，就係想每一兩個星期都可以有一次聚會，等對中國哲學有興趣嘅人可以聚首一堂，定期咁接收下中國思想嘅薰陶。而其中一次人文友會嘅對話令我印象好深： 吳自甦問：「在我們這個聚會裡，實能有一種恬靜舒坦的意味。我每次參與，雖未得到一定系統的知識，然總覺得愉快。其意義我也說不出，過後也就忘了，現在才略覺其意義。」 牟宗三答：「這就是好消息，有此愉快之情，須能覺察其意義，此後雖可有間斷，然不致全忘了，時時提撕、時時警策，便可從此了悟許多眞理。」 讀中國哲學未必當下就明到，經過年月，慢慢就會略覺意義，又感到恬靜舒坦。 「中哲共讀」當然遠遠唔及「人文友會」，但我希望「中哲共讀」可以做到超過五十一次，甚至一直做落去。 2025年1月1日就係第16次嘅「中哲共讀」，今年唔知完唔完成到五十一次呢？ | |||
| 18 Nov 2021 | EP24《25座二戰紀念碑教我們的事》：我迷失在這場歷史遊戲中（預告） | 00:12:30 | |
今集係一個新嘗試，喺講一本新書之前，為你做個預告，等你知道本書大概講啲乜，睇你有無興趣一齊睇/聽埋落去。 近排有推倒同埋起紀念碑嘅風潮，一方面不停推冧紀念碑，一方面又開始歌功頌德去起新嘅紀念碑。一齊聽下《25座二戰紀念碑教我們的事》嘅預告，聽下作者對一舊舊嘅紀念碑有咩睇法！或者你會發現，一個人點樣去看待一座紀念碑，其實好代表佢係一個乜嘢人。 內容節錄： 「所以每一個被保留嘅雕像，其實係象徵住一個想被人記住嘅故事，而被保留嘅故事，就係呢個社會入面嘅大眾/政府想去推崇嘅價值觀，換言之，就係將價值觀依附喺堅固、忠誠嘅石頭之上，希望呢個價值觀能夠同石頭一樣，天長到地久......」 「真實發生過嘅二戰，就成為整個西方世界嘅共同神話，呢個共同神話令到書中嘅五個部分環環相扣，唔知呢一段嘅集體記憶、傷痛能唔能夠抵禦到呢次破壞偶像嘅風潮呢?」 | |||
| 28 Nov 2021 | EP26《25座二戰紀念碑教我們的事》：我迷失在這場歷史遊戲中（中集） | 01:11:39 | |
今集，開頭會記錄一下12月9日嘅全面推行安心出行，同埋林鄭月娥想回復殖民地時期總督嘅職責，正式內容會喺06:15開始。 今次繼續要講嘅書係《25座二戰紀念碑教我們的事》，要講嘅國家係美國，我哋依家成日會稱呼美國做美帝，當然，佢的確係世界上嘅強國，但其實佢嘅強大，同二戰有好大嘅關係。 雖然美國同其他國家都同樣參與到戰爭當中，但美國一來無發起所謂嘅「不義之戰」，所以無戰敗國嘅懊悔、慚愧，二來亦無好似歐洲戰勝國咁，被人以閃電戰佔領/轟炸機大量投彈，所以無好似歐洲戰勝國以血肉咗換取勝利之後嘅悲情，所以美國喺二戰之後基本上別樹一幟，可以話係唯一一個抬頭挺胸嘅戰勝國。然後你會發現呢個背景同今日嘅美國有好大嘅關系。 喺第三章，作者講到海軍陸戰隊戰爭紀念碑，喺呢座紀念碑我哋可以了解到，美國將美軍當成英雄，列根甚至稱美軍係基督大軍，到底點解咁誇張？紀念碑點樣將美國精神注入？呢個美國精神，其實代表住咩？當我哋將祖國召喚同海軍陸戰隊戰爭紀念碑對比，你就會發現相同同相異之處，十分有趣。 喺第四章，講到麥克亞瑟將軍紀念碑，呢座紀念碑被菲律賓人所稱頌，甚至神化呢個外國人將軍，基本上當咗佢係jesus，但當我哋重掘出麥克阿瑟嘅歷史，會發現呢個英雄有唔少嘅污糟事，其實呢啲歷史對菲律賓人又有咩所謂？英雄係一個symbol，係一個希望，無論菲律賓人定菲律賓政府都需要一個英雄，咁麥克亞瑟就有企喺菲律賓嘅價值。 最後我會為大家總結一下第一至四章，紀念碑同人類文明之間嘅關係，更會為你揭露，我哋每個人內心嘅嗰座紀念碑，好可能係啲咩（聽到最後，會稍稍講講朱子嘅理解）。 「當我哋去留意下紀念碑上嘅陸戰隊隊員，除咗最頭嗰位係插梗旗，其餘隊員舉手嘅神情，好似人向上天祈求一樣，最後一位隊員想掂又掂唔到旗桿嘅狀況，作者更認為會令人聯想到Michelangelo嗰幅亞當向上帝伸出手指嘅畫。」 「而佢留咗喺巴丹島捱餓部隊，就有一首歌去記念麥克阿瑟。 「但世界有幾多嘅文明被時間消滅，而又無人能知道當中嘅故事？ 就好似西夏王陵嘅金字塔到今日仍然存在，但佢嘅故事係一個空白，亦無人再講得出內容，自從蒙古滅咗西夏，無人知佢點起、點解起，佢哋好可能都係一個大型嘅讚頌英雄嘅紀念碑嚟，只係今日佢哋無再述說任何故事，變得沉默。」 心事解難： 問：why hk ban drug? moral or harm? 分享：好多人移民 | |||
| 31 Jul 2022 | EP53 春秋只轉載要事？孔子正名有意義！｜《中國哲學史大綱》（八） | 01:05:55 | |
孔子寫出春秋時期最令人聞風喪膽嘅史書，提出最貼地嘅制約君主方法 喺Ep.52，我哋提到孔子以《易傳》增加《易經》嘅哲學意義，無論係象定係辭都係想建立一種模範，從而表明一種正名主義——先定義咩係好，再指名咩係好、咩係唔好。今次就用《春秋》去講講正名主義，《春秋》嘅文本係源自魯國嘅歷史，但經過孔子嘅手之後，《春秋》就唔再係一本簡單嘅歷史書。胡適總結出正名主義有三大作用，正名字、定名份、寓褒眨，而我哋可以喺《春秋》當中清晰咁見到正名字、定名份、寓褒眨呢三個作用。 讀過《春秋》嘅人，其實都會明白平民作亂既可以係叛亂、可以係起義，亦因此明白對一個行動嘅稱謂嘅重要。如果唔讀《春秋》，你唔會懷疑點解明朝燕王朱棣反叛建文帝係叫靖難之變，最後成為明成祖；而當年同朱棣一齊反叛建文帝嘅寧王朱權，佢嘅五世孫朱宸濠反叛朱棣嘅七世孫朱厚照（明武宗），最後王陽明鎮壓寧王朱宸濠，史稱就係寧王之亂。呢一切未必係簡單一句嘅成王敗寇就能夠解釋得到。今集內容包括： ・孔子認為治國首先要正名，點解咁重要？ 希望你聽完呢集之後，會明白孔子點解寫《春秋》、當然都可以依然怪罪孔子寫《春秋》。《三國志》記載關羽成日睇住《春秋》嘅變體——《左傳》，仲睇到識背（「羽，好《左氏傳》，諷誦略皆上口」 《三國志・蜀書・關羽傳》）；王陽明話：「以言其誠偽邪正之辯焉，則謂之《春秋》。」一本《春秋》可以分正邪。到底孔子喺《春秋》入面加咗啲咩呢？咁就要聽埋落去。 | |||
| 01 Jul 2023 | S2EP24 全港最簡明康德入門（上）：勞思光以基源問題，一語道破康德核心思想；牛某用一幅拼圖，話你知康德點樣從哲學廢墟中開出新路丨《康德知識論要義》 | 00:52:10 | |
康德哲學係一座大山。威爾・杜蘭喺《哲學的故事》講到： 「研究康德的哲學時，這世上我們最不願做的一件事，就是去讀康德自己的著作。我們的哲學家像又不像耶和華，彷彿是從雲端在對你講話，只是沒能配上耀眼閃電雷霆萬鈞的氣勢；他蔑視具體實例，他的說法是，因為它們會讓他的書中內容顯得過多。（在經過如此的壓縮之後，這麼精簡的一本書也包含了約莫八百頁的內容）」 勞思光亦講過： 「這本書｛純粹理性批判｝本身就是頭緒紛繁。許多論證重複得次數太多，另一些則常常匆匆說過。」 即係有啲論證老是常出現，有啲論證好似無論證過咁。常人如你我，要閱讀康德原文會係非常痛苦。 所以，我會同你用勞思光嘅《康德知識論要義》當中嘅「基源問題研究法」，去睇下康德喺《純粹理性批判》（簡稱一批）嘅藍圖，搵出貫穿康德嘅中心思想，從繁重文本當中理清一條道路。 所謂簡明，我會用唔同比喻幫你理解康德；因為入門，我唔會亦唔可能解釋所有論證。 我主要會將唔同部分嘅推論結果組合，話畀你聽，如果我哋接受唔同部分嘅推論結果，咁就會同康德一樣，可以為知識劃界。 今集會分成四個部分： 第一部分係「重智傳統」。講講西方主客問題嘅難關。 第二部分係「難讀之書」。從字詞歧義、句子矛盾、康德長氣講下點解康德咁難睇。順便睇下康德對於「經驗」嘅兩層睇法。 第三部分係「基源問題」。睇下勞思光點樣用基源問題一語道破康德核心思想，我哋都會睇下康德一批嘅結構，從結構分析康德嘅思想進路。 第四部分係「康德要義」。我會用拼圖幫你理解康德點樣突破前人所製造出嚟嘅困局。 分咁多個部分，係畀大家有多啲休息時間。 | |||
| 24 Sep 2023 | S2EP30 點解朋友苦口婆心嘅正向思維，唔及心理諮商師嘅沉默聆聽？丨《蛤蟆先生去看心理師》 | 00:32:22 | |
如果大家有行開書店，應該都會見到呢本《蛤蟆先生去看心理師》嘅身影，佢都頗為暢銷。《蛤蟆先生去看心理師》嘅暢銷，一方面，顯示住人對精神健康關注多咗，固然係好事；另一方面，說明佢所代表嘅議題受到關注，當一個議題會受到關注，往往係佢已經成為咗一個問題。 換言之，越嚟越多人發現自己或者身邊人嘅精神健康有困擾，先會關注精神健康。 藉由大眾對於精神健康同心理諮商師嘅好奇，配合輕鬆嘅動物故事，《蛤蟆先生去看心理師》打動咗唔少讀者。呢本書對兩類人特別適用。 1）如果你身邊有一個唔開心嘅蛤蟆先生，你應該會從呢本書中見到錯誤示範同正確示範，咁你就可以避免地雷同學識嘗試轉變態度對待蛤蟆朋友； 2）如果你本人就處於蛤蟆先生嘅憂鬱狀態，你應該會有時同蛤蟆先生感同身受，因為蛤蟆先生喺故事當中會受到唔少委屈同不被理解……心理諮商師到底會點樣從中協助呢？係唔係真係咁神奇地可以從對話就可以理解到蛤蟆先生呢？ 今集內容包括兩部分：
依家，一齊進入蛤蟆先生嘅故事啦！放心，呢集會幾輕鬆。 | |||
| 26 Oct 2024 | 審判蘇格拉底（下）：蘇格拉底嘅另一面，居然係一個詭辯家？最唔怕死嘅哲學家vs雅典議會嘅政治審判，到底蘇格拉底係被雅典民主所殺，定係「自殺」呢？丨哲學即食麵（3）丨黃方剛，《蘇格拉底》、《認識世界：西洋哲學史卷一》 | 00:16:29 | |
依家，我哋主要會用蘇格拉底嘅朋友或者弟子嘅描述，了解蘇格拉底嘅事蹟同形象。但呢啲作品多數都係蘇格拉底死後先完成；喺蘇格拉底在生嘅時候（公元前423年），蘇格拉底已經喺年輕明星劇作家亞里斯多芬（Aristophanes）嘅作品——《雲》（Die Wolken）當中出現。呢個故事係一部喜劇，仲喺詩人比賽中得到第三名，個故事大概係咁： 有一個陷入財務危機嘅大地主拜蘇格拉底為師，想學習喺法庭上面對債權人嘅時候，為自己辯護嘅最佳方法。點知，大地主資質唔好，學極都學唔好，於是佢就將自己個仔送畀蘇格拉底教。點知大地主個仔學完之後，唔單止無幫父親辯護，仲反過嚟攻擊父親，仲話自己母親都應該被打。大地主見到蘇格拉底嘅壞影響，所以放火燒咗佢間屋。 荒唔荒謬？荒謬。喺《雲》呢部作品之下，蘇格拉底嘅形象同我哋依家所理解嘅詭辯家無咩分別，為權貴服務，仲指鹿為馬。好可能呢一切形象都唔係真確，但《雲》呢部作品卻好大機會顯示住當時嘅人，對於蘇格拉底嘅印象——蘇格拉底能夠用說話擾亂人心，帶嚟倫常混亂。 甚至，我哋可以想像，如果對於蘇格拉底嘅描述，就只有《雲》呢部作品，咁我哋今日應該唔會再記住蘇格拉底、將蘇格拉底稱為重要嘅西方哲學家。（《認識世界：西洋哲學史卷一》（臺北：商周出版，2021年3月），頁110） 好彩嘅係，我哋今日有科林斯嘅色諾芬（Xenophon）所寫嘅《蘇格拉底追思錄》，以及柏拉圖嘅種種作品。以致我哋可以還原蘇格拉底面對審判時候嘅情境（雖然都未必係真），而雅典民主殺死蘇格拉底嘅呢種講法，或者有啲粗淺，甚至，有人會話，蘇格拉底可以算係「自殺」…… | |||
| 17 Oct 2021 | EP19《奴隸哲學家的人生通識課》：Stoic話你知點樣喺枷鎖中活得自由（上集） | 01:14:13 | |
當我哋提到孔子面對天命嘅限制嘅時候，唔知你會唔會去諗，既然天命之於人係咁大，咁到底人可唔可以擁有自由呢？而當孔子喺失意嘅時候哭泣，你又會唔會諗，聖人都喊，咁自己面對失意，係咪都要喊埋一份？哲人面對情感，到底同普通人有咩分別？ 自由同點樣面對情感，的確係一直以嚟都係困擾好多人類嘅問題。今次我哋將目光放到西方，去睇睇同儒家有幾分相似嘅Stoic係點樣思考自由同情感。呢次講嘅書係《奴隸哲學家的人生通識課: 在處處受限的人生裡, 活出自己的形狀》，你無睇錯，個哲學家真係奴隸嚟，佢個名係Epictetus，但到底一個奴隸點樣活出自由同自在呢？我諗，有唔少香港人需要向呢位哲學家偷師。 今集主要會講下stoic 呢個學派嘅背景，內容包括：
1)情緒嘅主人定奴隸 而牛哥更會用儒家同stoic 互相溝通，務求帶俾你一個更勵志嘅哲學。 註：今集最尾有回應聽眾心事，所以會睇落有啲長 （正式內容由5:00開始。） | |||
| 16 Jan 2025 | S2EP51 《心經》基本前置知識（下）：略講般若。空理係大乘佛教嘅革命？一個「空」字，串連「因緣和合」同「三法印」丨印順法師，《般若波羅蜜多心經講記》、《中觀今論》 | 00:56:38 | |
我哋上集主要講咗《般若波羅蜜多心經》嘅「波羅蜜多」。今次，我哋就要講一講箇中嘅「般若」。印順法師認為，般若雖然內容上深細難了，但亦可以日常見聞當中去入手了解。 我哋喺S1EP1-3嘅集數，講到一行禪師表述「互即互入」(inter-be)呢個概念。今次，就聽下印順法師點講。 今集內容分成咗四個部分。 第一部分，係「原因條件的假合」。我哋會開始講講印順口中嘅原因條件的假合係咩意思，分別解釋因緣同和合嘅意思，亦會用西方嘅substance作對比。我哋可以用兩個英文單字，捕捉傳統西方哲學同佛學對「物」嘅理解嘅分別。 第二部分，係「三法印」。我哋會以三法印嘅意思，嚟深化「原因條件的假合」嘅內容。 第三部分，係「空的革命」。我哋會用般若串連因緣和合、三法印，大乘佛教更視空為「充滿革命的積極性」。 第四部分，係「我執，法執」。最後，我哋就要睇下空同我執、法執嘅關係。 呢集有相當難度，建議各位配合文稿一齊睇。另外，呢集係先難後易。 | |||
| 07 Oct 2024 | 【會員Podcast 全集公開！】牛哥讀經（9）丨梁啟超1丨「做工苦，難道不做工就不苦嗎？」——其實返工，係為咗消除更大嘅痛苦！？丨〈敬業與樂業〉 | 00:21:26 | |
歡迎你嚟到《牛哥讀經》嘅第九集，今集係梁啟超系列嘅第一集。我哋講下梁啟超最勵志嘅演講——點解要返工。 梁啟超呢篇文章好出名，有時會出現喺教科書當中。我當然唔認為各位必須信服梁啟超嘅說話，只係人可以喺一生中搵到可敬、可樂嘅事物或者人物，的確會充實得多。 等我哋一齊重溫一下梁啟超點樣解釋「凡職業都是有趣味的，只要你肯繼續做下去，趣味自然會發生。」 https://zh.wikisource.org/wiki/%E6%95%AC%E6%A5%AD%E8%88%87%E6%A8%82%E6%A5%AD | |||
| 17 Mar 2025 | 《逃避自由》共讀（2）：個體化與自由之辯證：從初始連結到現代社會。伊甸神話代表人獲得積極自由；人生，就係一場投入自由同孤獨嘅旅程丨得閒讀書會（4） | 02:08:50 | |
逢星期三夜晚九點直播建議於Spotify/ patreon觀看 原片：https://www.youtube.com/live/aEuoobxhIkA?si=JLwUcL79J_qBbVJW patreon: https://www.patreon.com/cowgortalk 本集章節： 00:00 開場白 08:26 引子：變動自由與個體化過程 23:21 生命歷程 40:32 「個體化過程」之兩個面向 01:02:49 物種發展史：消極自由的獲取 01:22:07 伊甸園：積極自由的實現 01:36:51 自由史：中世紀到現代 01:46:34 總結 | |||
| 31 Jul 2021 | EP9《鄰人》：二戰期間波蘭人親手屠殺猶太人嘅故事，卻至今仍唔被承認（下集） | 00:40:46 | |
2021年嘅七月到尾聲，亦係奧運開始嘅時間，今集牛哥會同各位分享一下對奧運嘅睇法，而一如以往，我嘅諗法係會比較抽離，想法可能會同各位唔同，如果想法唔同，希望各位可以同我交流一下，相互啟發。 | |||
| 26 Jun 2024 | 【會員Podcast 全集公開！】生活雜談EP14丨宗教起源2丨探索三萬年前嘅原始宗教，進入洞穴聖所，跟隨薩滿連結另一個世界……丨《造神》第一章 | 00:54:13 | |
上次，我哋提到《造神》呢本書會「大範圍咁探討信仰同宗教嘅歷史」，咁到底個範圍要去到幾大呢？ 作者決定，由第一個人類開始講起（作者：亞當同夏娃嘅故事）。要了解人類同宗教嘅關係，就要使用唔同學者對洞穴壁畫嘅研究成果，從洞穴壁畫探察初民嘅心靈故事。 今集內容包括六個部分：
| |||
| 23 Jan 2023 | S2EP11 天皇以玉音放送，親自埋葬人民嘅理想；《日本最漫長的一天》，顯示神話原型最後嘅綻放同沒落｜日本二戰簡史（下）｜《日本最漫長的一天》+《戰後的日美同盟真相》 | 00:47:10 | |
早喺1931年，日本就藉由九一八事變控制中國東北地區，更喺1932年協助成立偽滿洲國，所以直到1945年，日本已經起碼侵佔中國東北達15年之久。喺1941年日本更氣勢洶湧地宣佈「大東亞戰爭」，就係想以中國東北作為跳板，一統整個東亞。佔領嘅時間同野心，顯示當時日本陸軍嘅軍人並無任何打算放棄中國東北。 決心投降嘅裕仁天皇同內閣當然知道士兵同人民會對投降感到無所適從，所以天皇作出咗史無前例嘅舉動──喺1945年8月15日正午時分，天皇本人去朗讀《終戰詔書》，要求人民同軍隊停戰，史稱「玉音放送」。當日，係日本人民第一次耹聽到天皇嘅聲音。而「玉音放送」嘅出現同日本投降，決定天皇自始要一步步褪去神聖。 今集，我哋就係要透過《日本最漫長的一天》同孫崎 亨嘅《戰後的日美同盟真相》，講述唔同嘅軍人點樣面對天皇嘅「玉音放送」，呢一日點樣改變日本國體、以及原型最後嘅綻放同殞落。 今集內容包括： 1. 「宮城事件」嘅經過同結果 | |||
| 16 Dec 2024 | 【Youtube直播重播】〈魚我所欲也〉逐字解（DSE考生勿入），DSE範文入面最霸氣嘅文章。孟子：你有啲所欲，重要過生命。順便講下告子唔係低能，教下大家點睇文言文──《孟子・告子上》丨中哲共讀（12） | 01:32:50 | |
按：patreon免費會員都可以睇到自動字幕 Spotify 都可以睇到條片 逢星期三夜晚九點youtube直播 IG投票係牟宗三嘅《中國哲學十九講》勝出，但我要時間預備，所以用〈魚我所欲也〉嚟過場。 00:00 開頭，講講〈告子上〉嘅背景 22:18 去到〈魚我所欲也〉正文 46:17 補充孟子、徐復觀對「性」「命」嘅理解 57:41 去返〈魚我所欲也〉後段 1:21:13 總結 閱讀材料： 《孟子・告子上》 | |||
| 07 Feb 2025 | 牟宗三思想入門（5）：孔子之前，有三句說話奠定咗內在超越之路，孔孟陽明都係呢條路嘅繼承者──《中國哲學的特質》丨中哲共讀（18）丨廣東話讀書會 | 02:18:45 | |
逢星期三夜晚九點youtube直播 建議於Spotify/ patreon觀看 原片：https://www.youtube.com/live/vTCnRomc-JY?si=PJigxjUN6ZaE2zox patreon:https://www.patreon.com/collection/765634 繼續講《中國哲學十九講》前傳——《中國哲學的特質》。 本集章節： 00:00 開講、內容回顧 07:21 第一句 01:10:00 第二句 01:29:52 第三句 1:33:12 總結 1:59:01 問答環節 閱讀材料： 《中國哲學的特質》 第四講 〈天命下貫而為「性」〉 🐮 Follow IG：https://www.instagram.com/cowgortalk 🐂 加入讀物農莊，一齊閱讀，一齊討論！ https://www.patreon.com/cowgortalk 【文稿可於Patreon免費閱讀】 【聽Podcast】 🎧 Apple Podcast：https://podcasts.apple.com/podcast/id... 🎧 Spotify：https://open.spotify.com/show/0yFR7YK... 🎧 Google Podcast：https://bit.ly/3Cknf1m 🎧 KKBOX：https://bit.ly/3RneS9t | |||
| 30 Aug 2024 | 牛哥讀經（7）丨胡適 6丨初代《西遊記》人設探秘——對幡桃「不大老實」嘅唐僧，遇上白衣悟空；沙僧頸上戴住嘅頭骨，原來同佢食過兩次唐僧肉有關！？丨〈《西遊記》考證〉，《大唐三藏取經詩話》 | 00:30:38 | |
歡迎你嚟到《牛哥讀經》嘅第七集，今集係胡適系列嘅第六集。我哋講下胡適對《西遊記》嘅考證。 喺民國時期，有人從日本搵到一個南宋時期嘅《西遊記》版本，呢個版本引起唔少民國學者嘅注意，包括胡適同魯迅，魯迅喺《中國小說史略》講到：「還有現在新發現的一部書，叫《大唐三藏法師取經詩話》，──此書中國早沒有了，是從日本拿回來的——這所謂 「詩話」，又不是現在人所說的詩話，乃是有詩，有話；換句話說：也是註重「有詩為證」的一類小說的別名。」 而胡適就特登搵出《大唐三藏法師取經詩話》（下稱《取經詩話》）同依家《西遊記》嘅關係。藉由《取經詩話》，你會見到：
有咗《取經詩話》嘅背景，你對於依家《西遊記》嘅某啲情節，會明白更多。 今次，我會直接由胡適嘅〈《西遊記》考證〉嘅第三章開始講。〈《西遊記》考證〉，原載1923年2月4日《讀書雜誌》第6期。 | |||
| 26 Jun 2022 | EP52 孔子係春秋戰國時期最偉大嘅哲學家？胡適忽視咗孔子嘅主體覺醒哲學！｜《中國哲學史大綱》（七） | 00:56:55 | |
上一個部分簡介完易經系統，我話胡適用陽去解太極係一個唔尋常嘅做法，但其實佢呢個唔尋常係有原因，佢嘅目的睇嚟係想將《易經》嘅法象、意象、現象同柏拉圖嘅理型論去扣連，我諗咁樣做嘅目的係為咗用直接嘅中西對應，去顯示《易經》嘅哲學性質。但其實中國哲學嘅特色就係同西方哲學唔同，胡適喺《易經》嘅解釋當中忽視咗中國哲學嘅視角。 所以，今集喺結語部分，我會為你講講點解孔子係春秋戰國時期最偉大嘅哲學家。（結語部分始於32:03) 老子敲響嘅，係周禮、人格神嘅喪鐘，呢一個係破。而孔子做嘅，係喚醒每一個主體都擁有最實在嘅道德根源——仁心，正式令到中國哲學走上一條講主體覺醒嘅哲學之路，呢一個係立，令人得以立於天地之間嘅唯一根據，更影響住所有後嚟嘅思想家，亦決定中國哲學走上一條同西方哲學唔同嘅道路。 喺呢度引述一段牟宗三嘅說話。 「儒家開主體之門，從孔子論仁開始。但是開主體之門，並非不要客體，而是通過我們的主體來了解客體，最後主體和客體合而為一。」（中國哲學十九講，頁434) 內容摘要： 胡適：「正是說易（變化）的道理，只是一個象效｛模仿｝的作用。先有一種法象，然後有仿效這法象而成的物類。」 牛某：道德行為可唔可以實踐，唔係只講道德根源，更講道德主體（仁心）嘅自由決定。周初文王一早承認天作為道德根源，但點解有道德根源仍然會戰亂處處？所以如果有人問點解要唔用個天字？從現實上講，喺亂世當中，當人人都口講住承天意志去擊倒他人，與其同人講一個不知何處嘅天、去建立遙不可及嘅天嘅系統，倒不如直指每一個人都能夠經驗嘅仁心，更為直接、有力。 我做錯事唔係因為外在上天離棄我，而係我沉溺；我做好事唔係外在上天推動我，而係我要做好事，呢個就係人嘅自主，承認人嘅主體價值 | |||
| 26 Mar 2022 | EP41 胡勞之別，牛某插嘴：九成人都解錯克己復禮！｜《中國哲學史大綱》（一） | 00:44:24 | |
上一本書，《人慈》足足講咗七集，就係想用西方哲學家同現代嘅科學考據去理解一下人性向善係咩意思。而你好可能會發現到我喺當中不斷滲入儒家、墨家嘅討論，因為其實對於人性向善與否，中國哲學一早就有討論，不過要講中國哲學就唔能夠抽空咁去討論一個問題，必先理解唔同學派嘅關係同每個學派自己嘅系統，哲學史就係一個好好嘅入手方向。 今次，我先唔從新儒家嘅書去討論，而係用一個民國好著名嘅思想家切入，一個擁有三十六個博士學位嘅人類。今次要為大家講嘅，係胡適嘅《中國哲學史大綱》。今集會同你講講胡適想喺呢本書做到咩、同埋勞思光對呢本書嘅睇法，加上我嘅回應。今集內容包括： ・勞思光點解會不停批評《中國哲學史大綱》 「所以睇呢本書你會感受到當時嘅民國知識份子面對梗一個乜嘢社會環境。而正正係因為咁，胡適有時會用非常獨特同新奇嘅方式去詮釋諸子，例如話老子係反動派、易經嘅作用係演譯出禮、孔子原來唔留意個孝字而多講倫理、墨子係宗教教主同講樂利主義、莊子有生物演化論……」 | |||
| 12 Dec 2021 | EP28《25座二戰紀念碑教我們的事》：我迷失在這場歷史遊戲中（下集） | 01:29:28 | |
今集，先會略略引述立場新聞就黎智英、鄒幸彤、何桂藍未經批准集結全部罪成嘅記錄。 然後繼續《25座二戰紀念碑教我們的事》，上集講大洋國，今集講英國，同埋意大利、韓國、日本。本來呢本書嘅第一部係講英雄，講到英國同意大利就完咗第一部，但係我嘅貪心，偷偷地寫多個韓國，再忍唔住講埋日本，就係咁，呢集比較長。 喺講英國嘅轟炸機司令部紀念碑嘅時候，我哋會發現一個政府會將一啲醜惡嘅現況隱藏，就好似唔透露轟炸機以炸平民為目標，而不斷話轟炸機係結束戰爭嘅方法、只攻擊軍事目標。到底英國社會點睇轟炸機，而退伍嘅軍人又點睇呢？理應作為主角嘅退伍軍人，係咪好似雕像上嘅英雄一樣，昂首闊步呢？ 然後我哋會講講意大利嘅陣亡者神龕，陣亡者神龕同呢一部嘅其他紀念碑唔同，陣亡者神龕係由民眾自發去建立，再被政府承認為一個永久嘅紀念碑。喺陣亡者神龕，你唔會見到一個個體代表全體嘅雕像，而會見到二千幅反法西斯嘅英雄嘅遺照。係咩驅使到民眾咁團結去自發起呢個紀念碑？呢個紀念碑象徵嘅意思，同二戰時候嘅意大利軍隊有咩關係？ 我哋可以喺整個第一部當中，發現英雄具有好多唔同嘅面向，「實際上，英雄可以係舊時代嘅眼淚、鎮壓者、國家嘅靈魂、人造嘅再世基督、被遺忘但俾人擺上檯嘅軍人、同埋烈士、受害者，但我哋好多時忘記/忽視咗呢啲身份，全部統稱為英雄。」 我諗呢一部最值得我哋去記住嘅，係每一個英雄紀念碑象徵住某某意底牢結，而某某意底牢結具有一啲目的，想去說服人民一啲嘢，當我哋深入去搵呢個意底牢結嘅根源，我哋會發現故事比我哋想像嘅，往往要複雜，面對複雜嘅世界唔容易，但我相信比起用簡單嘅思維去面對複雜嘅世界，最終嚟得要無咁痛苦。 跟住，我哋講講第二章──烈士，先講嘅係韓國嘅和平少女像，睇睇一個咁簡樸柔弱嘅紀念碑，背負住一個幾沉重嘅歷史，而呢個歷史點樣借由紀念碑將舉國嘅憤怒壓喺日本身上。 最後，講講日本靖國神社點解會帶嚟咁多嘅爭議。 我會同大家一齊思索一下，受害者、加害者同政府之間嘅關係，希望大家唔會，亦唔需要成為歷史嘅囚徒。 歷史會被某啲人視為鼓勵、勇氣嘅泉源，但對我嚟講，歷史係會令人受傷，每個人都係歷史嘅受害者，因為今日嘅一切，源於過去嘅唔文明所建構，歷史嘅鮮血，造就今日嘅我，無論係多面嘅英雄，定係如恆河沙數嘅烈士，如今都一一逝去，踐踏住佢哋屍骨嘅我，要做啲咩先唔會辜負呢啲亡靈呢？ 下集，會延續烈士嘅話題，去同大家繼續面對歷史。 | |||
| 18 Dec 2023 | S2EP35 睡眠的秘密1：點解會瞓著？原來鍾意夜瞓係遺傳使然｜人嘅生物時鐘唔係二十四小時｜褪黑激素唔會導致入睡？丨《為什麼要睡覺》 | 00:48:01 | |
你自覺自己上個星期夠唔夠瞓？ 你仲記唔記得上一次唔需要鬧鐘就瞓醒，唔使飲咖啡續命嘅日子？ 若然你喺苦思之後，得出否定嘅答案。咁你並不獨單，據統計，所有已發展地區，有三分之二嘅成年人都達唔到每晚瞓八個鐘嘅建議睡眠量。 當然，大家唔係唔想瞓，亦都知道唔夠瞓會影響住身體，例如令人有幾高機率有冠狀動脈堵塞和脆化，從而得到心血管疾病、中風；又會加重精神障礙，包括抑鬱、焦慮、自殺傾向。英國作家夏綠蒂．勃朗特（Charlotte Brontë）講過：「煩躁之心，寢枕難安。」其實佢漏咗下一句，「寢枕難安，煩躁之心。」 只係忙碌嘅人生，已經使得「至死方休」呢個成語變成令人哭笑不得嘅幽默。唔夠瞓喺自然界係非常罕有；人類，係唯一一種喺無益嘅情況下故意剝奪自己睡眠嘅生物。 唔夠瞓嘅其中一個徵兆，就係喺疲倦嘅時候想食更多嘢，咁係因為人唔夠瞓嘅時候，會令感到飢餓嘅激素濃度提升，而另一種話畀身體知自己已經食飽嘅激素亦會受到抑制。所以人即使食飽，依然仲想食嘢。換言之，唔夠瞓，就會體重增加（唔好以為節食會解決到體重增加，當人節食，又瞓得唔夠，消耗嘅大部分都係肌肉，而非脂肪）。 若然你有睡眠不足嘅徵兆，咁你就要睇下比爾蓋茲喺2019年嘅年度選書──《為什麼要睡覺》，去認識睡眠更多。作者沃克（Matthew Walker）認為社會對於睡眠唔夠關心嘅其中一個原因係：科學一直解釋唔到點解人需要睡眠。喺科學史上，睡眠係一大未解嘅生物謎題。科學一路發展，已經出現高強嘅解謎手段，例如遺傳學、分子生物學、強大嘅數位科技，但係都係唔能夠撬開睡眠嘅牢固地窖。有一個有趣嘅故事去說明過去科學對於睡眠嘅蒙昧無知： 想像有一個bb出生。 醫生同媽媽講：「恭喜你，係一個好健康嘅男仔，我哋已經做完所有初步檢查，一切都無咩問題。」 正當媽媽滿意咁樣轉身離開，醫生繼續講到： 「只係，你嘅小朋友由依家開始，會有一個情況持續一生，佢會反覆而規律咁陷入一種睇落好似係昏迷嘅狀態，有時直頭好似死咗咁。而當佢瞓喺度唔郁嘅時候，佢個腦會經常上演驚人又奇怪嘅幻覺。呢種狀態唔會霸佔佢好多時間，計落都只係佢人生嘅三分一時間。我完全唔知點解會咁，亦唔知呢種情況有咩作用。anyway, good luck!」 你諗下，生命中嘅其他三種驅動力──食嘢、飲水、生殖，人都了解有咩作用。但係偏偏瞓覺呢個第四項生物主動驅動力，卻喺幾千年間都逃過科學嘅檢驗。大家都只係接受瞓覺作為事實，而無法解釋瞓覺。 如果我哋從演化論嘅觀點嚟睇，情況更為奇怪，因為瞓覺點睇都似係所有生物現象中最蠢嘅一件事。瞓覺嘅時候無辦法獵食、社交、繁殖、保護自己或者下一代，甚至成為獵食者嘅獵物。照道理，生物係有好大演化壓力避免瞓覺，阻止類似瞓覺嘅現象出現，但瞓覺卻係普遍到不得了，科學家暫時所檢驗過嘅物種通通都係會瞓覺。 正如世界頂尖嘅睡眠研究者瑞赫夏芬（Allan Rechtschaffen）博士所講： 「如果睡眠沒有提供任何關鍵性的重要功能，那就是演化犯下的最大錯誤。」 因此，作者認為瞓覺一定有重要作用，重要到千萬年嘅演化都篩唔走。 「睡眠在地球上是和生命本身一起演化的，或至少該是生命誕生後不久就出現。更進一步來說，睡眠在整個演化史上持續存在，表示它必然有強大的好處，勝過那些看似明顯的危險和不利之處。」 我唔會同大家講唔夠瞓有咩壞處，你有興趣自己去睇／去google 唔瞓覺嘅壞處，我只會同你講
今集，我哋會從生物學嘅角度，睇睇影響睡眠嘅因素。 內容分成咗兩大部分：
喺「生物時鐘」方面，我哋會講講科學家親身做過實驗，證實人嘅生物時鐘唔係二十四小時；原來「夜貓」係天生；褪黑激素原來幫唔到入睡！？ 喺「睡眠壓力」方面，我哋會講講腺苷會點樣影響人入睡；腺苷同生物時鐘呢兩套系統嘅作用會使得通頂嘅你，喺朝早非常精神…… | |||
| 04 Feb 2023 | 【諗諗下唔對路】明明一日得24小時，點解有人可以做到咁多嘢？《原子時間》教你點樣做時間管理大師，打破循環嘅鹹魚人生 | 00:29:27 | |
（今集有YouTube影片版本，可以喺下面連結去睇睇）
你有無試過想搵一個興趣，但結果三分鐘熱度？好驚一個未完善嘅開始，而唔敢踏出第一步？咁你就要睇下《原子時間》，睇睇作者柳韓彬點樣以佢嘅個人經歷，去講述自己由一個收工之後就乜都唔想做嘅人，變成一個擁有正職、又有多姿多彩副業嘅時間善用者。 作者嘅生活聽落好理想，因為現實咁講，大多數人返嘅工都唔係可以實踐到自己興趣嘅工作；就算工作同自己興趣相關，都會有諸多嘅規限，唔易發揮自己。以前嘅世代提倡一個人一生只做一件事，就係專注工作，所以能夠捱苦、能夠安然喺重覆當中；但係依家嘅世代有唔少人唔想安於原型嘅重覆，覺得工作以外，應該要有個work-life balance，即係工作同生活嘅平衡，抗拒重覆而實現唔到自己嘅工作。 但即使想work-life balance，往往現實就係work-life 唔 balance。明明想放工之後享受生活，偏偏唔容易離開工作嘅影響，被工作嘅勞累拖垮嘅身體令人難以全心投入生活當中。結果係工作吞噬咗生活，體會人生就係working-life。既然工作用咁多時間、咁大壓力，收工其實飯都唔想食，返到屋企就梗係想hea 下、喺梳化攤喺度碌電話，仲點會有咩原子時間，恨不得搵方法去增加自己嘅休息時間。由尋求工作同生活嘅平衡，變成工作同休息嘅平衡。時間耐咗之後，發覺尋求休息嘅自己好似慢慢跌入一種變成「工作機器」嘅循環當中： 睡醒好攰、返工、放工、休息（打發時間）、夜瞓、睡醒好攰、返工、放工...... 休息只係機器過載後嘅冷卻，一冷卻完又要再度工作。你或者都試過突然之間的起心肝，覺得自己要打破呢個循環，開始計劃放工要做自己有興趣做嘅事。然後你就會發現維持計劃唔係一件易事，嘆息work-life balance點解咁難，明明想好好生活，反而因為想好好生活而精神衰弱。既然咁難，又想返去休息……呢個又係另一個循環。掙扎與浮沉，失敗感慢慢減弱呢個循環嘅動力，最後連掙扎都無埋。接受陽光嘅暴曬、以鹽份嘅傷害作為麻醉嘅保障，喺對生活嘅忙碌抗拒嘅同時，成為心不甘情不願嘅鹹魚。 其實，生活忙碌唔一定會有精神上嘅疲累，精神上嘅疲勞往往係因為我哋無處實現自己、再唔係就係太過燃燒自己。一位臨床心理師洪仲清就喺推廌序提醒我哋應該要「用減法過生活，用加法看自己」，即係減少關注一啲唔重要嘅事，而去多感受自我實踐嘅滿足感。佢話：「當我們有意識的蒐集時間的碎片，好好完成重要的事，那會相當有成就感。醒着的時候能盡力已沒有遺憾，睡眠的時候就可以更香甜。」呢個就係所謂嘅充實，人就好似一個氣球一樣，充實嘅氣球先係一個靚嘅氣球，正如孟子所講：「充實之謂美，充實而有光輝之謂大，大而化之之謂聖，聖而不可知之之謂神。」無氣會顯得頹廢，太多氣又會爆煲，咁點先可以有動力去充實自己，又唔爆煲？ 一齊聽下作者點樣去尋找、使用原子時間，突破「工作機器」嘅時間循環，從而成為時間管理大師。 | |||
| 24 Jun 2023 | S2EP23 愛的理論（下）：人類總係會為咗愛，而花式虐待同被虐待；要離開互相傷害，就要明白成熟嘅愛嘅四大元素丨《愛的藝術》 | 00:58:34 | |
上集，我哋用一個比較宏觀嘅社會視角，從人類嘅失樂園，得知人類擁有原初分離；為咗解除分離，建造假樂園去尋求合一。今集，我哋會從心理學視角去分析兩種嘅合一傾向，分別係「共生合一」，同埋「成熟嘅愛」。內容會分成兩個部分。 第一個部分，係「片面的愛：只為你生」。 講述生物學同心理學上點理解「共生合一」。「共生合一」有非常多變化，不過萬變不離其宗。人喺「共生合一」有兩種主要身份，分別係施虐狂同被虐者，弗洛姆指出，雖然施虐狂同被虐者地位上聽落好唔同，但實際上係非常類似。甚至，施虐狂同「成熟嘅愛」都只係一線之差，因為兩者都只係想去探索生命嘅秘密。 書中引述咗一本以色列小說當中，一位軍官嘅說話： 「開槍——其實我是可以這樣做的——｛但是開槍｝ 只能讓你把一個傢伙幹掉……只用槍你永遠搆不著一個傢伙的靈魂深處，不會知道那靈魂是怎樣表現自己。但我不偷懶，我不只一次猛踩一個敵人一小時以上。你知道，我想要弄清楚生命究竟是什麼，生命在我們的猛踩下會變成什麼樣子。」 呢個就係唔成熟嘅愛會造成嘅後果，以傷害、踐踏作為手段，以此去滿足對生命秘密嘅渴望。弗洛姆就為我哋指出另一條路。 第二部分，係「全面的愛：自立並立」。 當我哋重新定義「活動」、「給予」嘅意思，了解愛嘅四種元素，人會發現，生命秘密就喺「成熟嘅愛」當中。聖經當中嘅人物被吞到鯨魚口中，其實係因為佢只知「正義」而不知「愛」。 有咗弗洛姆嘅指引，相信對於我哋日常生活會有唔少提醒。 | |||
| 12 Apr 2024 | S2EP40 松浦彌太郎話：「少年，成為社會的齒輪吧！」牛某：「嗯？」丨《松浦彌太郎說: 假如我現在25歲, 最想做的50件事》 | 00:45:50 | |
松浦彌太郎嘅作品，大家行書店嘅時候都可能會見過，算係一個喺香港幾出名嘅日本作家，佢嘅作品都幾多，例如《今天也要用心過生活》、《只要我能跑，沒什麼不能解決的》。佢教人點樣處世、思考，聽落係一個成功人仕。 其實，松浦彌太郎年輕嘅時候唔算順利，佢喺高中嘅時候已經輟學，一句英文都唔識講，居然決定到美國闖一番天地。由時薪兩美金嘅工作慢慢做起，喺唔同行業之間穿梭，儲錢開咗間小書店，再進軍出版界，成為「COW BOOKS」嘅負責人（同牛某無關，只係緣份）。 喺呢段艱辛嘅成功之路，佢受到唔少前輩嘅提醒、從唔同情況累積到各種經驗，所以佢亦想寫一本書去提醒年輕人，嗰啲對未來感到不安、搵唔到夢想、感到迷惘嘅人。為咗作更親近嘅提議，佢嘗試設想：「如果我依家二十五歲，最想做嘅50件事。」今次要講嘅書，就係《松浦彌太郎說: 假如我現在25歲, 最想做的50件事》。 雖然書名表明係25歲，但我認為25歲只係一個象徵，象徵一個年輕、尚未走出迷霧、等待或渴望進步嘅心靈。我一開始睇呢本書嘅時候，有一種松浦彌太郎嘅建議睇落太過積極、上進嘅感覺，心諗會唔會只係一個滿懷希望嘅日本人所寫嘅鼓勵說話。但我越睇，我就開始明白點解松浦彌太郎要寫得咁積極。 依家嘅松浦彌太郎，唔會再好似書中咁諗嘢，但如果要依家嘅松浦彌太郎去提點二十五歲嘅松浦彌太郎，就應該要咁積極。點解？因為「放下」二字對唔少嘅年輕人係一劑毒藥。我哋總語再講。 今集會講以下四件事：
按：如果你覺得呢集有意思，未必係因為松浦彌太郎。 另：作者係一個日本人，我哋感受下日本人點樣看待工作。 | |||
| 09 Oct 2021 | EP18《孔子大歷史》（番外篇）：孔子晚年，飽受挫折，思想劇變，棄周從古 | 01:07:38 | |
今集係《孔子大歷史》嘅番外篇，我哋會一齊睇下孔子晚年所經歷嘅唔如意。 1）孔子重返衛國之後，發現東方聯盟並唔適合自己，就南下到蔡國、楚國，經過兩年，仲被楚王應承俾七百里地俾孔子 六十而順，七十而從心所欲不逾矩，並無想像中咁輕鬆，呢一切嘅輕描淡寫，係嚟自於孔子晚年所遇到嘅失意、哀痛，到孔子喺生命最後一刻去再審視人生，去回憶自己曾經嘅夢想──周公，亦只係「久矣吾不復夢見周公」，但就算係咁，仍然唔去後悔。 今日閱讀孔子嘅你我，無論係有孟子嘅鴻心定曾點嘅悠然自得，孔子嘅人生仍然係你我可以重溫嘅鏡，然後承繼佢嘅意志，一步步向前走，以一人之力，一己嘅方法，面對住巨大嘅命限。 | |||
| 04 Sep 2021 | EP14《「我反對！」不恐龍大法官RBG第一手珍貴訪談錄》：美國最高法院史上第二位女性大法官訴說平等與自由（下集） | 00:54:24 | |
今集有少少長，但幾值得聽。 今次會用《我反對》延續有關平等嘅討論，將女性平權嘅進程一步一步去解釋你聽，由五十年代前被視為附庸、到民權運動追求女性同男性擁有一樣嘅福利、講到新女性主義者認為女性應該有特別待遇。當我哋去睇金斯伯格點樣回憶過去有關女性權益嘅案例同回應新女性主義嘅comment，我哋就能夠漸漸明白到金斯伯格所理解嘅平等嘅精神所在。 之後，我會抽取書入面三件有關於金斯伯格人生嘅事件，去睇下唔係著緊法官袍嘅金斯伯格喺日常做過咩事去保護民主。同埋講講平等同儒家嘅「與萬物同體」嘅關係。 最後...更會揭示牛哥嘅身份，記得聽到最後。 | |||
| 21 Aug 2021 | EP12《人類學家的無政府主義觀察》：其實你係一個無政府主義者，喺混亂中創造新嘅可能（三） | 00:50:31 | |
去到第十二集，唔知你覺得《人類學家的無政府主義觀察》得唔得意呢？今集我哋會繼續去睇下，原來喺無政府主義者嘅視角之下，日常中嘅生活中嘅行為原來正正係一種不服從行為，例如揸車稍稍超速，行喺一條無鋪嘅路上面等等，呢啲行為就被政府同人民所組成嘅「沉默同盟」所默許，喺不停嘅不服從中，政府同人民就暗暗互相妥協。 然後，就會講下政治人物由於需要人民嘅支持，而用Charisma去迷惑/取信於人民，牛哥仲會馬丁路德金上身（當然差十萬九千里）。 最後，會預告一下下一本要講嘅書，估中有獎。 （正式內容由4:00開始） | |||
| 19 Apr 2025 | S2EP53 莊子哲學入門（2.1）：「天之小人，人之君子」——戰國狂人莊子，喺亂世中決意「游戲污瀆之中自快」丨王博《莊子哲學》第一章〈狂人與狂言〉 | 00:36:51 | |
戰國時期，「人人都想做官，唔通人人都做官咩？」莊子會同你講，咪鬼做官啦。不過，莊子又唔係要你Hea住過，而係要用一種「狂」嘅態度，去顛覆嗰啲假惺惺嘅價值觀——佢唔鍾意做官 ，覺得名利只係過眼雲煙；鍾意同啲「畸人」做朋友 ，因為覺得佢哋夠真；成日講啲奇奇怪怪嘅「狂言」 ，不斷挑戰你嘅常識。 王博表示，莊子嘅「狂」唔係真癲或者假傻，而係一種對自由嘅追求。為咗唔被束縛，佢選擇喺 「學而優則仕」嘅社會，要 「學而優則不仕」 。王博更形容到，莊子嘅人生態度就係「游戲人間」 ，要喺荒謬嘅世界入面，活出真我。 想知莊子點樣用「狂」嚟面對人生？ 今集，我哋嘅內容分成咗五個部分： 第一個部分係「所謂中庸」。我會先補充儒家口中嘅中庸（過猶不及），去講講狂狷嘅大致意思。 之後會總結王博嘅諗法，得出「不仕之狂」、「天之小人，人之君子」、「游戲人間」、「寓狂言」呢四個部分。 前三種狂，都係從莊子嘅人生故事去論述莊子之狂。「寓狂言」，就係講緊莊子支筆嘅狂。 從以上論述，你就會見到莊子點樣用人生同文字，成為戰國最狂嘅文人。即使時隔千年，你我今日都仍然能夠理解佢狂之所在。 （本身係一次過寫完。但錄完發覺太長，尤其係第5部分本身有啲麻煩，所以決定分成2.1同2.2。） | |||
| 09 May 2022 | EP47【特備節目】史上最難DSE文言文？究竟「藏天下於天下」即係點？｜《2022DSE中文閱讀卷：文言三則》，莊子哲學 | 00:58:00 | |
今集係特備節目，我會講講2022年DSE中文卷卷一嘅三篇文言文所涵含嘅莊子哲學思想。
今年嘅DSE 中文卷卷一，居然全份卷（白話文同文言文）都一齊考哲學嘅文章，而牛哥仲貼中咗文言文嘅文章，因為有聽眾喺心事解難問過，如果你想聽返，可以去返 EP25 嘅 51:40。
我哋會一齊嚟睇下2022年考咗嘅三篇好短嘅文言文當中嘅意思，呢三段文字雖然短，但係好能夠揭示當時知識份子討論緊嘅問題，亦好好咁對應我哋近排嘅集數。
呢次DSE考咗楚共王遺弓、荊人遺弓、莊子〈大宗師〉三篇文，出卷嘅人好明顯對老莊有啲理解，否則出唔到三篇咁連貫嘅文章，可惜嘅係，我認為出卷嘅人嘅注釋顯示住佢錯解莊子，當然，咁可能係因為要令到熟讀範文〈逍遙遊〉嘅學生去好快知道篇〈大宗師〉講咩。我就借呢個機會同大家一齊去睇下莊子嘅思想，睇下「泉涸，魚相與處於陸，相呴以溼，相濡以沫，不如相忘於江湖」點樣顯示住莊子對生死、天地、轉化嘅睇法。
如果你係未考DSE 嘅中學生，我有少少說話想同你講。我講嘅內容係超出考評局嘅範圍，我甚至會指出考評局嘅詮釋係錯，所以可能同你喺學校學到嘅資訊唔同，對你嘅卷一未必有幫助。但我仍然希望你會願意聽落去，因為莊子嘅哲學係討論人生嘅哲學，係值得細讀、值得用一個系統去讀。有機會因為DSE 而讀到莊子係一個幸福，但如果讀莊子只係為咗DSE 咁就會好可惜。
而如果你係已經考完DSE／唔需要考DSE嘅聽眾。咁就請你同我一齊用幾個字嘅時間，去忘記有形嘅形驅，一齊進入到莊子嘅夢鄉。今集內容包括：
・教授重要嘅DSE睇文言文方法，用圖表為你解釋楚共王、孔子同老子嘅分別
・莊子話生命只係氣聚氣散，咁人要點樣面對？
・原來「相忘於江湖」個「忘」字唔止係忘記嘅意思
・用〈逍遙遊〉範文理解「與其譽堯而非桀，不如兩忘而化其道。」
・「魚相與處於陸」其實同《莊子》全文一開始所講嘅鯤鵬寓言有關
・我話「DSE考卷將山注為舢板，將「藏大小有宜」改為「藏小於大有宜」，咁當然係錯改文意」
・我哋往往唔明莊子嘅說話、覺得佢講嘅係神話，但其實要有開放心靈先能夠明白佢嘅深意
・莊周夢蝶，有咩寓意？
・莊子話死亡係「懸解」，係咩意思？
・我最後總結出「楚共王係藏弓於楚，孔子係藏弓於人，老子係藏天下於天下。」到底點解？
希望聽完呢一集嘅你，可以分辨到坊間對莊子一知半解嘅解說，我並唔係話佢哋有意去講出一個弱嘅莊子，只係佢哋未必有時間去細閱莊子。亦希望你聽完之後，有興趣去拎起《莊子》，睇下莊子廣大而連貫嘅世界。如果世界係一場夢，莊子會係你同遊夢境嘅好夥伴。
我為呢集作咗首詩，唔知你聽完呢集會覺得呢首詩點呢？
有為成心無為道
昨日喜怒今日忘
鯤潛鵬飛皆時機
蝶翩人遊一回夢
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com
| |||
| 13 Feb 2025 | 三島由紀夫論柏拉圖式愛情，以及基督教式戀愛嘅聖母情結。牛某：人類嘅愛，並唔係咁丨哲學即食麵（11）丨三島由紀夫，《新戀愛講座》〈西洋的戀愛和日本的戀愛〉 | 00:31:21 | |
歡迎你返到嚟哲學即食麵（11），今餐，喺街裡愛人一對對嘅日子，我哋要睇一對戀愛觀——三島由紀夫所分出嘅柏拉圖式戀愛（希臘式戀愛）同基督教式戀愛。 三島由紀夫認為，當人談戀愛嘅時候，並唔係出於本能咁處於動物相互吸引嘅、雌雄相吸嘅愛。亦即係話，人類嘅愛，唔係簡單咁能夠用男人愛女人、女人愛男人，呢種動物性嘅異性相吸嚟理解。 人類嘅戀愛，會受到歷史、社會、環境等等因素嘅制約。即使我哋以為戀愛係兩個人嘅事，但實際上，戀愛反映咗全人類嘅歷史同文化。 因為我哋嘅戀愛唔係從天而降嘅隕石，由一個完全獨立嘅個人開始，而係受住過去嘅祖先、唔同嘅文化所導向、制約。若然要分類嘅話，就可以分成希臘式戀愛、基督教式戀愛、日本式戀愛。 坊間有種講法話柏拉圖式嘅戀愛，就係追求精神上嘅結合，並唔在意肉體。三島由紀夫就會話，呢種愛情，實際上係柏拉圖式戀愛嘅變體——基督教式戀愛。 今集，我哋就嚟睇睇柏拉圖式戀愛（希臘式戀愛）同基督教式戀愛嘅分別係點。結語部分，會係我嘅總結。 | |||
| 19 Jul 2024 | S2EP42 禪宗入門（上）：禪宗版羅生門，「本來無一物」，定「心如明鏡臺」？六祖係神秀定慧能？胡適同鈴木大拙，點解會勢成水火？丨《六祖法寶壇經》 | 00:53:35 | |
佛教擁有好多各具特色嘅學派，其中，有一個學派總會引起眾人注意，佢對經典唔太著重，有住令人一聽就會皺起眉頭嘅公案，會嘲笑佛陀、三句唔埋兩句就要用棍打弟子——聽到呢度，相信答案已經呼之欲出，佢就係，禪宗。 點解禪宗睇落咁奇怪，當學者、僧人談論禪宗嘅時候，會咁津津有味呢？講白啲，就係點解咁騎呢嘅做法，居然無畀時代淘汰呢？ 咁我哋就可以睇下喺現代將禪宗發揚光大、傳遍歐亞嘅禪師——鈴木大拙所寫嘅禪宗入門書，《鈴木大拙禪學入門》。呢本書喺西方世界有頗大影響，喺博客來嘅內容簡介更寫到： 「心理學大師榮格讚譽：『本書是西方世界最有影響力的禪學書籍。』 哲學家海德格讚嘆：『這就是我所有著作中想表達的事情。』」 要知道點解鈴木大拙會喺西方世界引嚟咁大迴響，睇佢生平就可以略知一二。 鈴木大拙，出生於1870年，大拙係佢嘅法號，本名係貞太朗。佢喺大學主修英文，青年時期主要從事將佛經、中國經典翻譯成英文嘅工作，二十七歲首次到美國，然後多次喺歐美各地演講、教學。到中年嘅時候，喺佢寫出一部佛教史《大乘佛教概論》之後，開始受到西方學界注意，除咗因為佢思想獨特，仲因為佢嘅作品大部分都係以英文書寫，又適逢歐洲經歷一戰、二戰嘅巨大創傷，急需新思想嘅修復，鈴木大拙嘅作品就順水推舟，成為西方人領略東方思想嘅階梯。 當中，「垮掉的一代」（Beat Generation）嘅傑克・凱魯亞克（Jack Kerouac）、埃爾文・艾倫・堅士堡（Irwin Allen Ginsberg）都係禪宗愛好者，不時手握住鈴木大拙嘅作品；「垮掉的一代」仲影響住後嚟嘅嬉皮文化……總之，鈴木大拙嘅作品喺西方獨有嘅社會氣氛之下，將禪宗推廣。鈴木大拙更被譽為「世界禪者」，喺1963年被提名諾貝爾和平獎。 你唔好以為佢係禪者就無學術地位，佢曾經做過東京帝國大學講師、大谷大學教授、美國哥倫比亞大學客座教授……今時今日西方人理解禪呢個概念嘅時候，亦因為鈴木大拙嘅影響力，而將禪翻譯成日文發音嘅Zen，而非普通話發音嘅Chán。呢點都有一個同胡適有關嘅故仔可以講。我哋正文再講。 今集內容包括： 「鈴木大拙與胡適」：鈴木大拙同胡適本來互相敬重，但係由於對研究禪嘅取態唔同，筆戰不斷。我哋會講講禪宗喺五祖之後嘅南宗北宗之爭，喺呢場爭鬥當中，出現咗家傳戶蹺嘅佛偈，「本來無一物，何處惹塵埃。」 放喺《牛哥講經》嘅〈禪學入門〉原本只有兩集，即係兩篇文稿，喺錄第一篇文稿嘅中途，發現太長，所以分開兩次嚟錄，所以依家成個〈禪學入門〉將會分成三集，而頭兩集係分享同一篇稿。今次錄音只會講述第一部分「鈴木大拙與胡適」，其餘部分，就下次再講埋。 | |||
| 05 Feb 2024 | S2EP38 簡介《易經》宇宙論基礎（2）：道德宇宙論：簡述八卦、四原德（元、亨、利、貞）嘅道德意涵｜《中國哲學導論》 | 00:54:37 | |
本來我想承住劉紀璐就講牟宗三，但係牟宗三嘅思維連貫，若然我只講到一兩集牟宗三，可能只能夠講出一嚿雲咁。 思前想後，我決定牛哥講經講《易經》嘅第二集依然用劉紀璐作為主軸，但係會加插少少我認為牟宗三會點樣補充劉紀璐嘅內容。 （牟宗三對《易經》嘅詳細說明，我會喺牛哥解經同大家慢慢分享，如果大家理解到牟宗三對《易經》嘅睇法，會幫助到大家更容易理解牟宗三哲學嘅精神所在。） 今集，要講講《易經》所展示嘅道德宇宙論。西方學者發現，中國文化中無道德嘅立法者，於是，中國文化嘅道德來源，同西方思維有所不同。 我哋會從八卦、四原德（元、亨、利、貞）入手，了解中國式嘅道德宇宙論。 今集內容包括：
| |||
| 01 Apr 2025 | 【廣東話字幕】十分鐘跟住《原子習慣》改變人生（1）：《原子習慣》值唔值得讀？由爆缸瀕死，到爆紅作家——意外悟出習慣威力；「要寫一本好書，你必須先成為那本書。」 | 00:18:36 | |
相信大家喺行誠品嘅時候，長年都會見到《原子習慣》呢本書位列暢銷榜頭一二，唔知你腦海入面會唔會有一個疑問：到底呢本書有咩咁吸引呢？ 有人好鍾意呢本書，覺得係人生指南；有人睇唔起，話內容只係老生常談。點解一本書會咁兩極分化？我曾經都係睇唔起《原子習慣》嘅一員，覺得呢種「工具書」講嚟講去都係三幅被，根本唔抱咩期望，得閒去睇Stoic好過。依家當我睇完呢本書，我只能夠話：ok，作為一本「工具書」，佢直接、無乜廢話，可以話幾值得睇（比我想像中要睇得耐）。 《原子習慣》其中一個有趣嘅位係：佢唔係一本先有理論，再講道理嘅書，佢係經過作者實證，點實證法？ 喺呢個十分鐘跟住《原子習慣》改變人生系列，今次係第一集，我哋會嘗試用十分鐘睇完《原子習慣》個〈前言〉。睇下作者詹姆斯・克利爾（James Clear）點樣用自己從瀕死意外到重建生活嘅親身經歷，證明微小習慣累積嘅威力。 依家，我哋一齊跟住佢回憶一下佢點樣從一次差啲攞佢命嘅意外當中意識到習慣嘅重要。 | |||
| 27 Sep 2024 | 無知嘅蘇格拉底，點解會成為雅典嘅KOL，受盡雅典青年愛好？丨哲學即食麵（1）丨《哲學的故事》 | 00:11:34 | |
若然參考一下從古時流傳落嚟嘅胸像，我哋就能夠知道蘇格拉底嘅樣——一個禿頭、面圓圓、突眼、扁鼻嘅樣，大概，你都唔會稱之為靚仔，甚至會話佢有啲樣衰。呢位相貌不凡嘅哲學家，係當時雅典青年最鍾意嘅導師。雖然佢係最出名嘅西方哲學家，但老實講，我哋對佢嘅認識唔多，總之，相比起有貴族氣派嘅柏拉圖，同具學者風範嘅亞里士多德，蘇格拉底總有種親切嘅感覺。無人知道佢係靠住乜嘢過日子，佢大概無工作過，亦都唔擔心聽日嘅生計，對於佢嘅妻子贊西佩（Xanthippe）嚟講，蘇格拉底可能只係一個遊手好閒、無出息嘅老公。 當然，蘇格拉底並唔係完全無嘢做。二千年前嘅雅典，總係有一個笨拙嘅身影從廣場漫步，著住同一件短袖束腰外衣，佢會走向青年，將青年帶到去神殿門廊嘅陰涼角落，要求佢哋定義自己所用嘅語詞。 跟住佢嘅青年，都有住唔同嘅熱情。有人會好似柏拉圖同阿爾西比亞德斯咁，學習老師用諷刺去分析雅典民主，有人會好似安提斯泰尼（Antisthenes）咁，企圖學習老師面對貧窮嘅態度，提出古希臘版嘅社會主義，有人會好似亞里士底布斯（Aristippus）咁，提出古希臘版嘅無政府主義，渴望一個無主人、無奴隸嘅世界。喺呢個小團體，經常都會出現激烈辯論，思索種種學問。 點解青年都愛好蘇格拉底呢？…… | |||
| 11 Oct 2023 | S2EP31 從「我好好」到「我唔好」，發現成年人嘅心靈有抹唔走嘅童年痕跡丨《蛤蟆先生去看心理師》 | 00:43:21 | |
幾經波折，蒼鷺終於說服到蛤蟆先生自願參與心理諮商。但係到第二次諮商之前，蛤蟆先生嘅情緒都無咩太大改善。 喺蒼鷺問：「How are you?」嘅時候，呢個傷痕纍纍嘅心靈自動回答出：「I am fine, Thank you」。雖然教科書式嘅回答只係自欺欺人，但係比起為別人帶嚟精神負擔，一個安全嘅回答都係一個唔錯嘅選擇。 蒼鷺並無止步喺呢個教科書式嘅回答，而係進一步詢問蛤蟆先生嘅真實情感，肩負住同蛤蟆先生一同回憶過去情感嘅任務。途中，蒼鷺發現到蛤蟆先生喺唔同事件嘅共同情感…… 今集內容包括：
— 按：香港其實有唔少page 有講心理學，之前喺story 問聽眾有無推介心理學，大家主要提出四個：
佢哋嘅page 都有用簡易嘅圖片同字句同大家分享心理學相關知識，所以大家有需要都可以去睇睇。 | |||
| 22 May 2022 | EP49 【特備節目】不開心，人人不開心｜《當快樂成為負擔，不快樂就是你的權利》 | 00:50:50 | |
我想喺胡適嘅中國哲學史大綱呢個系列以外，從歷史同哲學當中休息一下，同大家思考一下快樂同不快樂。今次要講嘅書係，《當快樂成為負擔，不快樂就是你的權利》（下稱《當快樂成為負擔》）。我喺書店見到呢本書嘅時候就已經幾感興趣，但一直無買到，有日喺大叔書丘見到呢本嘅二手書，價格相宜，就把心一橫買咗，結果收到嘅係一本狀態良好嘅二手書，當堂都快樂咗一下。喺呢度表示感謝。簡介一下作者先。 作者係迪克・德・瓦赫特，佢係一個魯汶大學教授、精神病學中心家庭治療研究主席，同時係比利時著名嘅執業嘅精神科醫生同心理治療師。 以我粗淺嘅了解，同時擁有精神科醫生同心理治療師係一個好難嘅達到嘅資格，因為精神科醫生係一個醫生，要去了解人腦係點樣運作、被咩影響，主要以藥物去調節患者腦內嘅化學物質嘅平衡；而一個心理治療師就係一個研究人嘅心理，再以對話形式去解決人思考上嘅糾結，而往往呢啲思考都係患者所唔自知嘅問題；心理治療師就係要去搵出呢個問題，去疏導呢個問題。 用比喻去理解嘅話，患者就好似一條淤塞咗嘅河流，有時積存太多水就會變成洶湧嘅河流，而精神科醫生嘅做法就係起一條大壩去調節呢條河流嘅流量，心理治療師就係嘗試將淤塞嘅位置搵出嚟、疏導佢。通常要讀完一個精神科醫生已經再無時間心力去再讀心理治療師，反之亦然。但作者兩樣都讀到，而加上佢喺內文嘅用字，畀我一個印象，佢係一個聰明、親切而博學嘅人。佢所寫嘅呢本《當快樂成為負擔》，有數據、有思考、容易閱讀，實在係一本適合現代人睇嘅著作，一本已經寫得好好嘅著作，所以即使我一早睇完呢本書，有喺live同大家一齊去睇過，但都無整成podcast。 縱然原著已經通俗易明、難以超越。我仍然想同大家一齊去思考一下「快樂」，適逢呢一集係第四十九集，咁我就承接第一集嘅傳統（49＋1＝50，👍🏻），去以第一人身去將呢本《當快樂成為負擔》改寫，同大家一齊思考快樂、不快樂。當社會忽視/唔承認不快樂，想將不快樂歸零，只想要十分嘅快樂而要零分嘅不快樂，希望你仍然記住不快樂其實係你嘅權利、係人生必經嘅階段，甚至對人嘅整體有益處。 謹此引錄一段一位諮商心理師，李家雯嘅推廌說話： 「當人們將追求「快樂」視為一種結果，而忽略快樂是生命旅程中的「過程」時，就越難感受到快樂。而生命歷程中，每種感受都很重要，去接納每一個片刻，與社會他人真實連結，快樂自然產生。在這動盪的世代裏，本書給了我們重要的提醒：我們都需要學會同時與「快樂」和「不快樂」共處，以獲得生命的安適。」 | |||
| 20 Aug 2023 | S2EP27 胡適話莊子早喺二千年前就提出生物演化論？錯，其實係氣化宇宙論！丨《中國哲學常識》 | 00:52:47 | |
近日買咗一本胡適嘅書，叫做《中國哲學常識》，係開明書店所編。內容上同《中國哲學史大綱》有唔少重覆之處。點解我仲要買呢？ 眾所周知，《中國哲學史大綱》係一部未完成嘅書，寫到戰國就無寫落去。《中國哲學常識》呢本書可謂圓咗唔少胡適愛好者嘅夢，將胡適對於漢、宋代哲學嘅講義都加入其中。僅僅為咗多出嘅內容，我又買一本新書。 不過，我認為《中國哲學常識》呢個書名實在唔貼切，雖然我知道書名係取自開明書店嘅《中國xx常識》系列，除咗哲學，仲有建築、歷史、文學。而出呢套書嘅目的，就係想人擁有文化常識，開明書店喺序言開首就寫到張岱所講嘅故事： 話說有個文士喺船上高談闊論，當有個僧人問文士：「堯舜係一個人定係兩個人。」文士話：「當然係一個人。」 相信聽開牛哥講經嘅你，都會知道堯舜係兩個人，而當文士答錯咁基本嘅問題，佢嘅一切偉論都會被人輕視。所謂基本問題，就係常識。序言之後仲講到： 「這類常識猶如眼鏡，沒有它，一片模糊；透過它，世界才變得清晰。平時我們不會去關注自己所戴的眼鏡，而只聚焦於眼鏡中所呈現的事實，殊不知，事實之所以成為事實，離不開作為眼鏡的常識所構成的判斷。就如瓦托夫斯基所說，它是「一種文化的共同財產，是有關每個人在日常生活的一般基本活動方面應當懂得的事情的一套可靠的指望」。」 實在講得唔錯，常識就係人認知嘅眼鏡，擁有常識就係要有一副好眼鏡。但問題係，胡適嘅哲學史唔應該被冠上「哲學常識」之名。認識我嘅大家都會知道我個人係尊敬胡適，因為胡適係中國哲學史嘅創始人，佢有好多洞見，所以我喺第一季講中國哲學就係用胡適。無論係以倫理理解儒家、以宗教家理解墨子……都係胡適發前人所未發嘅成就。 但同時，胡適擁有時代嘅局限，從依家嘅視角睇嚟，胡適寫嘅哲學史唔應該被認定為好似金科玉律般嘅「常識」，反而係等待被超越嘅對象。 舉幾個例子，一，胡適以老子為諸子開首，呢點已經被學界所唔承認，因為長沙馬王堆嘅發掘，顯示《老子》應該擁有眾多版本，比較完整嘅版本最早係成書於戰國（但都未搵到）。對於文本嘅年代理解唔同，已經足以影響人對哲學思想嘅傳承理解。加上馬王堆嘅《老子》係以德經開頭，同今本《老子》以道經開頭唔同，所以《老子》出現咗胡適所唔可能想像嘅變數； 二，胡適認定莊子係出世嘅哲學，如果以此為常識，就會加深現代人對於莊子「灑脫」嘅形象。陳鼓應作為現代嘅莊子研究者已經講得好清楚，莊子哲學絕非無所事事、遠離世間，佢嘅逍遙係建築喺充滿人間世嘅悲情之上： 「我深感莊子是古代知識分子中第一個對於「自由」提出深刻思考的哲學家。當我理解〈逍遙遊〉之自由主題的同時，也就曾留意到篇末一句「安所困苦哉」透露出的莊子那個時代生存環境的訊息。……所以，我一直能體會莊子的「逍遙」並非在空想的高塔上乘涼，他的「逍遙」可說是寄沉痛於悠閒，其生命底層的憤激之情其實是波濤洶湧的。」《莊子人性論》 以上種種，我唔係想顯示胡適已經過時，反而係佢錯得有價值，佢值得被人批評、超越，所以佢係經典。如果有讀者睇完呢本書嘅序言，然後覺得胡適講嘅就係定論，咁反而會同序言提到嘅文士一樣，身在錯中不知錯。 我哋要去思考嘅係： 建築學、文學、歷史可能可以有常識，因為呢啲知識係可以被確認。但正如我哋喺《更改主題》提到，哲學嘅根本精神係反常，佢就係要對常識進行反省，以常識稱呼哲學作品係咪有其需要呢？ 哲學頂多可以話有個主流意見，如果用主流意見理解「常識」二字，咁漢儒以經學為常識、宋明儒以理學為常識、清儒以訓詁為常識，依家，我哋身處喺2023年奉百年以前嘅哲學作品為常識，又係唔係合適嘅舉動呢？ 如果理解「常識」做普及知識嘅書，即係本來唔識都可以睇得明。但並唔會咁，因為胡適基本上係唔解引文，就好似佢預設咗讀者本身有足夠「常識」去理解佢嘅中國哲學。如果當胡適嘅書算係「常識」書，咁現代有唔少讀者都會係唔夠常識嘅讀者。 發咗一陣牢騷，我並唔係話呢本書唔值得睇，只係個名改得唔好。依家，請同我一齊睇下胡適對於莊子嘅創意，然後從中得出一啲意義。我會加強胡適嘅講法，然後從佢嘅錯誤，為你簡述莊子嘅氣化宇宙觀。 按：難得講莊子，呢集有難度。我要將說話壓縮嚟講，會令內容難咗。我會喺線上讀書組慢慢講莊子，結語再講。 | |||
| 03 Jul 2021 | EP5《成功的反思》：當代著名政治哲學家揭示人民憤怒嘅來源（中集） | 00:34:47 | |
呢集，牛哥首先會用歷史嘅進程為你解釋喺當前時代感到前路茫茫，實屬正常。既然未來好似迷霧，咁就係時候去靜一靜落嚟，去反思一下自己一直理解嘅概念係咩意思。今次，我哋一齊思考民主。
Michael Sandel 唔單止認為才知主義對才知者同非才知有害，更係會令現代民主失效。因為才知主義下，人民將自己嘅政治權利雙手奉上到代議士手中，但代議士根本唔會喺議會中理性討論。
一齊聽下現代民主嘅可惜之處，去認清我哋以為熟知嘅概念。一齊聽下現代民主嘅可惜之處，去認清我哋以為熟知嘅概念。
(正式內容由09:35開始）
_____
Instagram: @cowgortalk
文字版：https://bit.ly/3quamKA
| |||
| 07 Nov 2021 | EP22《奴隸哲學家的人生通識課》：Stoic話你知點樣喺枷鎖中活得自由（下集） | 01:01:03 | |
今集，Epictetus 終於要開始教我哋點樣先可以控制情緒，超出外在事物嘅限制，從而你會發現，Epictetus實在係語出驚人 {牛哥超譯，去吸引你去聽}： 1）我哋好多時都當咗自己嘅意見係反映事物本身，真係錯晒！ 希望你聽完呢集，就算唔能夠令到你好似Epictetus咁豁達，起碼可以用一個輕鬆啲嘅方法，去看待你人生會遇到嘅事事物物，唔再驚失敗，為諸事感恩，相信就係Epictetus 最勵志嘅地方。 呢集嘅最尾，牛哥會為你解答一條千古難題，其實，人生就係... ...聽咗你咪知！ | |||
| 01 Jun 2023 | 【諗諗下唔對路】天文學家從兩萬年前嘅洞窟壁畫，發現金牛座嘅蹤跡。星座居然係舊石器時代嘅產物？｜《人類大宇宙》 | 00:24:28 | |
科學從十六世紀開始窺視宇宙，當宇宙變得極度宏大，地球亦慢慢從存在嘅中心被踢到銀河系嘅邊緣，最終構築出一個冷冰冰嘅宇宙，唯一嘅熾熱就只有一開始嘅Big Bang同恆星嘅核聚變。失去地心說，彷彿暗示住，生命只係隨機嘅意外結果。霍金話： 「我們只是「化學渣滓」，存在於一個中等大小的星球表面，繞著一個沒什麼重要性的星球運行。」 唔通，人只係「無意義宇宙中的被動機械」、喺無關痛癢嘅星球、過住無關痛癢嘅生活？ 其實，自然科學並唔係對天文學嘅唯一詮釋。《人類大宇宙》嘅作者喬．馬錢特希望從一個宏觀視角去檢視人類對宇宙信仰嘅「深度歷史」，亦即係我哋喺上集所提到嘅「深邃時間」。用十二個故事，帶你重新體會「深邃時間」下嘅天文學，透過將人類有紀錄以嚟對天文嘅想像，我哋會發現天空點燃人嘅生命力同創意，引發人無限聯想。 好長時間以嚟，考古學家都唔選擇用天文知識去理解石器時代嘅建築、藝術、文化。作者表示，與其話學界否定石器時代嘅人擁有天文知識，倒不如話根本無討論呢個可能性。因為考古學家認為，星座最早嘅文字紀錄係源自於三千年前嘅巴比倫祭司，佢哋會將昴宿星團睇成天上公牛背上嘅鬃毛。 換言之，金牛座係三千年前嘅產物。所以當人發現拉斯科洞窟中畫住大大小小嘅公牛，都無諗過呢班二萬年前嘅狩獵採集者會有金牛座嘅概念。 但係，近年有唔少人類學、神話學同天文學等等領域嘅專家都主張，人應該徹底重新評估舊石器時代祖先嘅知識同能力；佢哋嘅故事，可能有住極深遠嘅影響力。甚至，有天文學家表示，兩萬年前嘅拉斯科洞窟壁畫上面嘅原牛，唔係畫緊狩獵場境，而係天上嘅金牛座。到底點解佢會咁諗呢？ 今集，我哋就要一齊思索：金牛座係三千年前巴比倫人嘅創造，定係兩萬年前嘅產物呢？ 你會發現，天空嘅故事植根於遠古文化，而天空對人類嘅影響，比你想像中深遠得多。 | |||
| 21 Jul 2023 | 【會員Podcast 全集試聽】生活雜談（1）：從歷史觀看人類點樣用千奇百怪嘅方式「服用」咖啡。原來咖啡最初唔係用嚟飲……丨《咖啡癮史》 | 00:33:19 | |
對呢個系列有興趣，可以考慮加入會員聽晒成個系列、支持一下牛某！用相當優惠嘅價格，就可以聽到牛某用心製作嘅內容。 會員podcast 有牛哥解經，主要講中國哲學以及歷史；西哲幼稚園講西方哲學家嘅歷史同基本概念；生活雜談陪你輕鬆讀唔同種類嘅作品！ 引子： 一個人就算飲唔飲咖啡，只要出街就總會見到幾間咖啡店。但係你認唔認識咖啡嘅來源、歷史？ 文獻首次記錄咖啡，係喺十五世紀嘅阿拉伯世界，距離依家只係七百年。當時，咖啡可以話係阿拉伯人嘅專利，出名到啲人將咖啡豆同阿拉伯畫上等號，法國植物學家安托萬·德朱西厄Antoine de Jussieu 仲將見到嘅咖啡豆稱之為阿拉比卡咖啡豆(Arabica beans）。 你以為阿拉比卡咖啡豆就係源自於阿拉伯？少年你真係太年輕，正如阿拉伯數字係源自於印度數字，只係因為西方人從阿拉伯嘅文獻學到012345678910嘅系統，先稱之為阿拉伯數字。其實阿拉比卡咖啡豆唔係源自於阿拉伯。（我喺正文內容再同你講講關於0嘅小知識，原來0係一個幾獨特嘅「數字」。） 《咖啡癮史》嘅作者表示，阿拉比卡咖啡豆嘅真正原產地係喺衣索比亞，即係東非，仲要有千年以上嘅歷史，衣索比亞一開始唔會飲咖啡，而係……一陣再講。另外，如果我哋找尋咖啡嘅傳播路線，就會發現一條橫跨大海嘅路線，即係由衣索比亞、葉門，到印度、印尼同拉丁美洲，正正同殖民帝國嘅擴張路線不謀而合。 依家嘅中南美洲係阿拉比卡咖啡豆盛產地，占全球咖啡豆產量七成以上。其實喺十八世紀初之前，當地連一棵咖啡豆樹都無。所以咖啡嘅傳播同殖民帝國係密不可分，你飲嘅咖啡其實係殖民結果。 咁又唔使急於放低你杯咖啡，正如過去嘅鹽糖係奢侈品，古人為咗鹽糖而衝突、甚或戰爭，今日嘅鹽糖就變成工人汗水同工廠現化代機械嘅產出；過去咖啡係伴隨刀劍，今日嘅咖啡已經稱唔上係殖民貨物，而係影響世界嘅作物、普遍而重要嘅貨幣。我哋就會要去探索一下當中嘅有趣歷史，你會發現唔同民族對於咖啡有住好唔同嘅形容。例如作者喺印度加爾各答見到一本書，書中形容咖啡豆係「來自非洲的邪惡黑豆。」當中寫到： 「我想請問讀者，那些黑皮膚的野蠻人在祭神的動物犧牲前吃下咖啡豆，你們不覺得很古怪嗎？其實只要比較愛喝咖啡的暴力西方民族，和愛飲茶的和平東方族群，就可以清楚了解苦澀咖啡給人類帶來怎樣的害處，甚至致命影響。」 睇落就係將咖啡同西方殖民暴力扣連；相比之下，西方人對咖啡係非常重視，甚至視之為理性嘅象徵。十九世紀法國歷史學家朱爾・米榭勒(Jules Michelet)認為，本來歐洲係一個酒鬼國度，肆意放縱，但因為咖啡轉入西方，令西方成功轉型做一個飲咖啡嘅理性社會，係西方文明嘅啟蒙。米榭勒寫道： 「文藝復興發抒的新思潮，部分歸因於一件足以養成新生活習慣，甚至改變民眾氣質的大事件──那就是咖啡的出現。」 （被殖民者視之為暴力；殖民者視之為理性，實在係一個值得留意嘅對比） 到底食物會唔會默默影響住歷史呢？有研究民族植物學嘅專家表示，特定嘅蘑菇或者葷（音：勳）類的確會有改變腦部作用嘅成分。例如馬雅人描述「祭祀用美洲虎」其實係祭司準備迷幻藥時所用嘅青蛙；埃及法老嘅神聖紫羅蘭之所以神聖，係因為佢有迷幻作用嘅毒性。呢啲都係令人上癮嘅麻藥，而咖啡就係其中之一，咁咖啡係令人暴力定令人理性呢？ 作者作為咖啡狂徒，決定走訪世界，誓要搵出一切關於咖啡嘅故事。 我分成咗三大部分，分別係：
今集係「衣索比亞：咖啡源頭。戰爭、山羊與巫術」，會講講衣索比亞人係點樣看待咖啡、關於咖啡同山羊嘅傳說、同埋講講咖啡呢個名嘅可能來源，原來咖啡最初唔係用嚟飲…… _____ Instagram： @cowgortalk YouTube：讀物農莊 Anybooks Farm Patreon：patreon.com/cowgortalk | |||
| 23 Oct 2022 | S2EP4 人類點解咁少毛？裸體係爲乜？從動物學角度分析人類性行爲｜《裸猿》（下） | 00:22:42 | |
從動物學家嘅視角嚟睇，智人係裸猿。但係，點解裸猿要咁特別、裸咁多呢？今集，我哋繼續講講《裸猿》。 如果我哋將視角放大啲，去睇下現存嘅4237種哺乳類動物，差唔多全部都有具保護作用嘅皮毛，只有好少喺無毛皮嘅覆蓋下生存。哺乳類嘅遠古祖先固然係爬蟲類（爬蟲類無乜毛皮），但哺乳類身體結構已經非常唔同、變得好依賴毛皮。因為哺乳類演化成恆溫動物，即係體溫維持恆定、同時較高體溫（就好似人類嘅正常體溫係36、37），咁就可以有一個比較高嘅代謝率，換取更強嘅生理能力。一層毛鬙鬙嘅皮毛，就能夠有效隔絕溫度嘅散失。喺豔陽之下，又可以防止體溫過高、避免太陽直曬所造成嘅皮膚灼傷。 有人曾經喺沙漠做過一個實驗，結果證明着輕便嘅衫可以減少水份嘅蒸發，因而減少體溫嘅流失；另外，同裸露嘅身體比起嚟，身體吸收嘅熱量亦都減少左55%。可見遮蓋身體喺高溫環境下嘅重要。阿拉伯人就好明白遮蓋身體嘅重要，佢哋會偏好着嗰啲質地好厚嘅寬鬆罩袍喺沙漠度行。 咁點解有動物要放棄呢個又可以保溫唔驚凍、擋熱唔怕曬嘅體溫調節工具？ 多數係為咗適應一個嶄新嘅環境，好似蝙蝠為咗飛上天而減輕體重；穴居嘅哺乳類，例如裸鼹鼠、土豚、犰狳，長年都唔需要出現喺地面，就放棄皮毛；水生哺乳類，好似鯨魚、海豚、海牛、河馬都係為咗身體變為流線型，咁樣可以方便游水。但係，對於典型嘅地表生活嘅哺乳類嚟講，基本上都有濃密嘅體毛。作者給予嘅結論係： 「撇開像是犀牛和大象這些在身體調溫方面有問題的異常大型動物之外，在數千種長滿濃密體毛的陸棲哺乳動物當中，全身無毛的裸猿算是獨一無二的例子。」（頁37） 咁到底裸猿係為咗穴居定係水棲，定還是係因為獨特嘅裸猿生活方式？ 喺今集你會搵到答案。 | |||
| 07 Apr 2025 | 十分鐘跟住《原子習慣》改變人生（2）：長年積弱嘅英國單車隊靠呢招成為單車界霸主——微小增長嘅複利秘密；用理論教你捱過三分鐘熱度！〈基本原理：為何細微改變會帶來巨大差異？〉 | 00:20:08 | |
喺單車界入面，最大型嘅賽事莫過於環法單車賽。英國喺呢場比賽入面嘅表現，一直都唔係咁好，長達110年嘅時間入面，係冇一個英國選手喺環法單車賽當中奪冠。自1908年起，英國單車選手只係喺奧運會上拎過一塊金牌。有一啲專業嘅品甚至因為英國單車選手表現太差，唔想影響自己嘅專業形象，所以唔肯賣商品畀英國團隊。 終於，喺2003年，英國單車協會嘅命運改變咗，因為佢哋雇用咗戴夫．布萊爾斯福德作為國家隊教練。布萊爾斯福德極度着迷一套原則，佢相信住喺每一件事情當中要搵到微細嘅改善空間，就可以得到「微小增長的總和」。布萊爾斯福德講到：「整個原則的概念在於，如果把關於騎自行車的所有面向分解，讓每個面向都改善百分之一，全部加起來就會得到可觀的成長。」…… | |||
| 19 Nov 2023 | 【諗諗下唔對路】孔子係「野合之子」，仲將母親嘅棺木泊喺大馬路？佢老豆原來係... | 00:17:07 | |
明明孔子有個老虎咁好打嘅老豆，點解《史記》話「孔子貧且賤」、係「野合之子」，仲話孔子要將母親嘅棺木泊喺大馬路？ 孔子嘅說話，你就聽得多（咩學而時習之／三人行必有我師）。但你有無諗過孔子嘅人生係點呢？最簡單咁問，孔子嘅童年係點？點解《史記》所講嘅野合之子會成為萬世師表？今次，就用十五分鐘嘅時間同你一齊用《史記》回顧孔子嘅童年。 你會發現，孔子嘅故事唔係紙上談兵、議論天地嘅貴族之子，孔子係聖人，但首先佢係一個有血有肉、從現實掙扎嘅平凡青年。佢成長於單親家庭，自出生就唔被視為貴族，然後，營營役役、捉住機會，依靠亡母嘅棺木去換取貴族身分。對於當時人嚟講，孔子嘅行為係壞過凱婷。 一齊睇下，被人稱為「累累若喪家之狗」嘅孔子到底點樣去追夢。 | |||
| 20 Nov 2022 | S2EP6 古人對時間嘅理解同你差天共地？睇下初民點解放棄歷史，進入時間輪迴｜時間與反覆｜《宇宙與歷史：永恆回歸的神話》（二） | 00:33:00 | |
歡迎你返到嚟第二集嘅《宇宙與歷史》，主題係「時間與反覆」。上集講咗初民嘅四個預設，今集就要講講喺呢四個預設之下，初民點樣放棄歷史，進入到時間輪迴當中。 點解時間係一個循環？因為宇宙雖然係神明嘅造物、分享住神明嘅完美，但呢個完美會自然衰敗，就好似四季嘅流轉。神話以一個原型解釋住一切事物嘅起源、成長、巔峰、衰落嘅週期性發展。從起源到衰落，又必定會回歸到起源，又再到衰落，周而復始，彷彿永不止息。循環嘅模型之下，有超自然嘅存在者、神話嘅英雄會負責成就、整頓宇宙嘅秩序，而宇宙亦會因為英雄嘅失去而落入失序。 初民嘅視角專注於呢個美好嘅原型，一方面透過反覆呈現、實現原型，一方面將具體嘅現實時間——即係歷史，置諸門外，抗拒歷史、棄絕歷史。 透過理解初民對時間嘅理解，或者可以令你窺探一下點解初民會接受飄渺嘅神話，明明活喺時間嘅反覆，但又好似活喺樂園當中。現代人從時間嘅反覆當中逃脫出嚟，但又喺歷史嘅進程當中感到被時間嘅長河拋棄。透過神話同歷史，我哋一齊思考時間。 內容包括： ・初民將時間分成神聖同世俗 | |||
| 26 Jul 2024 | 牛哥讀經（4）丨胡適 4丨用歷史方法，重觀中國禪學史。第一步，由印度禪講起丨〈中國禪學的發展〉（導言、第一講，印度禪）【會員Podcast 全集公開！】 | 00:33:46 | |
歡迎你嚟到《牛哥讀經》嘅第四集，今集係胡適系列嘅第四集，我哋要睇睇胡適對於中國禪學嘅睇法。上次講完胡適點睇人生，本來預備想同大家分享胡適點講五四，但適逢喺《牛哥講經》我哋講緊鈴木大拙同胡適嘅分別，我就搵咗胡適對北京師範大學師生嘅演講，作為一個直接嘅補充。 我哋必須要留意，印度佛教同中國佛教固然係相關，但係佢哋對於經典嘅理解、僧團風俗……都係相當大嘅差異。而呢種差異，係禪者自己都會意識到，所以喺《鈴木大拙禪學入門》，我哋會見到鈴木大拙自覺東方禪宗同印度精神有好大分別。至於分別喺邊，鈴木大拙就無細講。 我哋可以透過胡適好短嘅演講，睇下佢點樣用歷史視角睇印度禪，演講最後仲有兩個故事，係胡適用嚟總結中國禪同印度禪嘅分別。 〈中國禪學的發展〉（1934年12月，胡適喺北京師範大學嘅演講，吳奔星等筆記，原載於1935年4月30日《師大月刊》第18期） 音樂來源： Sonata 1 Cello https://musopen.org/zh-hant/music/2572-cello-sonata-no-1-op-5-no-1/ 按：如果大家對呢個系列有興趣，歡迎到patreon試聽其他集數，或者直接加入會員！ | |||
| 20 Feb 2025 | 《快思慢想》共讀（2）：懶散嘅系統二——你嘅瞳孔會出賣你嘅內心，心流係因為人性本懶、自我耗損可以用一招解決？丨得閒讀書會（2）丨廣東話讀書會 | 02:20:25 | |
逢星期三夜晚九點直播建議於Spotify/ patreon觀看 原片：https://www.youtube.com/live/VARX-6GYw90?si=tXE6T6XZUrHTNdG4 patreon:https://www.patreon.com/cowgortalk 本集章節： 00:00 引子 ch.2 注意力和力氣 03:00 注意力與努力——瞳孔，出賣你內心嘅第一扇窗 ch.3 懶惰的控制者 55:27 有限負苛 01:03:41 忙碌且筋疲力盡的系統二——「自我耗損」 01:34:40 懶惰系統二 01:51:40 智慧、控制和理性 02:07:00 總結 | |||
| 17 Jul 2021 | EP7《成功的反思》：當代著名政治哲學家揭示人民憤怒嘅來源（下集） | 01:30:41 | |
終於嚟到成功的反思嘅最後一集，牛哥喺開始嘅時候會記錄七一刺警同信義中學，然後去講sandel 點樣簡單解釋自由市場自由主義同福利國家自由主義嘅內容同點樣暗地裏支持才知主義，從而掘出才知主義嘅核心。Sandel 到底覺得對政治哲學有重大影響嘅Rawls有咩缺失？ | |||
| 03 Apr 2025 | 死亡哲學入門：哲學家會點樣思考死亡？耶魯大學教授：「一般人對於死亡本質的普遍觀點……從頭到尾錯得一塌糊塗」丨哲學即食麵（13）丨《令人著迷的生與死》，第一章〈思考死亡〉 | 00:24:12 | |
死亡係咩？呢個問題係我哋好著意，但又未必會深入思考嘅問題。喺你嘅回憶當中，你有無試過喺靜落嚟嘅時間，問自己：如果心跳停止，咁我仲存唔存在？唔知你嘅答案係咩呢？又或者有無給予答案呢？ 你係咪相信自己有個靈魂，會喺肉身消失後繼續飄蕩下去？定還是話，死亡只係一場徹底嘅終結，連你嘅意識都化為烏有？ 如果你需要有個人認真同你思考死亡，咁Shelly Kagan——呢位耶魯名師，同時係《令人著迷的生與死》嘅作者——會係你好好嘅引路者。佢係一個有趣嘅哲學家＋哲學老師（有時哲學家無口材就做唔到好老師）。呢個留住落腮鬍、著牛仔褲同帆布鞋嘅老頑童，從1995年起喺耶魯大學開咗一門叫「死亡」（Death）嘅通識課。 Shelly Kagan唔似傳統教授咁悶，成日盤腿坐講台，幽默又熱情咁同學生講人生同死亡，令哲學課變得相當吸引。2007年，耶魯將呢門課拍成公開課程，全球破億人次點閱，同哈佛嘅《正義》、《更快樂》並列長春藤三大王牌課程。《令人著迷的生與死》就係卡根將課程精華重新整理寫成嘅書。2012年喺韓國出書，賣咗超過15萬本，係超暢銷哲學書；2014年仲攞咗中國《新京報》年度最佳思辨書獎。 呢本咁活潑嘅哲學著作，會同你一齊嘗試揭開死亡嘅面紗，問一啲你可能從未敢問嘅問題。而Shelly Kagan為咗等大家對本書有啲合理預期（如果本書唔啱你，你都可以即刻知道），佢喺開始嘅時候，就要首先講下呢本書唔會討論啲乜…… | |||
| 07 Aug 2021 | EP10《人類學家的無政府主義觀察》：其實你係一個無政府主義者，喺混亂中創造新嘅可能（一） | 00:42:26 | |
今集要講嘅書係《人類學家的無政府主義觀察》，所以喺開頭嘅時候，會講下我所觀察到嘅消費劵使用頻率，而消費劵嘅目的，可能比你我諗嘅仲要深遠。 喺早幾集我哋講到《成功的反思》，可以見到一個社群主義者點樣以哲學嘅方式去審視政府同人民、才知者同非才知者嘅對立。而《人類學家的無政府主義觀察》除咗同樣揭示政府同人民嘅對立，更以此顯示秩序同混亂嘅對立，將秩序嘅井然、死板，混亂嘅創新、不堪一一道來，以一個中立嘅視角陳述各自嘅利弊，以嘗試尋求政府同人民嘅平衡點。 邀請你同牛哥一齊，戴上作者嘅「實踐中嘅無政府主義」嘅眼鏡，去用作者所觀察到嘅一塊又一塊碎片，去拼湊出一幅屬於你自己嘅無政府主義式生活嘅心態。 希望聽到最後嘅時候，你能夠感受到我所感受到嘅「我們最幸福」。 （正文由07:08開始） | |||
| 13 May 2023 | S2EP19 文化通識101：新儒家，新喺邊？簡介新儒家嘅歷史觀、反對佛教嘅原因、對民主科學嘅關懷丨〈當代新儒家面對的問題及其開展〉 | 00:53:54 | |
（呢一集本來係牛哥解經，你可以當係試聽版。覺得有意思可以支持一下） 現代人讀中國哲學，點都避唔開會讀到新儒家嘅作品。但係新儒家新咗喺邊？新儒家嘅視角點睇以前嘅儒學？新儒家嘅目標係咩呢？ 今次想藉由王邦雄嘅《中國哲學論集》入面嘅〈當代新儒家面對的問題及其開展〉為大家講講咩係新儒家。雖然呢篇文章看似係陳述新儒家嘅特性，但我睇落似係王邦雄對新儒家嘅總結同寄望。 王邦雄確確實實係一位新儒家學者，佢曾經跟過梁漱溟、熊十力等等嘅新儒家大師學習，同有份創辦《鵝湖月刊》，當中收集唔同嘅中國哲學學術文章。佢嘅總結應該好能夠展現新儒家嘅精神所在。 事先聲明，我唔係一個新儒家。我有部分唔同意王邦雄嘅諗法，所以我會將佢一啲帶有主觀情感嘅用字，轉化為較中性陳述（尤其係王邦雄對於漢儒、清儒、馬克思主義嘅睇法）。所以呢篇文唔係我嘅立場，又唔完全係王邦雄嘅文字。 希望能夠以一個第三人身嘅角度，為你轉述一位新儒家學者點樣整理新儒家嘅理念。 內容包括：
按：如果我無指明引文係邊個講，照道理就係引緊王邦雄。 《牛哥講經》嘅內容係牛某全職寫作而得出，加上牧草嘅用心製作，所以你嘅支持對《牛哥講經》非常重要！如果你覺得《牛哥講經》值得支持／你想聽到牛某製作嘅更多內容、聽返線上讀書組嘅重播，好歡迎你加入到patreon，一齊閱讀、一齊思考。 | |||
| 13 Jun 2021 | EP1《初戀三摩地》：用名僧嘅戀愛故事為你講述愛同佛法（上集），青年時嘅一行禪師，遇上愛情風暴…… | 00:22:32 | |
一行禪師原本全心專注於佛法嘅研習當中，但當一行遇到佢嘅時候，發現愛嘅種子明明確確咁生起，引發禪師對愛情嘅反思。如果求學時期不應談戀愛，咁求佛時期愛上一個人又點算呢？一齊聽下呢場戀愛故事，你就知道答案。
_____
Instagram: @cowgortalk
文字版：https://bit.ly/34J69Zc
-----索引
00:55 初戀三摩地簡介 愛同去執嘅顯然矛盾
03:25 禪宗公案：婆子燒庵
04:35 一行嘅背景
06:05 一行遇到佢
06:55 愛嘅種子生起
07:30 解釋藏識
09:55 愛同戒律，並唔相容
11:00 在家修行，仍保有愛
13:25 領會佛法，如同捕蛇
14:10 法尚應捨，何況非法
14:50 到彼岸去，就放下筏
16:15 見山是山，見水是水
17:20 欣賞無常，接受無常
19:55 佛陀嘅愛，叫做慈悲
22:00 多謝收聽
| |||
| 21 Feb 2025 | S2EP52 莊子哲學入門（1）：莊子眼中嘅諸子百家——孔墨、楊朱、惠子、列子、老子嘅古道遺風丨王博《莊子哲學》 | 01:08:54 | |
莊子身處喺戰國前中期，各種思想同學術都喺呢個時代展示出最大（而且最後）嘅活躍。儒墨作為兩大思想流派、黃老楊朱得到充足發展、法家適應現世政治需要、名家展露名理思辯。「其學無所不窺」嘅莊子，自然了解當時百家爭嗚嘅盛況。 但係，有邊啲思想真係影響住莊子呢？儒墨固然係莊子所非常著意，《齊物論》入面提到「道隱於小成，言隱於榮華。故有儒、墨之是非」就係一方面描述儒道之間辯論之多，另一方面扮演斷水流大師兄，表示儒墨都有問題。 雖然從立場上，我唔完全接受王博嘅判斷。佢嘅立場較為傳統，即係莊子反孔而繼老。但我呢集嘅目的唔在於批評佢，而我認為大家熟知莊子反孔繼老嘅立場亦都係一件好事。你接受嘅，起碼有個立場可言。唔接受嘅，起碼有個反駁嘅起點。 我哋第三集莊子哲學入門會講到王邦雄嘅睇法，佢認為讀莊子要先讀〈天下〉，因為〈天下〉嘅特色就係要從莊子視角去評斷百家，從莊子面對百家嘅態度，就可以反顯出莊子嘅態度同工作。我喺線上讀書組有同大家睇過〈天下〉嘅內容，但並唔係每一個人都有時間逐句睇〈天下〉，王博呢篇短文〈引言：莊子的思想世界〉就可以當係雞精版，幫我哋睇睇一個傳統嘅莊子，係點睇孔墨、楊朱、惠子、列子、老子。最後，王博用咗一段我無法反駁嘅說話，總結莊子同諸子百家嘅關係。
| |||
| 19 Jun 2021 | EP3《初戀三摩地》：用名僧嘅戀愛故事為你講述愛同佛法（下集） | 00:27:24 | |
一行禪師嘅經歷，印證住遇到愛情未必係一件壞事，但仍然好難簡單咁定義為一件好事。人成日都話，知易行難，知道愛情嘅結果仍愛落去，睇落更難，而你，將要同一行一齊面對呢場愛情嘅結果。 問問自己： 如果春天嚟到，你會係靠近花蕊欣賞、定係思索點樣迎接冬天？ 如果冬天一瞬嚟到，你會手握褪色嘅花瓣、定係守護僅有嘅嫩芽/種子？ 聽牛哥用一個北歐神話總結，去細味愛情嘅味道。 | |||
| 10 Mar 2025 | 青年馬克思遇上黑格爾顯學：「哲學教導我們說，精神只有透過自由才能持存，一切都只是自由的手段，一切都只是尋求和產生自由」——哲學實踐，就係喺辯證法嘅展開中追尋自由丨哲學即食麵（12）丨《馬克思與馬克思主義》〈青年卡爾〉The Young Karl | 00:59:32 | |
大部分人都聽過馬克思主義，但馬克思主義點樣諗出嚟嘅呢？今次，我會通過講述青年馬克思嘅生平，以及簡述佢所遇上嘅時代顯學——黑格爾哲學，幫助你明白馬克思主義所面對嘅時代背景。內容分成咗四個部分：
之前喺《逃避自由》只係好快咁講咗德國學術嘅流變，至於點變，呢集就係好好嘅補充。 | |||
| 31 Mar 2025 | 《雜訊》共讀（1）：《快思慢想》作者遺作——容易忽略嘅小小雜訊，竟然會掀起法庭不公、令大公司損失千萬！？ 丨得閒讀書會（6）丨廣東話讀書會——第一部〈尋找雜訊〉 | 02:10:40 | |
逢星期三夜晚九點直播 原片：https://www.youtube.com/live/cW2pK5Vmc64?si=08ri1Cf6OQ3buoi2 Patreon觀看：https://www.patreon.com/cowgortalk （如有字幕，字幕由ai生成，我無時間檢查，如有需要，自行取用）本集章節：00:00 開場白 序言 16:57 繁體版序言 28:08 序言 51:07 第一部 尋找雜訊 56:43 01犯罪與量刑雜訊 01:16:44 02系統雜訊 01:44:28 總結閱讀材料：《雜訊：人類判斷的缺陷》 🐮 Follow IG：https://www.instagram.com/cowgortalk🐂 加入讀物農莊，一齊閱讀，一齊討論！https://www.patreon.com/cowgortalk【文稿可於Patreon免費閱讀】 | |||
| 11 Dec 2024 | 【破・破地獄迷思】目連破地獄救母？印度佛教徒：呢度無人識你喎！原來目連救母係唔關地獄事，亦好可能唔係一個源自印度本土嘅佛教故事……btw 香港嘅道士作法保留咗唐宋遺風，講下咩叫為生人破地獄丨哲學即食麵（7）丨〈佛說盂蘭盆經〉，《香港道教：歷史源流及其現代轉型》 | 00:25:25 | |
今集主要係想同大家去探討一下破地獄同目連救母嘅關係，但一嚟就睇佛經嘅話，大家可能會頂唔順，為咗等大家進入狀態，我哋講少少香港道教、科儀同破地獄嘅關係先。 當你去睇一場道教法事嘅時候，會唔會覺得個法事搞好耐？ 其實我哋依家通常見到嘅法事多數都經歷咗現代化，時間已經大大縮短。而香港嘅喃嘸道士，仲可以分成新界喃嘸道士，同市區喃嘸道士，新界喃嘸道士就主要處理新界本地嘅水上人嘅儀式，而市區喃嘸道士就主要處理市區殯儀館嘅儀式。作者寫到：「與香港市區的喃嘸法事相比，我們在新界鄉村地區所見的道教齋醮儀式更為完整和傳統」（頁81），因為新界喃嘸道士會較強調保留經典《青玄集要煉度施食科儀》（我哋簡稱做《青玄科儀》），《青玄科儀》分上下兩部，單單上部就要三個鐘頭。而市區喃嘸道士都係用《青玄科儀》，不過多數都會簡化唔少，大約四十五分鐘就可以完成。 雖然簡化咗，但結構上仍然係相似或一樣。因為「道教以其繁複的宗教儀式而著稱，從某種意義上來説道教是以科儀立教的。」（頁121）所謂科，就係程，亦即係程序、門類、規範嘅意思，所以科儀就係一套井井有條嘅儀式。而香港嘅道教係保留咗相當多傳統，「雖然香港地處中國的東南一隅，但道堂科儀基本上保留了唐宋時期的道教科儀傳統，古風盎然。」（頁121） …… | |||
| 25 Apr 2022 | EP45 「人文精神的躍動」：回帶睇下中國哲學嘅起源｜《中國人性論史》 | 00:51:52 | |
上集我哋對照完墨子同耶穌，今集我哋返到去諸子百家嘅世界。本來今集係要去講老子，但我想先為大家補充一下老子面對嘅時代背景，所以我今集會以徐復觀嘅《中國人性論史》作為補充，去講講周初嘅思想。 你可能會覺得，周初嘅思想咪就係封建禮制。其實，如果我哋去重睇周文王同周公嘅講法，就會發現周人去反抗商朝，係因為對人民痛苦嘅憂患，後嚟建立禮制，並唔係用嚟限制人，反而係一種解放；禮制，係周人對於商朝崇拜宗教嘅哲學反省，將天嘅地位拉低，重新將視角放返到去人嘅身上。如果要講中國哲學嘅起源，就唔能夠唔了解文王同周公嘅諗法。徐復觀更認為，周初嘅思想，係中國人文精神嘅躍動。換句話說，中國人文精神唔係始於老子、孔子，而係始於周朝開國。 只係，周初嘅哲學思維仲未成熟，當中嘅一個缺憾令到呢一套原本係以民為本、解放嘅思想，慢慢變成天子無力控制天下、禮制壓迫人民、諸侯混戰嘅血腥年代。面對住呢一個背景，先引發到老子用一個否定嘅態度去對禮制作出「反動」；孔子用一個肯定態度，承先啟後，嘗試將周初唔成熟嘅哲學思維改善、將缺憾解決。如果唔了解周初嘅哲學思想，咁只會對老子、孔子嘅思想一知半解。今集會用一個鐘嘅時間，為你完整講講中國哲學嘅起源。內容包括： ・商朝嘅時候，人都認為天命不可逆，但周文王提出，人只要努力就可以改變命數 一齊聽下，周初嘅先進，點解會造成春秋面對住「率獸食人」嘅禮教，然後我哋先會明白老子對禮制作出反動宣告當中嘅意義。 | |||
| 20 May 2023 | S2EP20 西方始祖被逐伊甸園，注定一個絕對嘅上帝；中國文化喺二千年前以「絕地天之通」去除上帝，為「無上帝嘅世界」帶嚟解答丨〈「絕地天之通」與「巴別塔」──中西宗教的一個對比切入點之展開〉 | 00:58:45 | |
唔知你有無一種感覺，讀中國經典同讀西方哲學時總係會感受到明顯嘅分別，但又唔容易講出個分別？上集講到王邦雄，今集就用王邦雄有份搞嘅《鵝湖學誌》當中，林安梧寫嘅〈「絕地天之通」與「巴別塔」──中西宗教的一個對比切入點之展開〉，對照中西文化喺天人問題嘅答案（宗教），以此簡單了解中西文化嘅差異來源。 你可能會問，天人問題點解咁重要？依家廿一世紀，我都唔信天。 林安梧認為，人生於天地之間，講嚟講去都係三個問題，而三個問題當中，天人問題可謂係最為根本嘅問題。三個問題分別係人己、物我、天人嘅關係。 人己即係倫理問題，講人同人之間嘅義務同責任； 物我主要係知識論問題，到底人同物嘅關係係點，人要點接觸外物呢？ 天人問題就係形上問題，世上有無冥冥中嘅主宰呢？係有個人格上帝、定係自然規律呢？而其中一個天人答案就係宗教，宗教訴說住人同神嘅點樣分隔、點樣契合，正正影響人點理解自己嘅存在。而天人問題嘅答案往往會決定人對人己、物我嘅睇法。 如果小明認為天人答案係梵天一夢，咁物我、人己都只係夢中之物，人嘅目標就係要回復清醒。所以唔少學者都認為，要研究一個文化，幾乎唔可以忽略佢嘅宗教，林安梧講到： 「因此，只要您把握了這個關鍵點，您就能清楚的掌握到人類文明的入路，從而清晰的論斷出彼此的異同。」 從絕地天之通與巴別塔，你會發現中西文化源頭上嘅南轅北轍，兩者對於天人問題提供兩個截然不同嘅解答──中國預設天人為連續，西方視天人為斷裂，由此生出性格唔同嘅文化。 內容包括：
依家，一齊睇下神話點樣影響文化性格。 | |||
| 15 Dec 2022 | 【諗諗下唔對路】「哥貝克力石陣」為文明進化論掛上大問號，顛覆考古學家對農業發展同舊石器時代嘅理解｜《諸神的魔法師》 | 00:24:48 | |
今集同你一齊聽聽哥貝克力石陣發掘者點諗。 哥貝克力嘅意思係肚臍之丘，有時會被譯成大肚丘，就正如佢個名一樣，只係一個微微突起嘅山丘，並唔起眼，人經過都未必會留意到。但正正係呢一座小山丘，改寫咗考古學家對農業發展同舊石器時代嘅理解。因為哥貝克力有一個石陣，係目前被科學所確認嘅最古老嘅人造巨石建築。 本來考古學家相信人類喺舊石器時代（300萬年前－1.2萬年前）主要係以狩獵採集者形式生活，而到舊石器時代末期慢慢開始去逐少逐少咁發展農業。呢種諗法我哋暫稱為文明進步論。 其實都好合理，因為通常事物都係由簡單到複雜咁演變。所以1.2萬年前嘅人應該係啱啱嘗試脫離狩獵採集，只有鬆散嘅分工同簡單嘅農業。 喺舊石器時代之後，就係新石器時代，而新石器時代嘅巨石陣多數係喺早六千年前建立，自然有住發展耐啲社會分工同農業。佢哋有能力統合一班人，並且供養到一班人搬石頭，都仲算係合理。 但係，呢種文明進步論難以解釋喺哥貝克力石陣所發現到嘅一切。 點解？因為哥貝克力石陣嘅精美同規模本來被考古學家認為唔可能係舊石器時代嘅產物，但結果被放射性碳定年法確定佢就係舊石器時代嘅產物。因此，坊間就有唔少對於哥貝克力石陣嘅想像，例如既然舊石器時代嘅人根本無能力去起石陣，咁哥貝克力石陣證明咗有外星人去建造呢啲巨石建築。 今次呢一本《諸神的魔法師》嘅作者，葛瑞姆・漢卡克(Graham Hancock)就喺2013年9月嘅時候，訪問咗發現呢一個石陣，並將呢個石陣嘅奧妙展現畀世界嘅考古學家──克勞斯．許密特。聽聽佢親身講講點樣喺文明進步論嘅主流下，將哥貝克力石陣發掘出嚟，同埋佢對於哥貝克力石陣嘅理解到底係點。 今集會講講： - 哥貝克力石陣係少數舊石器時代嘅戶外遺跡，原因同放射性碳定年法嘅盲點有關 希望你聽完今集之後，會明白到點解許密特話： 「嚴格來講，我們不能說哥貝克力石陣是一座神廟。且讓我們稱呼他是一座山丘聖城。我不能說會改寫歷史，而是對現存的歷史增加一篇重要的章節。我們認為從狩獵採集者到農夫的變遷過程很緩慢，是一步一步地進展。但現在出乎意料的是，在這樣的時期，這令人興奮的遺跡被建造出來。」 | |||
| 01 May 2022 | EP46 個個都講仁，唔通真係有仁咩？老子話天地不仁，有爲嘅政府只會壓迫人民｜《中國哲學史大綱》（四） | 00:53:41 | |
胡適去編定中國哲學史嘅順序同大多數人都唔同，佢第一個介紹嘅唔係孔子，而係老子。可能係因為老子最早出現，亦可能係因為胡適認為老子嘅政治理念最能夠對應當時人民嘅哀嗚。佢更加形容老子嘅哲學係一個革命、係一種反動。 「在中國的一方面，最初的哲學思想，全是當時社會的現狀所喚起的反動。」（本書，頁五零） 哲學係對當前嘅解決方法提出疑問嘅精神。周人唔滿意帝辛漠視人民，提出反動。同樣，老子面對本應該回應上天嘅禮制，如今變成食人嘅禮制，唔滿意一個處處講禮義嘅社會之下，人民生活喺虛偽嘅壓迫之下。既然禮制變成依賴一個具道德意識嘅人格神所維持嘅強逼，老子去重新思考上天嘅時候，就提出一個無喜怒哀樂、自然嘅「道」作為萬物嘅根源，同時「道」成為思想嘅終極，推翻周初對天嘅理解。後嚟嘅思想家都變成「尋道者」，對道本身、同尋求道嘅方法作出唔同嘅詮釋。儒家以仁心作為終極、墨子以天志為終極，重新發展周初嘅道德人格神、法家將老子嘅無為逆轉……今集，我哋會嘗試顯淺咁講少少道嘅意思，同埋呢個道點樣回應時代，所以主要會講老子嘅政治哲學。內容包括： ・詩經用一個個無名詩人嘅詩句，去唱出春秋時期人民嘅苦況 （按：由於胡適講得有啲簡單，大部分對老子嘅補充都係我嘅詮釋，基本上呢次多數時間我都係合埋胡適本書嚟寫。） | |||
| 04 Jun 2023 | 牛哥三個字｜電子書：KOBO SAGE 長期使用者嘅體驗報告 | 00:22:23 | |
本身想出一集去對比唔同電子閱讀器，但諗諗下，我直接同大家分享一下用KOBO SAGE嘅感受，相信會更有用同直觀。 內容包括：
最後會畀啲建議，提醒各位要考慮咩條件嚟選擇適合你電子閱讀器。 同埋講下我所預想嘅未來書店。 | |||
| 02 Jul 2022 | 牛哥三個字｜墮胎權：羅訴韋德案有關鍵缺陷？美國最受歡迎大法官金斯伯格點睇？ | 00:24:15 | |
美國最高法院喺6月24日推翻咗羅訴韋德案，意味住墮胎權唔再係一個憲法權利（constitutional right）。有關於羅訴韋德案，其實喺我ep.13-14所提到嘅書，《「我反對！」不恐龍大法官RBG第一手珍貴訪談錄》，當中就有提到羅訴韋德案，但我無喺ep.13-14提到。今集就用三個字時間同大家分享下金斯伯格點睇羅訴韋德案。如果你唔知金斯伯格係邊個、唔太了解美國最高法院點運作，咁你記得聽返ep.13-14。今集內容包括： －羅訴韋德案嘅背景 | |||
| 11 Feb 2023 | S2EP12 傳說中嘅紫紅民族「腓尼基」，處於彈丸之地，但竟然係希臘之前嘅海上霸主，仲嘲笑埃及人只夠錢買樹皮｜《腓尼基神話》（上集） | 00:40:05 | |
沿住地中海嘅東部海岸線，有一個民族住喺南到北有三百二十公里嘅狹長領土，大約位於依家嘅敘利亞、黎巴嫩一帶。就喺呢一個彈丸之地，誕生咗古地中海第一個航海同商業霸權。只係因為佢嘅文化被徹底摧毀、連根拔起，而被人遺忘。 可能你有少少疑惑，地中海第一個海上霸權唔係希臘咩？又真係唔係。 地表上嘅腓尼基雖然已經消失，但近來考古學家從地表之下嘅腓尼基墳墓，搵出腓尼基人自己所述嘅故事；考古學嘅發掘，打破咗腓尼基嘅沉默、打破希羅文明對腓尼基嘅一言堂。今日我哋終於可以稍稍清除歷史嘅迷霧，一窺腓尼基人揚帆遠航嘅英姿、知道影響住希臘─羅馬神話（同時影響住舊約聖經）嘅腓尼基神話。 一齊藉由呢一本《腓尼基神話》去用三集嘅時間、以三個階段梳理腓尼基歷史，順便係一次簡短嘅地中海史，然後再用一集時間講講腓尼基神話。 今集，就要由歷史開始，講講第一階段──埃及時期。 內容包括： 1. 腓尼基吸收並改進大量埃及文化，包括命名、喪禮同文字，發展出世上第一套字母系統，係希臘文、拉丁文、英文、法文最原初嘅祖先 睇睇曾經嘅海上王國，點解最後地上不留半點痕跡。 | |||
| 19 Dec 2022 | S2EP9 發動大東亞戰爭，同天皇神話有咩關係？｜日本二戰簡史（上）｜《日本史1600-2000》 | 00:35:27 | |
喺《宇宙與歷史》當中，我哋單獨咁理解神話點樣運用原型反覆、大時論、因果業力等等嘅系統去令人應對痛苦。但現實上，神話單獨運作並唔常見，往往會同政治、社會風氣結合。有時候，會將原來嘅神話意味改寫，將神明變成一個含糊嘅概念，甚至令到代表和平嘅神明成為戰爭嘅原因。 今次，就想透過二戰時候嘅日本講講天皇喺戰爭時期嘅角色，我會分開兩集內容。 今集我會喺開頭補充傳統天皇嘅角色同時代背景，然後透過詹姆斯・麥克萊恩嘅《日本史1600-2000》所收集到嘅資料，去講講二戰時候嘅日本政府點樣將天皇制結合軍國主義、以教育同宣傳令到國民自願投入到戰爭當中。我哋會藉住日本青年同軍人用嘅說話、書信、行動去寄托自己對於天皇嘅情感，去顯示天皇制點樣影響當時嘅日本人、睇睇點解有當時嘅人認為大東亞戰爭係一場聖戰。你會發現當一個概念變得含糊，會出現乜嘢危險嘅後果。主要係以歷史自己說話。 下集會用半藤一利嘅《日本最漫長的一天》去講講即使日本本島被連日轟炸、被投擲兩粒原子彈之後，天皇打算投降，仍然有日本軍人以造反去阻礙投降嘅歷史，總結「太初存有論」嘅作用同失落嘅結果。 今集會講講： 1. 日本天皇制嘅特別之處 有時只要擁有理論背景，當你聆聽鮮明歷史嘅陳述，就會聽出更多嘅內容。 | |||
| 17 Jun 2023 | S2EP22 愛的理論（上）：失樂園後，人類得到根本孤獨；以狂歡、跟風逃避分離、焦慮。結果發現「自我」早已被「別人」吞噬丨《愛的藝術》 | 00:50:09 | |
上集，我哋講咗佛洛姆認為愛係藝術、係一個動詞。但點解人類要愛呢？若然唔愛，咪唔會錯愛。 佛洛姆會為你講述一個關於人類根本需要嘅故事： 喺遠古之際，當人類同動物仍然分別唔大，嗰陣時嘅人係唔會愛，亦唔需要愛。《聖經》創世紀嘅亞當夏娃食分辨善惡樹果子嘅故事，正正述說住人類進入一個能夠愛、需要愛嘅世界。亞當夏娃見到彼此裸體而羞恥，唔係因為裸體本身，而係因為當人擁有理性，就會發現自己同自然界、同他人唔同，呢一種分離感，逼使到人尋求合一。呢點我哋喺絕地天之通有提及到。 分離感嘅必然，使得人天生就處於分離嘅處境，因而有解除分離嘅需求。要解除分離，自然就將自己投身到「別人」。 海德格都有類似意思。佢講到： 「事實上，自我首先和通常地（zunächst und zumeist）都是非本真的，都是『別人自身』。」（引自關子尹，《徘徊於天人之際：海德格的哲學思路》）（不過海德格嘅「別人」（das Man）有特別意思，喺下文會簡單講講咩係「別人」，我哋遲下會詳細少少講海德格！牛哥解經新系列，西哲幼稚園） 人會點樣投身到「別人」？例如糊塗咁以部落狂歡、從眾行為得到假合一…… 今集，會分成兩個部分。 第一個部分，係「失樂園：被逐伊甸」。我哋一齊睇下佛洛姆點樣寫實／科學地（？）描述，人點樣由和諧進入分離嘅世界、禁果嘅意義原來同分離有關。 第二個部分，係「假樂園：再尋合一」。講述離開樂園嘅人，從世界當中掙扎，用各種方式去尋回合一、尋找樂園；部落社會會常用狂歡、狂迷，現代社會會利用從眾。你會發現，「人，係不自覺地自願從眾」（牛某，今集）。每一個人都以為自己唔從眾，殊不知，人係自然從眾。 謹此引錄佛洛姆一段拳拳到肉嘅文字： 「大多數人甚至察覺不到他們有從眾的需要。他們生活在一種錯覺中，以為他們是順著自己的想法和嗜好行事，以為他們是個體，以為他們的見解是自己思考的結果──只是這些見解正好和大多數人的見解相同。所有人的見解一致又證明了「他們」的見解正確。又由於人們仍然有需要感覺一些個體性，他們便用各種微小不同來滿足這種需要。手提包或運動衫上的姓名縮寫，出納員的名牌，支持民主黨而不支持共和黨……這些都是個人差異的表達。廣告口號「它與眾不同」道出了對差異性那可憐兮兮的需要，哪怕在現實上這種差異性已近乎不存在。」（頁60） 現代嘅平等，早已利用人嘅從眾心態，成為去除差異、個體獨特嘅最大利器；平等變成一種新式從眾，令人變成一模一樣嘅「原子人」。佛洛姆仲因此批評唔真誠嘅男女平等，我會加把口去指責以「平等」之名，扼殺個體嘅做法。 有人話哲學家冷酷，我話佛洛姆呢個心理家嘅視角，係用最平靜、冷酷嘅語氣，去刺穿人心。 先用一段文字開頭： 身處伊甸服禁果，孤獨一身失樂園； 狂歡從眾又工作，逃避分離及焦慮； 縱身平等失自我，眾人昭昭我獨昏。 | |||
| 17 Dec 2024 | 粵語譯西遊1：西遊記一開頭用《易經》講宇宙生滅，花果山暗藏地理秘密……石猴稱王之路，明明身處人間仙境，點解愁眉苦臉？原來係因為存在危機丨《西遊記》第一回，〈靈根育孕源流出 心性修持大道生〉（上） | 00:27:14 | |
呢個系列好簡單，就係用廣東話講《西遊記》，我盡量會跟住原文，以通順作目標。有詳細嘅解讀就會放喺文稿作注。 我會照《西遊記》原文嘅次序順住講落去。不過《西遊記》一開始會講天地之數，有啲難跟，如果你無興趣，可以飛去8:47，直接由石猴出世開始講起。 呢集就試試個效果。有咩意見，歡迎提出。事不宜遲，我哋依家一齊聽下《西遊記》第一回，〈靈根育孕源流出 心性修持大道生〉（上）粵語譯西遊，一定唔夠喉！經典再釋，依家開始。 正文內容 詩曰： 混沌未分天地亂，茫茫渺渺無人見。 自從盤古破鴻濛，開闢從茲清濁辨。 覆載群生仰至仁，發明萬物皆成善。 欲知造化會元功，須看西遊釋厄傳。
…… 歡迎到patreon睇全文 | |||
| 02 Nov 2022 | 【諗諗下唔對路】「我思故我在」聽落好勁，原來呢個笛卡兒哲學嘅第一原理係推唔出其他知識，仲要一早有人講過？｜《被誤讀的哲學家》 | 00:18:39 | |
歡迎你嚟到牛哥講經嘅新系列，「諗諗下，唔對路」。呢個系列會用一啲唔對路嘅疑問作為起點，然後一步一步得出一個對路嘅答案。 問你一個簡單嘅問題，邊個開創咗西方嘅近代哲學？畀三秒時間你……三、二、一。無錯，就係大名鼎鼎嘅笛卡兒。因為佢用一套徹底嘅懷疑論去得出一句最為人熟悉嘅哲學標語——「我思故我在」。但如果我哋去檢視笛卡兒嘅懷疑論，就會輕易發現「我思故我在」並無帶嚟太多嘅創新，因為早喺公元四世紀，聖奧古斯丁就已經講過類似嘅說話。 笛卡兒嘅著名，更大可能係因為得出「我思故我在」之後嘅推論太過薄弱，所以受到大量批評。可以話，笛卡兒唔係因為哲學上嘅成就而被人記住，反而係因為哲學上嘅失誤而被人記住。 但係，點解笛卡兒講嘢會又唔係原創、又推得薄弱？因為佢嘅主業根本唔係一個哲學家，而係一個科學家，佢好可能唔會介意呢篇六日沉思編合而成嘅《沉思錄》被指責，佢更在意成功同牛頓battle 數學成就、發表自己嘅科學見解。歡迎你嚟到《被誤讀的哲學家》，今次我會為你講講點解好哋哋一個科學家，會被人以哲學家嘅身份記住。 今集內容包括： ・簡單講講笛卡兒嘅懷疑論方法 | |||
| 04 Dec 2024 | S2EP50《心經》基本前置知識（上）：由兩層波羅密多，講到苦痛根源。六個波羅密多，你又識得幾多個？丨印順法師《般若波羅蜜多心經講記》 | 00:37:59 | |
佛陀講法49年，留咗超過千部佛經，有600部經關於般若，後人收集，合稱《大般若經》。般若呢個概念相當重要，我哋可以喺《金剛三昧經》當中，見到般若被稱為「諸佛之母」，通宗記卷第二寫到：「夫般若為諸佛之母。諸法中王。一切諸佛。從茲出生。一切萬法。從茲建立。」但般若應該點理解呢？ 當時嘗試將佛經翻譯成漢文嘅僧人都認為呢個係一個難題，佢哋不停嘗試從漢字當中搵出一個概念嚟對應般若，但係即使諗到頭髮都甩晒，都搵唔到合適概念，只能夠承認漢字無一個現成嘅概念足以翻譯般若，於是就利用音譯，翻譯成般若。音譯係一種暫時吸收，先容許呢個概念通過種種經典、解說進入中國文化。仲有其他例子，三昧（三摩地）、末那識、阿賴耶識……呢啲都係譯唔到之下，音譯嘅結果。 總之，當初中國文化係缺咗「般若」思想，所以就有音譯嘅結果。而要理解「般若」呢個概念絕對唔簡單，「般若」生出擁有600部經嘅《大般若經》，係唔係要睇晒先明到「般若」呢？ 理論上就當然係睇晒最好，所以唐三藏先要辛辛苦苦將《大般若經》翻譯成漢文，不過，佢翻譯完《大般若經》之後，為咗幫大家理解《大般若經》嘅精神，又譯《心經》，而《心經》就成為佢最為得意嘅作品。依家嘅人再睇《心經》，多數都仲係睇緊唐三藏所譯嘅版本（我哋喺之後嘅集數就會講下唐三藏所譯嘅版本有咩「缺憾」）。 《心經》關理解般若咩事？《心經》全名係《般若波羅蜜多心經》，好簡陋咁翻譯，波羅蜜多，就係指抵達彼岸，亦即係佛教常用嘅「度」呢個概念（遲下你就會知點解話咁樣譯係簡陋），咁《心經》就係要幫你抵達、get到般若。但係《心經》極短，稍一不慎，就會落入口號式解讀。 為咗同大家一齊理解《心經》，我揀咗印順大師嘅《般若波羅蜜多心經講記》同大家講講一啲閱讀《心經》之前，應該要知道嘅背景知識。講佛學，自然有一定難度，各位自行斟酌。 第一部分，「苦與波羅密多」，我哋會講下波羅密多嘅意思，以及佛教對苦嘅源頭嘅理解。 第二部分，「由欲見到般若」，呢個部分會開始見到「般若」點解係佛教最著重嘅概念，因為佢顯示住佛教嘅獨特，以及波羅密多同般若嘅關係。 | |||
| 18 Mar 2025 | 奇書介紹：以廚師秘聞，窺探蘇聯政治秘辛——「在蘇聯這樣的國家裡，每塊豬排都是在為國家服務」丨有文有路（4）丨《克里姆林宮的餐桌》 | 00:12:34 | |
只要係人，總要為三餐而奔波、煩惱，廣東話好傳神，一方面稱之為「搵食」，一方面稱之為「醫肚」。工作，就係搵食，搵食，係因為我哋個肚有病，所以要定時去醫佢。而肚嘅醫生，就係廚師。 今日要同大家介紹嘅書，係關於為俄國政客醫肚嘅廚師訪談錄，叫做《克里姆林宮的餐桌》。 歡迎你返到嚟有文有路，有文有路，文化方見道。今集，我會同你以廚師秘聞，窺探蘇聯政治秘辛——秘，指隱，辛，指苦。 呢本，係一本用俄國飲食，講俄國政治嘅書。作者維特多．沙博爾夫斯基，被認為係波蘭最優秀嘅報導文學作家之一，佢透過走訪前蘇聯嘅唔同地區，訪問當地嘅廚師，將訪談結果集結成呢本書。佢講到：「為了寫這本書，我東南西北跑遍俄國、烏克蘭、白俄羅斯及其他前蘇聯共和國，與一名又一名身分特別的廚師交談，因為這不僅是一本歷史書或報導文學，同時也是一本……食譜。我走訪了在克里姆林宮擔任多年主廚的維克特．別瓦耶夫，跟另外幾場由俄國掀起的戰爭中的廚師聊過，也向車諾比或給太空人做飯的廚娘討教。」 點解廚師同政治可以拉上關係？作者一開頭嘅故事，就會表露得相當清楚…… | |||
| 23 Mar 2025 | 《世界哲學史》共讀（1）：啟蒙精神即係乜？京都大學榮譽教授一次過帶你睇清啟蒙運動脈絡丨得閒讀書會（5）丨廣東話讀書會——〈啟蒙的光與影〉 | 02:28:57 | |
逢星期三夜晚九點直播（如有字幕，字幕由ai生成，我無時間檢查，如有需要，自行取用）尾段總結有啲甩咗，唔好意思。 原片：https://www.youtube.com/live/xoavZQaT1-U Patreon: https://www.patreon.com/cowgortalk 本集章節：00:00 開場白第一部分，前言10:00 何謂啟蒙18:01 西方近代之啟蒙主義26:17 理性，自然之光1:04:30 第二部分，從啟蒙觀理性與情感 1:08:36 孔多塞：理性嘅堅信者1:16:06 盧梭：人類良知嘅提燈1:37:08 他鄉遇知1:40:20 兩種面對懷疑論嘅態度2:06:22 人類情感論2:12:30 總結閱讀材料：《世界哲學史6 近代篇（I）啟蒙時代的思想變革：理性與情感》🐮 Follow IG：https://www.instagram.com/cowgortalk🐂 加入讀物農莊，一齊閱讀，一齊討論！https://www.patreon.com/cowgortalk【文稿可於Patreon免費閱讀】【聽Podcast】🎧 Apple Podcast：https://podcasts.apple.com/podcast/id...🎧 Spotify：https://open.spotify.com/show/0yFR7YK...🎧 Google Podcast：https://bit.ly/3Cknf1m🎧 KKBOX：https://bit.ly/3RneS9t | |||
| 29 Apr 2023 | 牛哥講電影｜《死屍死時四十四》：如果門口出現一個無生命跡象嘅裸體男人，攤咗喺度，郁都唔郁，你會點做？ | 00:27:14 | |
喺4月9日，fallformovies（夏冬）搞咗個包場，睇《死屍死時四十四》。感謝佢嘅邀請。完場仲有導演何爵天同演員楊偉倫嚟謝票。何爵天講到戲中有一幕古人捉西洋棋，係想致敬《第七封印》。 講起《第七封印》，你應該會記得我講過《更改主題》，入面嘅導論就係講《第七封印》。既然咁巧合，就借機引伸，去講講《死屍死時四十四》同《更改主題》嘅關係。 正文內容我主要會講劇情同「共同的荒謬」嘅關係，我會分出三種荒謬，再講荒謬字源上嘅意思。 到結語部分先會係思考部分。我相信觀賞荒謬時感到不適，先係正常反應。如果觀賞荒謬而樂在其中，咁反而未必係件好事。 【注意：呢篇文唔係介紹，而係詮釋，所以我會劇透，驚劇透就唔好睇落去。】 | |||
| 12 Sep 2021 | EP15《孔子大歷史》（上集）：孔子絕非守舊老嘢，更加前衛到將娘親棺材周街放 | 00:48:04 | |
孔子呢個名，你知我知，單眼佬都知。但我哋對孔子呢個人嘅事蹟又了解幾多？ 今集，牛哥會講下《孔子大歷史》呢本書，輔以引文，為你呈現孔子真實嘅一生。一齊睇下孔子點樣由一個鄉人變成貴族。呢集內容包括： 1. 介紹孔子嘅巨人父親嘅事蹟 希望藉由詮釋佢嘅事蹟，能夠令各位喺唔需要理解論語嘅思想底下，都能夠以孔子嘅行事去了解佢對禮制嘅睇法，你或者會發現，孔子之所以係聖人，唔係因為佢離地，而在於佢嘅超凡入聖。 （按：今次開頭會講講九一一，正式內容由12:25開始。） （另：實在失禮，有好幾次將「孔紇」讀成「孫紇」，請見諒） | |||
| 02 Apr 2022 | 牛哥三個字｜活下來 | 00:26:00 | |
牛哥講經嘅新系列──牛哥三個字正式推出。避免長篇大論，以十五分鐘去同你講講唔同嘅主題。牛哥三個字，細訴人間事，今集同你講講一件心事。 呢一次有一位聽眾講咗一件深刻嘅感想，係努力過後感到嘅疲憊感，甚至突如其來有一陣想尋死嘅感覺。我諗呢種諗法，好可能會引起唔少人嘅共鳴，因為我哋或多或少都想尋覓人生嘅意義，想去填滿自己心靈，然後一次次落空，感到虛無。 「我哋都想去腳踏實地，只係搵嚟搵去，發現自己就好似身處喺一隻喺太平洋飄流嘅船仔，你知道太平洋嘅中心係連魚都唔多條，上望住無垠嘅天空，眼前係茫茫嘅大海，每晚有明月伴你、每朝太陽由東方升起，而你經歷過日日子子之後，知道一切都係遙遙無期，你甚至唔記得自己喺邊度出航，唔知道咩方向可以返去、唔知道咩方向可以前進 … 現實話俾我哋知，當初嘅「目的地」，只係一個又一個嘅中轉站，所以一次又一次嘗試前往「目的地」，只係一次又一次到達中轉站。更慘嘅地方係，你唔知呢個中轉站下一站要去邊。最慘嘅係，你甚至唔知道依家呢個中轉站啱唔啱方向。然後你知道自己已經盪失咗路。」 我哋好想去尋覓一個目的地，但如果我哋一齊去思考一下目的地嘅意思，你就會發現要去尋找呢個目的地唔係一個逃避荒謬嘅方法，而係尋找目的地本身係一件荒謬嘅事。 如果唔去尋覓「目的地」，我哋要駛向何方呢？Stoic 話，我哋係呢個世界嘅旅人，有人遊走於書籍之間、有人遊走於運動、美食、思考......我話，你我都係巧合嚟到呢度嘅旅人。 「依家嘅太陽、地球、你我可以出現，都係需要億年前嘅聚變先有可能出現，你我，如果係巧合出現，都係星辰以億年嘅生滅先出現嘅巧合。 所以，你我，係億年嘅產物，去生活幾十年，然後喺千年以後消失嘅存在。」 「旅行嘅人無嘢會帶得走，旅行嘅人可以享受每一個夜晚。」 旅人，往往係孤獨，而其實孤獨並非我所獨有，孤獨係一個共相。牛某會繼續以牛哥講經，同諸君一齊孤獨。希望同你一齊渡過人生，然後到某日成為「歸人」。 希望你會喜歡呢集，亦會喜歡最後送俾各位嘅三個字。 | |||